20 July 2014

日本岐阜縣《高山桜庵:平靚正的溫泉住宿》



 2014 Mar 匯率: ¥100 = ~HK$7.7
 欲看其他照片,請參閱Facebook Album
 2014 日本中部。名古屋初馬《行程總覽、遊記Index》


雖然家陣大熱天時,大家未必想浸溫泉。但以小蟲寫blog的速度,其實寫得嚟睇得嚟,你哋plan得來,都差不多秋天;推介就啱㗎啦。今次中部之旅,分別住咗三間溫泉酒店,價錢有豪、中、抵之分。先來介紹「抵」價之選,堪稱性價比極高。


其實我們自駕遊,酒店的選擇多的是,本來無需要揀這間旅遊書推介(即係可能好多香港人住)、又近火車站(即係好多旅客)、又有十幾層高、成百幾間房(即係好多好多旅客)的溫泉酒店。一直傾向只有十來個房間,又夠僻靜的住宿,但最後揀飛騨花里の湯 高山桜庵,原因只有一個,就係平 + 評價佳!當訂咗另外兩間酒店之後,第三間基本上係想搵啲平靚正嘅,繼續奉行「有平有貴,明智消費」的大原則。

位置環境  

酒店位於高山市車站旁邊,步行三幾分鐘就到。對於乘搭公共交通的旅客來說,算好方便。由酒店步行到景點區的古風步行街,就大概要十分鐘。地點都可以話係自成一角,旁邊只有幅空地(當時),對面好像有便利店。

設計、大堂、服務 

酒店的設計走日式古樸風格,深色木材為主要原料,大堂闊落。大堂除了有reception之外,還有紀念品店,可以圍坐的木枱,方便取了旅遊資料後慢慢閱讀;食飽飯嚟行下坐下都幾好。另有梳化,和免費wifi。服務方面,可能比較多外國遊客,reception的英文都算好。但始終係大型住宿,都唔可能要求貼身服務。在大堂check-in之後入內,就已經唔可以著鞋。所以旁邊有一系列的鞋櫃,每戶有一格,自行將鞋放好鎖起。行李亦係自己搞掂,唔好諗住有人服侍。大堂亦有不同size的日式家庭服,如果房間內的size唔啱,可以自己嚟換。

泊車,有立體停車場,每晚¥800到翌日中午十二時。事關我哋打算兩點幾先走,所以要加錢¥600多泊兩個鐘。停車場旁邊有雨傘,落雨天可以借用。

酒店的外觀,大門和亭台樓閣。

足湯是免費的,不是住客也可使用。還有立體停車場,每次用都好驚撞死個阿叔。。。

過咗reception便不能穿鞋,貴客需自行放鞋入指定的鞋櫃,好似骨灰龕。。。啋~
而且鎖匙扣是用日文字做記號,完全唔識日文的話,要搵番自己個鞋櫃可能有啲挑戰性。

Reception,紀念品店,和大家可以閒坐的空間。張木枱,幾靚。
落地窗旁邊還有梳化。
有飛驒公仔做佈景,食飽冇嘢做,梗係影相啦。


房間

我們訂的是可睡三人、用上Simmons床褥、有32.4平米的Deluxe Twin。雖然話有咁大,但連同又梳化又茶几,加上我們三隻喼,就唔稱得上好闊落,但都ok。若然一pair人來住,就應該幾舒服。至於張床,可能屋企瞓開Simmons,又唔覺得特別好或者唔好。所以結論係,大家未必需要訂呢隻房啦。浴室、廁所、洗手盆係三個分開的空間,三個人同時間用都無問題;只係個浴室我哋無用過(有溫泉嘛)。另外有少少大意的是,茶几上有日式甜點,但只係提供咗兩塊,難道想我哋三個人爭食?

簡潔到冇嘢的走廊,入房有個sink盤的通道和兩張床。

客廳,三個人住,啱啱好咁啦。

浴室範圍,一個空間,左邊係廁所,中間係洗手區,右邊係浴室。
其實我覺得地方可以細啲囉,咁個廳同床位會闊落啲。

窗外的街景,和膳食券。

溫泉

溫泉酒店,基本上都會有大浴場,不過我們沒有機會去。一來時間不多,二來酒店是附有三個免費貸切風呂的!素來貸切風呂(即公家溫泉但某段時間可以私有化),都要額外收費,或包含在房間收費上。但這家酒店,三間貸切風呂是完全免費的,只要沒有其他住客,你便可以使用。風呂外的排隊指引清晰,地方闊落,又有電視睇。當日傍晚六七點,只有一間被佔用。我們三人剛好用兩間,一流!浸完暖笠笠,可以拎支貌似益力多的冰鎮蘋果汁飲,一支唔夠飲夠十支都得。

如果閣下係純粹路過並非住客,都可以享用酒店的足湯。足湯設於酒店外,貼近行人路,方便大家路過浸一浸,舒緩一下。環境唔錯㗎,等火車冇嘢做,都可以過來浸浸。

溫泉樓層,沿用返lobby的木製大枱,有大浴場的女湯和男湯。

嘿嘿,有貸切風呂,就梗係試咗先啦。
門口有三間貸切的簡介,只要間房的木牌係「空」便可使用。
使用時將木牌反轉便可。如果三間房都有人,就按房間名字,坐低等等好喇。
我們三個人分別用了枝垂和東錦。

其中最大間的係東錦,可以四人共用。

雖然已經係三月,但天氣都係得三兩度。所以雪雪聲沖完身,望住夜景、頭頂出住煙咁浸一個溫泉,實在唔錯。

正呀!暖笠笠出來,有冰鎮蘋果汁飲(雖然佢話自己係乳酸)。

鍾意可以慢慢坐,不過我哋夠鐘去食飯嚕。

膳食

我們選的房間套餐包含早晚餐,在大堂的餐廳內進食。晚餐分開兩節,第一節5:30pm,第二節8:00pm。鑑於我們到步已經六點,第一節用膳已經滿座,只能等8:00pm的。在多款住宿套餐當中,選了有飛騨牛的Shabu Shabu。一般旅客多會選有飛騨牛的,分別只是Shabu Shabu還是鐵板煮理。當然,沒有飛騨牛的晚餐會平一截。主菜以外,還有自助餐部份,可以自行添加涼菜和生果甜品;即係semi-buffet。加飲品的話,就要額外收費。

早餐則沒有分時段,全自助形式。不過為免大家行開行埋,比其他人誤坐閣下的位置,入座時會有紙牌一張。未食完的一面,食完的話翻去另一面。

而價錢來說,食物質素和款式算中上。不過要彈的是,我們第二節入座晚餐,之前有不少食客吃過鐵板燒,整個地方煙霧彌漫。餐廳的抽風非常差,大煙之餘亦很焗。一直等到大部份食客離開,才開始好轉;這個要扣分!

如果食唔飽,又或者太早食完晚飯有啲餓,可以去二樓揾師傅整過拉麵過你吔。雖然唔係大魚大肉,但即叫即整,夜夜地填吓肚確係唔錯。關鍵係就腳,同免費。

是晚的Menu,直線右邊係端上枱的,左邊係buffet類。

buffet的漬物食就唔多啱小蟲食,都係顧掂自己盤前菜(左上)算啦。

主菜係飛騨牛しゃぶしゃぶ,和火鍋材料。前一晚食完若狹牛,個人覺得飛騨牛好味啲。

其實,小蟲覺得套衫有啲監犯feel,你話似唔似等派飯。
Any肥,呢啲係早餐buffet,係呀,有現成燒烤㗎,仲有當地出名的扑葉味噌。

始終酒店規模唔細,所以餐廳的地方頗大,坐滿人其實都幾嘈。
好喇,宵夜時間。先去櫃位,說好要的碗數,取過號碼牌,等叫就得架啦。
就我哋睇,食嘅人都唔多,大概只有六七個人。
雖然份量唔多,但真係食得晒先好嗌呀。

價錢

日本的酒店住宿多以人頭價計算,付款或訂房時請留意清楚。套餐價錢的分別只是在於(1)膳食的豐儉(2)房間種類和大小(3)有否包括額外活動,如貸切風呂、K房、桌球等玩兒。

以下是我們的住宿詳情

酒店名稱:飛騨花里の湯 高山桜庵
地區:岐阜県高山市
訂房方法:Jalan.net
住宿計劃:飛騨牛しゃぶしゃぶ遊膳&旬菜バイキング
房間種類:【3室限定】シモンズ製ベッド使用DXツイン◆…32.4㎡
入住日期:2014.03.12
入住人數:3
房間總價:¥39,000 (~HKD3000)
人均價錢:¥13,000 (~HKD1000)
停車場:¥800一晚

總評

其實選這家酒店的話,期望要合理。應該當佢係連鎖式酒店,而不是精緻傳統溫泉酒店。如果你希望有貼身的服侍,又或者有特色設計,這家酒店並不適合你。但想平平地,有免費貸切溫泉任浸,免費蘋果汁任飲,有飛騨牛食,又有semi-buffet形式的晚餐,仲有免費宵夜食,而且近火車站的話,呢間就啱晒你嘞。如果咁樣都嫌唔夠?哦~咁你都係留返享屋企啱啲。

下一篇:可能冇乜人啱睇嘅名古屋女子馬拉松!

 2014 日本中部。名古屋初馬《行程總覽、遊記Index》




13 comments:

  1. 係囉,點解大家著一樣衫去攞飯。。。唔著自己的便服?!

    ReplyDelete
    Replies
    1. ehhh...你呢個問題相當好。去到溫泉酒店,好似著返浴衣會投入啲啩。。。

      Delete
  2. 剛剛另一blog友都寫過呢間,正反兩面意見都有喇。

    ReplyDelete
    Replies
    1. 喺?介唔介意俾條Link來望下?
      呢個價錢同呢隻運作模式,我自己就冇乜期望。^_^

      Delete
    2. 其實又不算是“反“,郭太只是覺得夕食一般。
      http://hitomi-kong.blogspot.hk/2014/07/day-57.html
      http://hitomi-kong.blogspot.hk/2014/07/day-56.html
      http://hitomi-kong.blogspot.hk/2014/07/day-55.html

      我覺得hotespa group一定唔會差,而且呢間價錢唔錯,如果我去都會住。
      呢個價係北海道,同一集團酒店只可以一泊朝食。

      Delete
    3. 咁我都好認同夕食只屬一般,不過同價錢成正比咁啦。 :)

      Delete
  3. 呢間溫泉酒店除左外貎同房較現代化之外, 其他都有日式feel丫... D食物都好唔錯咁喎...

    ReplyDelete
    Replies
    1. 係呀,間房係洋式,其他都係日式;算好抵玩。

      Delete
  4. 溫泉酒店+現代化房好特別,13,000yen絕對冇得輸喎
    但係...d牛係咪就係得相o個幾塊?

    ReplyDelete
    Replies
    1. 哈哈,係呀,真係得個四塊㗎咋。不過有盤雜菜芋絲咁,爬埋飯我就夠飽嘅。唔夠去食宵夜 :P

      Delete
  5. 有咁多著數免費野提供,咁1000蚊晚真係幾抵呢

    ReplyDelete
  6. 這溫泉酒店真係超正啊!

    ReplyDelete

到此一遊,留個字啊~

Related Posts Plugin for WordPress, Blogger...