周遊下一站 之《屎波架撐多》

周遊下一站 之《屎波架撐多》


小蟲一向喜歡四五月，或者九月十月去旅行，貪天氣比較舒服。但可惜今年後半年，蟲老公忙得要命，最快都要十二月先請到假。之於地點，出名大食懶的小蟲，首選行行企企有啖好食嘅發達國家。不過十二月好多地方都已經好凍，所以考慮吓其他啲比較另類的地方。蟲老公的探索性比小蟲強得多，去過摩洛哥、柬埔寨、內地偏遠地區嘅佢，哩啲先叫有趣味； 正常小蟲聽見哩類地方肯定洒手拎頭。但自從今年希望積極擴充版圖、和去完南美之後，有機會都想見識多啲唔同嘅嘢。所以，唔再侷限自己，向不同地區進發。


目的地，唔特別講，亦唔叫大家估了。有以下幾個point，大家都應該心中有數。
（1）要簽証（特區、美加、澳紐等等都要，只有鄰近友好國家唔洗）
（2）有時差
（3）屬貧窮國
（4）聖誕前後，完全唔需要擔心無機票，因為無乜香港人去。
（5）出名活動：登山。一講哩點，好難估唔到。

哩個旅程會去廿日，本來一大半用嚟觀光，然後用三五日去行吓山。但蟲老公有位愛好登山嘅同事，去過嗰邊好幾次，推薦咗條平均要行17-21日嘅路線。哩條線嘅特色，係路途上會見到唔同的大自然風景，和唔同的部落族裔。諗諗吓，覺得原先計劃用15日去觀光，都係可能太多有啲悶；於是，無耐就好壯舉地決定成個trip都用嚟行山。

決定咗之後，有兩方面要準備。一係體能，二係用品。體能方面雖然沒有特色要求，但為了自己好過啲，可以享受途中嘅樂趣，所以事前都行多咗山。加上平時秋冬嘅跑季練習，絕對唔應該行兩行就發軟蹄。不過沿途會上高山，哩點就無乜可能訓練得到。（根據科學研究講，適應高山的能力同體能係完全無關）所以都係買定啲藥，同慢慢行就算。反正我哋又唔諗住完全咩攀登創舉，而且有兩日係buffer，所以無壓力。

但，不竟行山唔係我哋嘅強項，而且今次嘅玩法同之前旅行完全唔一樣，所以額外買多好多用具。小蟲都係近幾個月先知有句俗語叫：屎波架撐多，泛指技術唔多掂、要揾用具嚟補救的人或者情況。哩句嘢用享今個trip就特別貼題；小蟲絕對唔介意認屎波，有過多嘅自知之明總比死享自己手上好。

例如有乜？基本上成身嘅裝束要買過。香港行山，除非特別講究，如果唔係一般嘅運動服裝都ok。但連續行咁多日山，就要講究啲，而且由暖到凍的天氣都有，又要double up。鞋就不在話下，其他好似有排汗防臭防晒嘅base layer衫褲，防水行山褲，連著七日唔洗都唔會臭、仲識恆溫嘅羊毛行山襪（上山後比較落後，分分鐘無電、無熱水沖涼），用嚟零晨攻頂用嘅頭燈，一孖行山杖，大背囊，寄倉袋，真係乜都有。好彩防水shell，抓毛衫，薄羽絨都已經有，唔洗買。其他內膽手襪、防水外罩手襪就問人借。仲有重型冷帽，睡袋等就會去到先買或者租。旅費唔算貴，但事前準備買嘅用品史無前例咁多。仲要唔敢買平嘢，驚質素唔得。買完仲要試，確保運作暢順，個過程真係唔懶得。


要買要試都無問題，最煩係要將所有嘢塞入個背囊。搞咗一輪，終於將廿日要用嘅嘢塞晒入個45L嘅大背囊，同30L嘅day-pack。然後，宜家就出發啦～

跟之前一樣，外出其間唔會update個blog啦。有機會就update個FB page，不過上山後就一定無得上網啦（有無電都成問題。。。）。再會～