2012阿根廷：Day 12 Ushuaia《4WD秘景燒烤樂》

2012 April  匯率: 1 ARS = ~1.7 HKD

DAY 12 - 2012.04.16 (Mon)


Argentina 【 Buenos Aires ＞ Puerto Iguazú ＞ Mendoza ＞ Ushuaia ＞ El Calafate ＞ Buenos Aires 】＞ Peru


Ushuaia的戶外活動較多，除了最受歡迎的船河和企鵝（又幾押韻喎），"The end of the world train"火車遊都頗熱門；其次就是湖江山色，再其次才是鎮內的博物館。留在這裡有兩整天，加兩個半天，時間充裕。經過第一天的正常行程，我們決定刺激一下。在屋主的一堆單張裡面取了靈感，再到tripadvisor看看評價，就着屋主替我們訂了四驅車off road遊。當然不是自駕啦，自己off road肯定迷路「嚇」死異鄉。

本想參加當時在tripadvisor頭位的Tierra Turismo，但星期一無團出，就揾另一間叫Canal Fun的打去留位，今朝8:55在民宿門口pickup（雖然遲到），方便到極。前來接載的四驅車內，有導遊兩位：德國人Freddy和阿根廷人Walter，操流利英語。接了我們之後，再多接三個客人便出發。先用一小時多到郊野地區，駛落一個湖遊覽。可能你會問：「咁有咩咁特別？」特別在於，落湖是無。車。路。的。靠的是四驅車在荒山野嶺求其衝落山，當日還非常大霧，左遙右擺大家搖骰子般，非常刺激搞笑。這團做得不錯的地方是，有刺激之餘，亦有充分時間給大家欣賞環境。他們會在離湖邊約十分鐘路程放下我們，然後駕車到湖邊等候。那我們便有時間慢步大自然，拍照和呼吸一下深秋的氣味。四周的寧靜，彷彿時間停頓一樣。

遊覽之後，繼續前往另一個湖：Lake Fagnano，道路越見崎嶇。再停一站落車影相，便跟另外三位旅客交換座位，好讓大家有機會感受一下不同的顛簸。事關四驅車除了車頭兩個位，接着有一排三個向車頭的座位，再後面便是面對面的側面位；所以觸感截然不同。換位之後更覺好玩，屁股絕大部份時間也不能貼在座位上！

接着便是開餐時間。安排跟之前差不多，預先放下我們。這次步行比較遠，讓他們有足夠時間準備BBQ午餐。嘩！還未行到，已經聞到燒烤的香味。躲在小屋子內，避寒加等食，風味一流～而且估不到的好準備，和好質素。有零食、沙律、面包、烤腸面包、牛扒，有紅酒有咖啡，還有甜品brownie！！除了牛扒略韌，所有食物都好好味～

食完飯，鍊多轉就全速回程，走國道三號。導遊說此路能一路直通阿拉斯加；有人用四年有頭玩到落尾。中途亦看見Beavers damp，這些河狸由加拿大引入，貪其毛髮值錢。但這裡沒有加拿大寒冷，毛質亦不夠好。於是便任由它們自由生長，但生態系統沒有它們的捕食者，所以繁殖得太多，在大量吃樹木的情況下令到不少樹木死亡。這亦解釋了為何沿途看見很多像枯萎的一堆堆樹枝。

好了，來到這裡，你又可能回問：「咁哩個團即係有乜好玩啫？咪又係「噢」（搖）一輪、睇風景？」這個形容也沒有錯，但實際上是兩位導遊非常懂得搞氣氛，例如無人駕駛（真係揸揸吓出咗去，由架車自由前行。當然，是有計劃地的），製造緊張氣氛，開玩笑等等；務求令大家賓至如歸。價錢雖然不便宜，但包玩包睇包餐食，絕對抵玩。

公司資料：Canal Fun
團費：每人ARS 480
遊覽時間：約六小時多啲。開波時在市區先停一站小解，之後完全是天然廁所。

尋日去完Martillo企鵝島，今日上去睇湖泊。

四驅車面面睇，車頂的膠箱，就是我們的午餐。接送直達民宿門口，方便到爆。

第一站，霧裡看花的湖泊。雖說好天氣風景美，但陰天大霧更有feel。
視野能見度，不足卅米，兼無車路。

真係靚到嘩嘩聲，破壞晒大自然的寧靜。
導遊放低我哋慢慢睇，就渣咗架車落去湖邊等我哋。放大幅圖的話，會見到架四驅已經落咗去。

掛住睇，唔肯走。

自己行落去，當時小蟲仲未有行山鞋，所以一腳都係泥水。

在上面花得太多時間，落到湖邊反而唔夠時間睇。

絕對可以坐成日的湖邊。

山水畫一樣

離開剛才的湖泊，驅車登一輪去Lake Fagnano，又再放低我哋。See you later! 

今舖有埋個雪山

個雪山仲要若隱若現

行吓企吓影吓，要半個鐘先入到去。中途蟲大姐仲開心得濟，跌咗個相機都唔知。不過好彩方圓百里都無人，沿路行返出去就揾返。我哋午餐的小屋，狐狸們早已等待開餐。

溫馨小木屋，食住薯片等正餐。腸仔包同brownie最好味～

潮人整沙律，型人戶外燒牛排中。

屋外的景觀，真係似幅畫。

食飽飽，繼續上路。唔係個鏡頭扭歪咗啊，係真係斜到45度㗎。
無路唔係問題，因為咩地都照行。石呀、木呀、泥呀，無有怕。
其中一幅，正準備沖落個湖到！

回程路過Beavers Damp，有人見到beaver，小蟲就見唔到喇。
旁邊的枯樹，就是河狸做成的。
最後你可能會問，㗎四驅有幾「登」？。。。。