19 June 2013

瘋狂密室。逃脫大比拼!

身處於密室之內,在有限時間尋找提示解開迷題,從而離開密室。這種以第一身的鬥智遊戲,近年引入香港後便流行起來。早些日子見有團購,價錢合理趣趣哋當減壓活動,組織同事們一同放工前去試玩。怎料,一玩不能自拔,玩完一次又一次又一次又一次。。。(仲要次次都係團購)。到今時今日為止,前後試過四間不同的密室逃脫公司。見感覺和經驗略有不同,而大家真金白銀(即係無團購)要揀間啱嘅嚟玩的話確實有點難度;於是決定寫篇比較文給大家參考。生活苦悶的朋友,可以約埋幾位同你一樣苦悶的朋友去解吓題。

聲明:內文絕不涉及任何迷題內容的,大可放心閱讀,絕不會影響你將來玩樂的娛樂性。及,純粹個人觀感,及按參加的個別房間而評,並不代表公司的所有房間。

點玩:請留心聽書,再睇一次本文的頭三句句子。

適合之人士:沒有幽閉恐懼症、不怕動腦筋、覺得生活悶悶哋


一般流程:網上預約>約定時間早十至十五分鐘到達>填登記表(其實係免責或保密協議)>存放手袋或雜物>職員講解>入房被鎖>好忙咁解題>自己出嚟或被放嚟

不如先來個圖表比較一下,再解說多點。




訂位及接待


全部有網上預約(無的話我們根本不會考慮),在網頁揀分店(有的話)揀房間揀日期,即時知道房間狀態。當日最好早十分鐘去到,存放隨身物品。職員會有講解,例如故事背景(純粹令大家投入啲)、注意事項(有啲咩係唔郁得或對解謎無用)等等。若然以這個部份來說,幾間公司都差不多。職員大多是年輕人,HK Escape的略為年長,所以應對、中途比提示和講解方面比較成熟有系統;The Truth亦不錯。Freeing HK的則非常年輕和green,但勝在有禮搭夠。Amaze60的特別低分,之後會有交代原因。

房間設計和空間感

有了比較,才知道原來Freeing HK的房間屬於非常大。小蟲對空間的面積沒研究,說不出大概的尺數。這樣說吧,若然Amaze60的最小,那Freeing HK的有三間Amaze60的般大。亦是唯一一間進出門口不同的(其他全是同一個房門出入)。當然,同一間公司不同主題的房間,大小亦有所不同。設計方面,撇下謎題的考慮,Freeing HK和The Truth的比較落心思,用的道具款式較多和佈置特別。

謎題設計

其實說到尾,最重要還是謎題的難度和娛樂性。出題出得差,就神仙難救。一般來說,由頭到尾大概有七至九個(其實無數過,都話大概咯)謎題要解,才能逃出。其中,一定有開密碼鎖這個環節;分別在於多少,和中間會否夾雜其他有趣的謎題。比較悶的,可能只是不斷解數字題入密碼。做得好的,會有其他視覺或推理題。當然,推理題本身亦有高低手之分。

Amaze60被劣評,最主要是出題的人想得過於複雜。在大概七八個謎題當中,我們只能解開兩個,其中一個更是撞出來的。當然,無理由自己解不到題,便劣評人家出題差吧。理由是,(1)其中一個謎題解不開,部份原因是道具有所損壞,正常人根本無辦法利用來想出提示。(2)職員前來幫忙亦解釋得不明不白,說完還是要再問。(3)到中段已經喪失興趣,最後放棄讓職員解釋,其中一題根本連他自己都解不來!勉強解釋過的謎題,更是複雜無比。究竟有無人成功逃出過呢?!

鬧完一輪,說說做得好的HK Escape和The Truth。題目的花款較多之餘,明顯有花過心思;而且跟房間的主題貼近。有挑戰性得來,又不失成功感。不是說成功逃出才是設計好,而是解題過程的娛樂性亦非常重要。如Freeing HK,就算第一次玩失敗,還是覺得挺不錯的。

總評

以翻兜指數來說,The Truth稍稍勝HK Escape,跟着的Freeing HK亦不錯,絕對可以翻兜。碰上團購繼續有The Truth,所以。。。下星期我們又再去啦!!!哈哈哈哈~~~哈哈~~(回音中)

17 comments:

  1. 哈哈...好似幾好玩咁喎...

    ReplyDelete
  2. 我勁鍾意玩escape game架!但應該冇人會陪我玩呢個真實版囉...
    呢D真實密室會唔會好恐怖架?

    ReplyDelete
    Replies
    1. 點解呀?實有啲朋友心思思想玩㗎喎,問吓啦。有啲密室會整到陰陰暗暗,但其實唔算好恐怖嘅。

      Delete
  3. 我一向有少少幽閉恐懼症,一定唔可以玩呢D.....

    ReplyDelete
    Replies
    1. 咁就少少可惜啦,因為真係幾好玩。

      Delete
    2. 我都係有少少幽閉恐懼症,平時睇戲睇得耐都會唔安樂,但係玩呢個又ok喎~ 最緊要係keep住有野俾我做,就無太大俾人困住嘅感覺。

      Delete
    3. 過程都好occupy,所以應該唔洗擔心被困的感覺。不過有啲公司啲房大啲,有啲細啲,都會有差別。

      Delete
  4. 其實Amaze60 好好玩. 你可以試下第2間房~好特別架

    ReplyDelete
  5. 前幾日玩左The Truth 既科學實驗室同405室,感覺都唔錯!科學實驗室感覺有d地方略為複雜(但另一方面睇謎題同道具都設計得幾有心思),尤其我地唔小心打開左一個理應係尾二先要開既箱(聲振個o個)搞到亂曬方向。然後又玩左另一個405室,呢個就算簡單少少,我地亦成功破謎。綜合黎講印象都幾好,職員都好好人。
    (小友)

    ReplyDelete
    Replies
    1. hehe,我已經玩埋地理室啦,不過有啲蝦碌。玩無耐已經唔覺意搵到條最終門匙 =.="

      Delete
  6. 小蟲, 我同朋友去玩左 Freeing HK - 尖沙咀的 環遊世界, 幾好玩喎 !
    我地都打算再去試另一個場 !

    ReplyDelete
  7. 你好啊。
    我咁啱見到你個blog 講密室路過(*^o^*)
    咁the truth 值得去嗎?
    你們講到冇啦啦會撞開d野咁既?
    我有朋友去旺角freeing hk話唔麻麻地。又貴=.=
    都唔知玩邊間好。

    ReplyDelete
    Replies
    1. Hello~ 其實正價的話,我哋都未必會玩。或者你可以留意吓團購,平平哋搵間試吓個feel先。我哋覺得The Truth唔錯,四間房都玩咗三間。不過都好睇你本身的興趣,例如我係理科人,覺得科學室好玩過403號班房。好唔好玩,都有少少睇個人。 ^,^

      Delete
  8. 多謝分享 :D
    更多香港密室逃脫資料同玩評:http://goo.gl/zKqhv3

    ReplyDelete

到此一遊,留個字啊~

Related Posts Plugin for WordPress, Blogger...