2011 EATaly ♣ {Alba White Truffle Fair} 闖入中世紀

 用禾乾草圍個圈，內裡有人拎酒出嚟。猜一種遊戲，最下面開估。
 

2011秋意狂嚐 EATaly ♣ 速查目錄


2011.10.16 (Sun)

{Alba International White Truffle Fair  官方網頁}
離開了Palatartufo場館，出外走走。一出去，已經踏入The Boroughs Remember這個中世紀的festival。看見不少攤位，由穿著傳統服飾的男女老幼睇檔。玩的吃的，路過的叫囂的，好不熱鬧。
真係埋嚟睇，埋嚟玩啦喂～
有推鉛球掟雞蛋

千里眼飛鏢中香腸

一蚊三次機會，中一次有神秘獎，中兩次以上先有條salami。出面檔攤賣緊五蚊三條salami，除咗証明自己的能力外，實在無原因唔出去買囉。

還有閃電手鎚合桃全部都係鬥力多過鬥智的傳統遊戲。

除咗玩，仲有得聽故仔。嘗試企咗三分鐘，但估唔到佢講乜，都係頂唔住走人。

通處都係一檔二檔。

賣酒嘅都著成咁。只不過佢令人聯想到Harry Potter....

行刑中。。。非也，都係裝扮嚟吸引人玩遊戲啫。

整個鎮當日都相當多人，享香港內地就話迫慣啫；哩到都可以話係去過最迫人的歐洲城市。有啲檔攤同年宵一樣，迫都迫唔到埋去。

煮大鑊飯的亞叔。以為係粟米羹，但看來非常黏。

無啦啦個街角玩武大旗，大家圍觀塞實晒條路。小蟲生得矮睇唔到（但起碼六尺八先睇到囉），唯有舉起個DC影幾張相就算。所以幾時有大有細（機）就實無走雞。
之後亂咁行就去咗Truffle Street Market，其實係露天檔攤，賣嘅都係啲local product例如Truffle呀，cheese呀，salami咁。就喺哩檔試食完，買咗十蚊salame，有兩串（六條）。好抵呀！仲有埋個豬頭比你睇。


好！開估返頂頭的問題，究竟玩咩呢？。。。。。。。。。。。。。。。。。。。。。。。。。。
就係釣酒樽！


遊戲好簡單，比錢後等齊人埋位。大家同一時間開始釣，限時（大概三幾分鐘啦）將長木條末端的勾，勾中綁在酒樽頸上的小圈圈，拎起支酒就係你架啦。每次大概十來個人玩，都有人釣到架。點都易過飛salami或掟雞蛋呱～

行兩行，有檔仲大，簡直係萬人釣酒。無萬人都有四五十人一齊垂釣，都幾壯觀。不過小蟲覺得哩檔難啲，因為佢唔用勾，木棍的末端係用圈圈。而圈圈係垂直的，要將佢套入樽頸比較難呢。套到入去就算贏。


2011秋意狂嚐 EATaly ♣ 速查目錄