回應：旅行的問題及習慣

香港確實是個令人忙碌不堪的城市，發覺就算再勤力，亦只可以維持三四日先blog一blog。想追吓blog友的文章，都要花啲時間，比啲時間，小蟲努力緊呀～

見Dennis最近的post問了好些旅行相關的問題，頗為有趣。本來想直接回應，但覺得自己有些（只是有些？）長氣，而且未準備好繼續寫遊記，所以開一篇來回應兼間場。

好～ 故且看看小蟲和大家對旅遊有乜睇法。

1) 喜歡有既定的行程，還是真的「自由」行？
以前會plan得足啲，宜家少好多。最多都係決定去邊幾個城市，中間的connection，預每個地方去幾多日。其他如搭咩車，去邊度行，食乜野，就去到先搵先算。住宿就一頭一尾嗰日就一定會訂定，其餘就視乎出發前有無心機同時間去訂。當然，如果風險比較大的地方，就會plan得足啲。

 2) 出發前會做budget嗎？
都係以前會，宜家少好多。心目中大概有個數，旅途上應洗則洗，唔會特別慳，又唔會特別奢侈。小蟲唔係太鍾意買埋啲無謂野，情願食咗佢好過，所以齋食住行其實有個譜。 旅途中小蟲會日日記數，返到屋企做個summary，得個知字；對於下個旅程，係無參考作用的。

 3) 會帶多少衫呢？
小蟲去五日同去廿幾日的衫都係差不多，分別只係一個trip途中經過的季節會唔會不一樣，就帶唔同季節的衫旁身（真係好麻煩）。如果可以，就盡量帶啲可以mix-n-match的衫，影相無咁悶（但其實宜家好少入鏡）。去得耐就更加要travel light，越少野越好。最憎拉個大／重行李，「論論盡盡」咁。所以一定唔會日日唔同衫，情願去到洗衫。

 4) 會帶香港的食品過去嗎？
會帶沖劑，主要係消熱氣和飲品。例如竹蔗茅根，夏桑菊，好立克咁。其他就好少帶。

 5) 會帶多少對鞋呢？
出街鞋就一定著一對，帶一對後備或替換。如果日數少，就會搏一搏齋著一對。另外一定自備拖鞋。

 6) 睡覺會開燈嗎？
多數唔著燈，因為好怕撐眼。不過屋企人有時會開廁所燈但掩門，有條光罅。小蟲都唔反對。

 7) 會玩得天昏地暗、睡得日上三竿嗎？
懶蟲和旅伴都唔怕夜，但怕早起。如果要跟local tour或者趕車趕飛機無得揀就無辦法，但一般都唔會早。無野趕的話，一定較到住宿早餐時間的最後一刻才出去食。

 8) 會換銀包嗎？
視乎地點。如果安全的，就唔換。危險的就換個核凸銀包。

 9) 會帶飾物嗎？
都係視乎地點。如果安全的，會帶啲小飾物（小蟲都無乜誇張野）。危險的話就一啲都唔帶。

 10) 會帶甚麼類型的底底呢？舊的？新的？紙的即棄？還是綿的即棄？
以前會準備定啲舊嘅去用完掉，但搞搞吓邊有咁多舊野？平時用開乜，就會帶乜，要洗就洗。