28 November 2013

2013 重遊塔斯曼 《Tasmania 農莊小屋、入住貼士》


2013 重遊塔斯曼 ♣ 路線 + 遊記Index 


 2013 Sep 匯率: 1 AUD = ~7.3 HKD

對於住在高樓大廈的城市人嚟講,去鄉郊地方住吓啲黐享地面的屋,係好吸引嘅事。去Tasmania,除咗出發前訂咗一晚的農場小屋外,到埗後還找著兩間茅屋(Google係咁翻譯cottage嘛),各有特色,值得介紹。

有心理準備,哩篇嘢都長長哋。


Classic Cottage @ Port Arthur

臨場決定住Port Arthur,都無idea邊度有得住。係沿路入Port Arthur Historical Site,偶然會見到有細細個牌放享路邊兜生意,啱就駛入去睇。其實,講到尾都係求其揀。除非真係好不堪、好昆水,如果唔係懶蟲都唔想落車睇完唔啱,又再揸去第二間。Classic Cottage享大路放咗個牌,話自己$89一晚。我哋要求唔高,平平哋有瓦遮頭都可以,所以就入去望。


Cottage位於湖邊,由大路駛入的小路,小路大概有十來戶住家。按路牌找着reception(其實是屋主自己間屋),入去傾咗兩句,屋主指咗我哋去旁邊的cottage,自己入去睇過無問題再返嚟比錢。查實一入去,小蟲覺得有少少舊,不過實在懶得揀嚟揀去,唔係貴兼住一晚就算。裡面係點?下面睇相。

住落又唔係差,只係比較古舊。設備基本夠用,有啲舊式。書吖,boardgame吖都有,無電視(讚!),有微波爐,電池爐。水都夠熱,但略微弱(因為佢係自己儲水和供水)。Wifi / Internet都唔洗諗喇,小蟲用嘅Optus電話卡享哩區完全收唔到,疊埋心水唞吓。浴室有暖燈,床有電氈,另有熱水袋,有火爐;不過為免燒咗人哋間屋,都係唔好攪咁多嘢走去生火,雖然夜晚好凍。。。

湖畔,環境幾好,靜過鬼。如果你細膽,參加完ghost tour黑麻麻摸返嚟可能會有啲驚。距離Port Arthur Historical Site約七八分鐘車程,附近無店舖,最近要揸十分鐘有個油站。屋主提議我哋揸遠少少,差不多廿分鐘去Nubeena買嘢(但啲嘢同油站一樣咁貴,只係多啲貨品咁解)。屋主唔係澳洲人,估係法國人,有少少寸但唔係無禮貌。

細細間嘅屋仔,被植物覆蓋。左邊有條小路,行廿步去到屋主自己間屋。右邊條小路可以去湖邊。

廚房裝備基本但夠用(唔係開大餐的話),有個窿可以望通客廳。

雖然間屋舊舊哋,不過哩個廳,令小蟲覺得好似入住咗人哋間屋,好有feel。

間屋有一個睡房,另外客廳有張碌架床,全屋夠瞓四個人。
娛樂設備都有,收音機,雜誌,十幾款boardgame等等。

個浴室不按比例地大和不協調地新型。初初驚會好凍,但安裝咗發熱暖燈。
另外有個鐵桶,剩載初初開水喉的冷水,唔好浪費。

屋外的湖景,小屋就在左邊的岸上。

距離景點唔係近,亦唔算好遠咁啦。

Classic Cottage Self-Contained Accommodation (有幾間小屋出租,間間不同)
評分評價: 抵住之選
價錢:$89 可住四人
邊樹訂:Walk-in
住宿網頁:無。不過Booking.com, Stayz.com.au有得訂



Dove Cottage @ Orford

Orford本身並唔係一個旅遊點,在這裡借宿一宵,純粹因為它位於Hobart和Triabunna中間,方便我哋落腳。早一晚在網上找找有咩好住宿,就發現咗Dove Cottage。睇相和評價好好,價錢亦唔係貴。今次唔係walk-in,事前上網訂,信用卡付款,然後收到confirmation和屋主的指示。平時如果屋主住享旁邊,多數會留條門匙在大門。但我哋估屋主唔係住享附近,只靠電郵告知如何前往和入屋,無露過面。要入屋的話就要跟電郵指示去一個特別裝置入密碼,先可以拎到門匙,都幾搞鬼。

先講屋內,實物和照片無乜差異,簡單得嚟都幾新淨,有少少格調但又不失「家」的感覺。最正當然就係大大扇落地窗,完全將室外引進室內;就連浴室都可以好開揚咁望到出面。設備係三間最齊全的一間,比之前的Classic Cottage仲多咗洗衣房,有洗衣機和乾衣機。用品嚟講,仲有麵包機(但當然唔係P記或者好新款㗎啦)、冰桶、酒杯、洗碗碟機,真係享度住一個月都無問題!暖氣係用空調,雖然無咁好feel,但襯返比較現代的設計,和啱晒我哋哩啲懶人。另外,連屋有個露台,享河流的一旁,好環境就不在話下,最好就係有埋BBQ爐(雖然落雨我哋無用到,同埋唔想清潔)

小屋位於一條倔頭路的盡頭,唔慌揾唔到。初初到埗驚附近無嘢賣,但看似寧靜的小鎮,原來還有超市和餐廳營業。由小屋步行五分鐘前去,買完行返返去,欣賞一下周邊的環境,一絕。好彩我哋早早哋四點就去到,可以有多啲時間嘆吓。食完自家煮的晚餐,洗吓衫,沖返杯茶睇吓旅遊資料,嘆到痺~雖然有個電視,但無開過。 同樣地,wifi / lan欠奉,不過小蟲的手機都間歇性收到,可以上網。

位於掘頭巷的屋仔,行咗過去超市嗰邊,離遠都見到。

享條柱都有個保險箱仔,按電郵指示開啟後拎鎖匙入屋。一入屋係laundry,轉個彎有個客廁。

入到個廳,同網頁張相一樣樣,享條河旁邊,個景無呃人~

哩啲情況,梗係嘩完一輪就係咁影相,尤其是個天空之鏡view。
路線 + 遊記Index 張title相,就係享Orford影㗎啦。
左邊離遠望見有啲建築物,就係超市和餐廳。

個露台有檯有凳,仲有燒烤爐。不過旁晚開始落雨。

廚房設備齊全,三間之中唯一有fix電爐和焗爐嘅一間,其餘都係類似打邊爐portable嗰隻。

對住個靚景煮飯都開心啲。睡房都好舒服。

個浴室簡直係靚,不過用shower位沖涼,沖到周地濕晒,濕到出門口。同埋唔慣係個廁所享另一度。

黃昏過後,開始落雨。

Orford位於Hobart東北部,大概一個小時多車程。小圖係屋仔和超市的距離。
Dove Cottage @ Orford
評分評價: 無可挑剔
價錢:$180 可住二人
邊樹訂:Stayz.com.au
住宿網頁:無。



Hurlfield Farm Cottage @ Sheffield

去Tasmania,梗會住吓農莊感受一下大自然配上動物的環境。香港人比較熟悉的農莊有Curringa FarmBrickendon Farm Village。小蟲覺得兩者都好好,前者的屋仔現代look多啲,後者懷舊啲。不過諗完一輪,最後兩間都無訂,無啦啦揾來在Sheffield附近的Hurlfield Farm Cottage。原因呀?貪佢成個農莊得一間屋出租,而且規模唔大,(希望)唔會太流水作業。另外,就係因為佢哋有養草泥馬(Alpaca羊駝)!

四點多去到農莊,有百年歷史的屋仔門口,已經貼咗張紙歡迎我哋,叫我哋得閒就去戶主間屋打個招呼。禮貌上當然要去見見面啦,佢哋自己間屋享屋仔後面,近近地但又隔開咗,唔會對口對面。行到埋去,男戶主Chris出嚟,話女戶主Sharon正在忙。入到屋,原來Sharon享廚房,用個針筒餵緊隻啱啱出世嘅BB羊食奶,因為羊媽唔肯餵奶喎。好搞笑~

然後Chris就帶我哋返屋仔,介紹吓啲設備。天氣其實都凍,佢哋好細心已經起咗火爐,仲教埋點樣放柴,就算瞓咗基本上可以暖到第二朝。介紹完畢,我哋就settle down。屋仔對出,係羊咩和羊駝的屋企,所以放低行李就出去玩動物。不過玩一陣,要趁早去Sheffield食晚飯,聞說最夜嗰間都好似係開到八點。而,嗰晚又唔想煮喎。由農莊揸去Sheffield,大概五六分鐘啦,都算好方便。

屋仔嘅設備齊全,都有laundry,只係乾衣時太過暖多蒸氣,搞到個smoke detector勁響,嘈到拆天。好彩laundry有對後門,又開又閂,盡力揚散啲熱氣,就無再嘈喇。屋主為我哋準備的食物更是一流,有蛋、鬆餅和果醬、奶、果汁、水。仲有一包包標明比不同動物的飼養食物,隨時可以餵。應付我哋哩啲「動物盲毛」,實在好有用。

到第二朝,Sharon帶我哋行吓個農莊和附近睇吓。除咗動物,最誇張係佢哋鍾意收藏馬車(Carriage),真係堅~ 

出入記得閂閘

百年小屋,和旁邊的羊場。
當日去到的天氣陰天,夜晚仲行雷勁大雨(啲羊都無瓦遮頭㗎)。
不過到第二朝居然好天,靚晒~

有兩個睡房,住四人都得。

蟲老公對個客廳讚不絕口,大凍天時對住個火爐睇書,夠cosy。

廚房用具ok,最正係有食物準備埋。
朝早自己煎蛋整三文治,焗熱啲鬆餅,一流。橙汁就早一晚已經掃晒。

因為始終係舊舊舊屋,地方都係一路加建出嚟。
個浴室唔太大,shower位就直頭細。小蟲都啱啱好,蟲老公要縮埋。

除咗幾隻豬仔無出現外,農場有嘅動物品種大致睇晒。
其實真係幾得意嘅,不過每次佢哋都會自動行埋嚟揾食,小蟲有啲驚囉。
所以唔係準備逃走中,就係離幾十個身位,幫蟲老公影相就算,自己一張同動物嘅合照都無。

Sharon帶我哋行咗一圈,講咗好多關於農場和動物嘅事。其實小蟲唔係好明佢哋係靠咩為生,啲動物又唔係賣又唔係食,數量又唔係多到可以賣羊毛。。。
睇完聽完,蟲老公就忙於餵豬、餵羊和神獸,隻神獸勁搶食。
明明餵緊羊仔,佢又走埋嚟搶,搶到要咬蟲老公膊頭!哩隻嘢一啲都唔可愛!

最堅係屋主有成個倉擺馬車,大大細細,新新舊舊都有。
舊嘅有圖中18世紀嘅貴族小孩馬車,新嘅有婚禮馬車、殯儀馬車(都有!)、有蓋無蓋嘅都有。強!有兩架由波蘭運過嚟,主要係波蘭依然跟足傳統嚟製作,連英國嗰啲都縮水喎。

好天氣真係好靚,不過前一晚好大雨,我哋著行山鞋都行到一腳係泥,難怪Sharon要着雨靴。

最後不得不提,係好純良可愛的Lockie。
老實講,小蟲唔太鍾意動物,但都出奇地鍾意哩隻狗狗。

出張pano作為總結。

離sheffield幾近,有得食有得買。
Hurlfield Farm Stay
評分評價: 物超所值
價錢:$140 可住四人
邊樹訂:電郵
住宿網頁:http://www.farmstaytasmania.com


住Cottage小貼士

不竟住cottage同住酒店唔同,有啲嘢都要留意吓。

  • 有時屋主未必住享屋仔旁邊,如果要walk-in,最好有準備要打電話比屋主聯絡。
  • 一般哩啲屋仔都叫做 Self-contained cottage,言下之意係裡面有齊用具,但同時間各下自理,用完執返好間屋比人。之於「執返好」要執到咩程度,就間間有唔同。最穩陣,就係入屋睇吓人哋有冇貼啲紙呀,有冇單張寫明。有就乖乖哋聽人話,無就用common sense喇。例如用完啲碗碟洗返乾淨,爐頭枱面抹返乾淨咁。執床洗廁所吸塵就唔洗囉,除非你整到特別地污糟啦。
  • 廚房除咗有用具,有時仲會有鹽和胡椒咁,有啲會有茶包咖啡,但夠唔夠膽用就you think you啦。
  • 其實做人幾時都唔應該浪費,尤其係哩啲鄉郊地方。我哋有間cottage係自己儲水,所以廚房和浴室都有盆或者桶,比客人載啲無用嘅水。例如洗完菜、沖涼啱啱開嘅凍水等。幫吓手,載起佢等屋主攞去用(如淋花)。
  • 如果只係住一晚,最好入黑前去到。一嚟有時啲路仔入夜好難揾,二嚟哩啲地方真係要嘆,早少少去到可以好好享用一下。我哋就多數四點倒五點前就到。

2013 重遊塔斯曼 ♣ 路線 + 遊記Index

更多照片或資料:Facebook Album



30 comments:

  1. Dove Cottage @ Orford 間屋正!

    ReplyDelete
  2. 有駝羊那間我最愛.....!!!!!!! 其實間間都好正,城市太久真的想要鄉郊一下!

    ReplyDelete
    Replies
    1. 不過哩隻alpaca好曳㗎!城市太多人太迫,真係要去鄉郊鬆弛吓。

      Delete
  3. 第二同第三間都好正丫! 澳洲D動物唔知係咪生活環境好, 個樣都可愛D, 開心D架!! 我就住左Curringa Farm, 係好靚, 設備齊全, 地方好大, 有個鏡面湖景好靚, 但因為出左名, 亦感覺上變得商業化同多香港人囉...

    ReplyDelete
    Replies
    1. 不過curringa farm有一大群羊咩咩,就唔係啲細farm可以睇到啦。 ^^

      Delete
  4. My comments:-
    1st one -The toilet is extremely large.
    2nd one- The view of sitting area facing the lake is comfortable.
    3rd one - The sitting area is well decorated.

    Conclusion, I want to have one!

    ReplyDelete
  5. 正呀, 下次番去都試下住先得!

    ReplyDelete
  6. 真係好有country味道,而且間間個view都幾正,Dove果間比較摩登又近超市,買野返去煮比較方便

    ReplyDelete
    Replies
    1. 難得靜得嚟又幾方便,有時間坐享露台嘆吓茶睇書,真係一大樂事。

      Delete
  7. 住宿唔錯噃~
    隻神獸其實係想食蟲老公呀! 哈哈~

    ReplyDelete
    Replies
    1. 咁啱老公着件橙色衫,我哋話神獸以為佢係條大蘿蔔,所以咬埋去,哈哈~

      Delete
  8. 很好的住宿!你現在寫埋評分評價, 點夠你寫啊! 我自覺不如了!

    ReplyDelete
    Replies
    1. 哈哈,我嗰個行行企企嘅無謂嘢嚟啫。你嗰啲有齊歷史資料背景先叫勁呀~ ^^

      Delete
  9. Classic Cottage 我個次去到有Book來住,我住個間係湖邊,重有得衛星上網添呀~~
    不過個廁所就係屋出面,都幾唔方便,妳住呢一間都幾正喎~~~

    ReplyDelete
    Replies
    1. 咦?原來你都住過吖,我覺得平平哋算合理囉,唔係特別出色。

      Delete
  10. 你寫得咁詳細o既!好記性外仲要有分析能力。

    ReplyDelete
    Replies
    1. 哈哈,唔洗咁複雜,份人夠無聊就得㗎啦。 XD

      Delete
  11. 真係有天空之鏡view 啦!

    ReplyDelete
  12. 其實我都好鍾意住 cottage, 舒服, 又可以煮野食, 如果多過 2 人以上仲幾抵添 ~

    ReplyDelete
    Replies
    1. 我都幾鍾意,不過最好就係同酒店間疏住,咁就可以有時煮飯仔,又有時有人執房。 XD

      Delete
  13. 咁多間都好正好relax, 可惜睇得你個BLOG 遲,已book晒住宿了。希望下次有機會住下咁有feel既cottage

    ReplyDelete
  14. 湖境個間同動物屋真係一流,我諗我黎緊去都會住呢幾間

    ReplyDelete

到此一遊,留個字啊~

Related Posts Plugin for WordPress, Blogger...