情人節前的晚餐

{ 2012.02.11 Sat }

個標題都無誤導的，但凡在情人節前的晚餐，都可以稱得上是情人節前的晚餐；但，這個晚餐絕無慶祝情人節之意（皆因小蟲和蟲老公都覺得無慶祝的需要），只是上星期小蟲忽然想去Food Depot入貨，又見有一段時間無下廚，就身痕打算周末整整西餐。

這次除了例牌的意粉（佢哋終於入咗Penne），逛多個圈看看有甚麼適合懶蟲去煮。隨口問問有無青口（就咁白酒煮好易啫，小蟲諗），店員介紹一大包和食法。這包加拿大的青口，已經煮熟，可以當冷盆或熱食皆可。不過店員說可以落忌廉和白酒，整法式的。那，就順手執多盒忌廉。店員更說除了這款熟青口，逢星期五會返新鮮的青口（雪藏），之後可以試試。
然後諗諗個意粉的配菜，發覺豬肉腸仔也不錯，就來包英國蜜糖腸。

開工先～

✿ 法式忌廉燴青口 ✿

1. 先準備洋蔥一個，切絲。
2. 再隨個人口味將適量蒜頭切粒
3. 將蒜粒和洋蔥絲落鑊爆香
4. 加入一盒忌廉和適量白酒。（不過小蟲無放白酒，費時開咗煮完飲唔晒）
5. 再將青口（無需解凍）落鑊翻熱。因為青口已經煮熟，所以袋內的雪水也可以用。

咁就食得啦～～



另外行開Sogo，買了荷蘭連枝車厘茄，好靚；不過成$38，用來做意粉伴碟。

✿ 辣椒蒜片扁意粉配蜜糖腸 ✿

1. 先將腸仔入焗爐烤至微燶備用。
2. 與之同時煮熟意粉備用。
3. 將適量蒜頭切片，和一隻辣椒剪圈
（可先除去辣椒銀，放入溫水浸泡使其軟化，方便剪圈）
4. 用橄欖油起鑊，份量要足夠覆蓋蒜片。
5. 放入蒜片直至微金黃，撈起蒜片。
6. 將意粉放入剛才炸蒜片的油翻熱，加入約一殼的高湯，和辣椒圈。 落鹽調味和拌勻。
7. 上碟，加入蒜片、車厘茄和蜜糖腸伴碟。最後灑上香草。

眨下眼就有餐食啦～




在Sogo一次買埋法包和龍島的芒果拿破崙蛋糕做甜品。
本來條法包打算搽牛油，後來乜鬼都唔洗搽，單是沾青口個汁已經食到lem lem俐！
新年前買了新的咖啡用具，自己飲過但還未沖過比蟲老公飲。
最後加杯埋即磨手沖咖啡，食件cake，真係快活無比～～

價錢又唔貴
加拿大藍殼青口一包約950gram - ＄57
義大利意粉170gram - ＄5
英國蜜糖豬肉腸半盒（三條）- ＄24
荷蘭車厘茄約100gram - ＄12
香港法包 - ＄12
香港芒果拿破崙蛋糕半個 - ＄75

連埋辣椒蒜頭(香港)咖啡粉(巴布亞新幾內亞)，一人都係一舊水。