06 September 2013

蟲眼看。Yah00! bl0g的前世今生

正當大家如火如荼進行搬家行動、互通攻略和聯絡消息之時,小蟲反而想懷緬一下和說說對雅虎部落格執粒的感受。

蟲在部落格的日子

小蟲早於2006年開blog,無記錯的話,應該是在旅遊討論區簡單分享過奧地利的行程之後,想自己也來儲起一套,於是開個blog,希望之後學人寫下遊記。不過旅行不時日日有得去,所以初時乜都寫一餐。有時只得幾句無謂感想,有時寫食評;那個時代的文章,現在看來不值一顧。中期打後,無論文字和照片的處理花多了心思,除了開始有些穩定的網友來看之餘,反而是想趁機認真記低旅遊、吃喝、藝術觀賞的自家感覺。

當期時生活相當優閒,居然能天天有post出,今時今日看來簡直匪夷所思!不過,到2008年,忘了是忙是累還是純粹對寫blog再提不起興趣,忽然休業一年多。直至2010年開始搞結婚,覺得有很多事能跟大家分享,於是另起婚blog兼加密(set privacy)再寫,繼而接觸到一眾當時一齊搞結婚的網友。到2010年尾結完婚,婚blog的任務亦完美完成。於是決定自行備份,然後刪除所有文章,婚blog從此閉門大吉。不過,寫婚blog重燃起小蟲寫網誌的興趣,又於是掃一掃封了塵的舊blog,再一次經營直至現在。


蟲對YB的愛恨

老實說,多年來對這個網誌平台真的說不上喜歡。剛開始的時候,雖然有很長時間它一直叫自己做Beta,但簡簡單單,功能不多但正正常常還好。可惜之後越搞越亂,周不時有功能失效或做得不淪不類。小則貼相失敗,大則寫完整篇文章失去亦有;而spam message一直泛濫無法根治。

早兩年改版,以為會有好轉,可惜卻沒有。就連轉版migration亦錯漏百出,原文貼有存在YB server的照片,轉版後居然全部死link。一間公司可以容忍這種低級錯誤的出現,管理層肯定有問題。一般IT公司犯上這種錯誤必然被剷到上天花板,而雅虎採取的態度是「無所謂」。原因很簡單,就是大家對它無限量的容忍,無論它有幾差,大家都繼續留守。大家賴念它是香港網誌人的集中地,離開又怕孤獨又怕苦,於是繼續蹉跎。鬧完又寫、寫完又鬧,周完復始沒完沒了。

功能少兼做得差是小蟲討厭它的原因,但近期最憎的,莫過於它版面的所謂精選文章。有不少人氣博客由YB發蹟,亦是因為登上了人氣精選而聞名。本來作為篩選的雅虎編輯,好應該發掘一下不同題材、不同寫作方式、不同特色的文章,讓大家一同欣賞。可惜不知是懶、是求其、還是另有含意,總之每周的所謂精選,都離不開某一小撮博客。博客A上期登上主目錄精選,今期則上吃喝類別,下期肯定又上煮食類別,總之一堆人塘水滾塘魚,彷彿整個YB只有某一些人在寫blog一樣。到後期,小蟲連首頁都懶得再去看,反正又是那些受了人家甜頭然後去寫文的所謂人氣博客(恕我偏激直言了)。


蟲部落格之轉變

回望過去,小蟲亦是縱容它的一分子,不過其間開始轉變經營模式。2008年開了blogspot和wordpress帳戶,試用一下,但下不起心肝搬家就作罷;直到往年,再忍受不了屢次「寫完文章save不到,繼而無晒」的慘痛經歷,便決定利用blogspot做起稿處。因為,人家有auto save!起完稿再在YB刊登,所以部份文章兩邊部落格都有,雖然花時間維繫兩邊,但一來方便起稿,二來雅虎有咩三長兩短都無咁傷。另外,2011年起,已經放棄用YB的相簿功能。將照片直接寄存在photobucket,再連接入文章,無論照片大細和質素都比較彈性控制。而越早放棄依賴雅虎,問題就越少。

執粒在即,此刻有不少人留戀,覺得YB陪伴大家成長。說是無情好了,但小蟲確實一點離愁也沒有。除了認識到一眾blog友外,YB絕對是一個失敗的平台。正式宣佈執粒,反而鬆一口氣,呼!終於肯死了,來個了斷,再不用兩邊維護,太好了!

蟲猜部落格的未來

按照資訊越來越多,大部份人的閱讀習慣傾向表面化的大趨勢來說,更新快、短小精幹的社交網始終會是主流。比較深入式的傳統blog,依然有市場,但只適合主攻特定話題的網誌,例如旅遊、技術、藝術等等,吸引發燒友聚腳;而且更要配合社交網帶動。當然,全世界有無限咁多人在網上世界寫文章,怎樣吸引點擊率,又是另一個話題了。簡單來說,YB要死是它技術差、質素低、管理劣的惡果,blogging本身還是有一段時間生存價值的。


37 comments:

  1. 小肥寫Blog日子尚短,只系用雅虎前曾經喺MySPace寫下日記。。。到去咗一次北海道後好想同人分享,就一直到現在。聚集嘅都糸日迷。。。所以好認同你^0^ keepintouch😉

    ReplyDelete
    Replies
    1. 其實分享有人睇之餘,仲可以幫到人,係一路寫blog的動力。加油!

      Delete
  2. 都好認同你講, 對YB 關閉, 真係冇乜太大意外 / 不捨.
    反而對係 YB 識的 Blog 友就真係難得了.
    YB 關閉左之後,希望唔會同太多位失散啦.

    ReplyDelete
    Replies
    1. 睇嚟好多都搬嚟blogspot,不過都唔排除有一部份會放棄寫blog。。。

      Delete
  3. 因為搬我留意到自己由06開始寫BLOG至08後慢慢少了篇數,因為FACEBOOK的出現!!但BLOG仍有市場,因為很多SHARE的事件的確要大篇幅才可以!一兩句夾張圖,只是一個HELLO的形式。
    YB死而有不捨,只係我用緊而已,搵到新地方,慢慢一樣會慣,最緊要大家仍繼續HAPPY BLOGGING啊!!

    ReplyDelete
    Replies
    1. 某程度上我覺得係資訊outdate得好快。寫blog最大的問題係比較花時間(當然都有人會寫兩句勁貼圖),嗰頭寫完個話題就已經過咗氣。大家繼續努力!

      Delete
  4. YAHOO!BLOG的關閉,是意料之內的事。之前實在有太多跡象了。只是大家也有點逃避現實般掩耳盜鈴和不肯面對。

    很同意你所說的,有時我自己都BLOG到有點迷失。由婚BLOG開始,到偶爾寫吓旅行及生活。因為YAHOO!BLOG改版後,不少網友也棄BLOG了,每天瀏覽的人數突然急降;更多的時候,好像是自然自語,沒有半點交流的。

    到現在大肚,開始寫吓懷陀仔生涯,但有時又怕單一的TOPIC未必人人愛看,悶親D網友又有點無謂。

    不過,既然我又不是靠寫BLOG搵食,亦不打算化身成為星級BLOGGER,所以都係鍾意寫咩就寫咩。

    最重要的,我都係唔捨得一般識左好幾年的網友啦。

    ReplyDelete
    Replies
    1. 妳嘅諗法我絕對認同...其實我寫blog都係俾自己睇之餘順便分享下...

      Delete
    2. 我2006年12月25日寫第一篇BLOG,以為過到7年之癢,但最終都瓜迆。以前好多人瀏覽,都幾有成功感。但自從改版之後,真係越搞越衰,衣家睇得我個BLOG最多的,反而係我自己。

      有時想睇返旅行的經歷懷緬下,有時想行山但又唔記得左點去又會睇返自己個BLOG咁……其實FOR 自用,真係幾方便。

      近幾次旅行,都係覺得BLOG的用途遠大於參考書……

      Delete
    3. @澄: 無錯,自己鍾意寫乜就寫乜啦,無人睇咪自己睇囉,呵呵呵~
      @Dennis: 哈哈,我有時都會揾返自己寫過嘅資料

      Delete
  5. 妳講得啱 YB 執笠真係預咗,係呢個時代佢居然係無手機用嘅 app 配合個 blog ,入面D function 又越來越多限制,之前都覺得佢執笠在即...

    ReplyDelete
    Replies
    1. 佢執好啦,你唔好偷懶吖!你啲自駕遊info好有用呀!

      Delete
  6. 其實以人氣來講yblog都唔差. 亦有一定支持者. 以商業角度, 應該係生存到. 奈何以一間咁大既IT公司, 居然越做越差. 真係趕客咁款.

    或者因為公司太大, 呢d小業務跟本唔會有人重視, 拿不到資源.

    ReplyDelete
    Replies
    1. 哩個就係管理嘅問題。邊間公司有無限資源呢,唯有大有大做,小嘅就更加要做得好先攞到更多資源。可惜。。。

      Delete
  7. 你講既精選文章全中,其其都係果個扮專家既有錢仔項明生; 不過另一方面係因為銀仔無投謞啫~ kakaka~

    ReplyDelete
    Replies
    1. 其實唔止係佢(雖然我都好唔鍾意佢),十個着咗九個都係嗰啲blogger。有好多有心寫嘢嘅blog友都有投稿,可惜好難被揀得中。你唔投稿,係你道行高,虛名嚟啫~ XD

      Delete
  8. 好鍾意睇你寫野!講中哂。

    ReplyDelete
  9. YB 每況越下, 執笠都真是意料之內, 所以一點也不 surprised. 幸好之前一直有一腳踏幾船, 同埋好多相都無放 yahoo, 而家搬家比較方便! 而且, 用落 blogspot 真是很不錯, 我一直都是用 blogspot draft 跟著 copy and paste 的! 有 auto-save 好好多! 又好少話會好似 yahoo 咁 click 完 "post" 跟著俾個 error msg 你!!

    你講嗰啲人氣 blogger 其實我都好少睇, 個人唔係好鐘意嗰啲"受了人家甜頭然後去寫文"的"試用文", 感覺上好 biased 好唔中肯... 我都係鐘意去啲睇開的網友的 blog! 感覺上親切多了 :)

    ReplyDelete
    Replies
    1. blogspot好用過YB,只不過佢無首頁或者針對地區而設的組群,對於羊群華人嚟講係好難接受的一樣嘢。我就超唔鍾意睇試食會的blog,老實講,你請得人去食,set好晒個場咁更係好啦,做唔好都抵打啦。但無準備,人家暗訪都做得好,哩啲先叫真章~

      Delete
  10. 我覺得最可惜既係冇咗一個香港人既platform,blogspot既用家好疏離,冇得好似咁喺茫茫blog海之中揾一樣野。

    ReplyDelete
    Replies
    1. 無辦法啦,香港始終係小市場,無人會肯掉錢去搞㗎啦。

      Delete
  11. 有樣野想請教。

    我喺外面搵果啲BLOGGER TEMPLATE好多時好難改,尤其是頂頂果條BAR。妳係點改架?即係HOME果條BAR。

    ReplyDelete
    Replies
    1. 視乎個template點寫啦。有啲只係用個Page嘅gadget,每個menu item都係一個page嚟。但如果有submenu,就多數要去template然後edit html。一般個template會用啲假menu名,你可以去search吓個假名,再改附近的內容。多數都係改menu名,同加返條link落去就得。

      例如哩個template,你可以search "contact" "download"咁
      http://btemplates.com/2013/blogger-template-skyblue/demo/

      Delete
  12. 小蟲,終於搵返你喇!!!
    我都搬左黎blogspot...尚欠好多遊記未寫....

    ReplyDelete
    Replies
    1. 尋日突然諗起你,大家都嚟blogspot真係好吖!follow咗你,繼續努力!

      Delete
  13. 「受了人家甜頭然後去寫文的所謂人氣博客」好認同!!!
    PR最歡迎呢啲人,大家互相利用,你有免費產品美食,佢又可以交差
    攪一個event,之後幾日就會出現一大堆一式一樣的廣告文章,簡直浪費大家時間!

    ReplyDelete
    Replies
    1. 真係最老套係個個寫嘅都差不多,睇都哂大家時間。不過無嘅,被邀請嗰啲又飄飄然,覺得好榮幸;請嗰個又多個途徑賣廣告,各取所需啦。

      Delete
  14. 小蟲,剛開始用BLOGSPOT,啲設定好細緻,要慢慢學,另有嘢想請教,你個留言設定係點SET?
    我將YAHOO留言匯入BLOGSPOT,有埋網友名稱,我見有人教啟動GOOGLE+留言就可以有留言通知,但啟動咗GOOGLE+留言,以前啲留言既網友名稱就變咗匿名,我其他GOOGLE+留言又唔知收咗去邊。而家唔知點搞....

    ReplyDelete
    Replies
    1. eeehhh... 你個問題咁難答嘅。我無import yahoo blog嘅嘢過嚟,同埋無用google+嘅留言(因為唔相用G+),所以都唔係好清楚。唔好意思,幫唔到你添。 ^_^"

      Delete
    2. 講真,我都唔係好想用google+,好多嘢開嘢俾人睇,係我問得唔清楚,我係想問我喺你個blog留言之後的回覆通知,我而家睇到啦,喺右下角度 :p

      Delete
  15. I also started YB few years ago to try to record my travel diaries. In the past, YB are divided into different categories and I usually clicked in the travel category to see bloggers' latest blogs. Later, YB has changed their presentation and such categorization no longer exists. Recommended blogs were provided instead. I also share your view that YB editors are not keen to dig out new recommended blogs. I now rarely visit these blogs from the list. However, I will start to make back up especially for the photo links in future as I see that blog, which is a profit making area for the web site, may be vulnerable to be axed if the web site decided to cut the cost.

    ReplyDelete
  16. 說得很有見地。希望看到你很多精彩的文章。

    ReplyDelete

到此一遊,留個字啊~

Related Posts Plugin for WordPress, Blogger...