《打開扇窗有點迫》 @ The French Window

2013.05.19 (Sunday) 13:00 - 17:00

時間過得飛快，上一次跟「食好嘢」兵團搵食已經是上年九月去希戈的事。其間無人出聲，亦無得閒搞，但一開口講出「想食好嘢」這句的暗語，大家即刻好似上身咁點頭，咁。。。咪搞囉。事隔大半年，之前的research要更新一下，不過正在頭痛應該提議哪間之際，見雜誌介紹法國窗。



吸引小蟲眼球的，並不是食物或環境，而是由朝12到晚9都有得食！！！這九個小時，入座後四小時內可享用，真係最啱hea食。而且連香檳的價錢亦不算貴，跟坊間其他連香檳brunch稍稍便宜一點。大家無反對的情況底下，就去訂位。。。

訂位

老實講，這個環節實在扣了不少分。

我們一行confirmed有七人，為了坐得舒適一點便訂八位，亦方便中途有家眷加入。打電話訂位，一般訂位的過程，問日子時間人數等，到最最最最後接線生才問可否留電郵。小蟲問何解要電郵，接線生才說訂八位是要留信用卡資料，若然no show的話會扣錢。

於是小蟲問：咁七位係咪唔洗留信用卡？
接線生：係。。。
小蟲：咁你幫我改七位
接線生：呀，咁呀。。。但係如果七位的話，到時想加位未必做到㗎喎。
小蟲：唔緊要，就七位啦。（心諗，你張咩檯呀？真係齋坐到七人？）

其實人數多或較高檔的餐廳要落訂，是很平常的做法。但唔老黎嘅係，你唔早講？我就偏唔留吖！

環境

位於IFC商場三樓，跟國金軒為鄰，但直入大走廊，轉兩轉才到達reception位置。裝潢當然是走格調路線，用上煲煲撐撐做吊燈，也是個特色。



入到去已經有人到咗，坐低發覺，原來個接線生真係無講笑，張枱真係只坐得七個人。我們的位置靠半落地窗，用兩張正方枱拍埋，一邊是窗邊，另一邊的路口位是主席位，然後餘下每邊坐三個人。小蟲剛剛坐在枱罅中間，初初只是有點點擠迫，但後來見別的食客同樣用兩張正方枱卻只坐五人，不禁認為這間餐廳的做法真小家。多給一張枱，正正常常的放七人位也不行？難度真的很需要多做一張枱的生意？

幸好我們身型纖瘦，但餐具擠得一枱也是。。。


正常IFC對出的景觀，是日正值好天氣，感覺爽朗。
可惜黃亞鴨驗身當中，要不然這個位置都能看見。加上工程進行中，那條吊臂有礙觀瞻。



餐廳的規模比想像中細，而且擺位亦不見得闊落，想多點點空間的話，這裡不是一個好選擇。

其間遇見了隱隱的一條彩虹。

飲食

好～彈完環境，就來說說食物。屬於半自助餐，頭盤甜品芝士等是自助形式，再加個自選主菜、咖啡或茶。四小時，有大把時間慢慢食。



照片不是拍得很足，唯有口述好了。頭盤的選擇還算不錯，沙律、cold cut、蔬菜、海鮮都一應俱全。沙律有基本醬汁類，或調好味的。海鮮有蠔、蟹腳、龍蝦仔、三文魚等等。本人對海鮮類興趣不大，所以沒有多加留意。之於salami和prosciutto不錯，喜歡三款salami均有的油甘香，特別是其中一款的辣味道。



在餐牌沒有說明的熱前菜，自動上枱，有帶子和三文魚醬（？）。



然後還有cheese trolley，麵包cracker梗不少得，但比較特別的是有師父即製Raclette。烘熱芝士，加上酸青瓜和小薯，灑上黑胡椒上碟，彷彿沒有甚麼技巧，但重要的是芝士的濃度剛好。味道淡的話，吃起來相當無癮，但過濃又不太合襯；質感亦相當creamy。



單是吃buffet已經差不多兩小時，還要先吃罷甜品才點主菜。吃完主菜，再翻兜甜品，加杯餐後飲品，這才稱得上是用餐。來來來～主菜有五款選擇，一樣一碟，意粉和牛排多一份，然後。。。share！

個人比較欣賞條sea bream fillet，其他的尚好，質素算平均。要評的話，可能是海鮮湯有點點苦味，和medium rare的牛排是太熟了。份量適中，只是牛排以連buffet的主菜來說大份了點點。我們七人分享，每樣試少少剛好，最後吃剩些少意粉。



甜甜甜品方面，除了雪糕之外，全部也是bite size。好處是能試多款，不會太浪費，但口感則有點打折扣。吃蛋糕，能享受切下去的那一下是頗為重要的。但也沒所謂了，整體做得精緻，味道甚佳。雪糕有香蕉雪糕和芒果（？）雪葩，只屬一般，絕對不能跟grand hyatt的高層次雪糕比。

即場製作的有crepes，取一份回來大家試少少，又剛好。




最後的咖啡或茶，相信也是無限添飲，奈何肚皮空間有限，喝個double espresso消消滯好了。

服務

雖然說不上是話頭醒尾，但態度良好，只是有些細節可以做得更好。例如添橙汁失手，倒到出晒杯。我們真的吃得不算快，但拾碟的速度居然跟不上我們吃的速度，經常有吉碟滯留在枱上。另外甜品區的細瓷羹總是供不應求，出去十次有九次是沒有的，要問才有。最後埋單，七人當中有兩人只飲果汁類，但結數全部七位也是計上酒精類價錢。

加上訂枱事件和座位安排，其實感覺真係麻麻。

總結

嚴格來說，這裡的brunch除了時間長，由朝食到晚之外，其實完全沒有過人之處。食物質素做得平均，環境還算不錯，服務麻麻；比起Hugo（除主菜外）或Ozone還差幾班。在今時今日要吸引大家來高消費一番兼有回頭，恐怕要加多錢工夫才行。

資料

The French Window: 官方網頁
Hugo和Ozone的食記：《希戈大戰臭氧吧》