25 October 2013

2013 重遊塔斯曼 《Tasmania東南岸:Port Arthur 的日與夜》



2013 重遊塔斯曼 ♣ 路線 + 遊記Index 


2013 Sep 匯率: 1 AUD = ~7.3 HKD

好喇,出了幾篇澳洲遊記,但乜景點都無介紹過,好似唔係好妥。踏入Tasmania篇,先嚟一啲景點啦。比起好多自由痕,我哋真係參觀的地方唔算多。不過要一篇介紹晒,又激進咗啲,都係按地區分幾篇嚟講會易啲吸收:東南岸(哩篇同下一篇),東岸和西北岸;但都唔會個個地方都講喇。




Port Arthur Historical Site 的日與夜

出發前都有掙扎過去唔去Port Arthur,事關地點上佢零零捨捨歪埋一邊,要專登落去;加埋小蟲之前已經去過。不過考慮到佢都係塔省一個有代表性同別具歷史意義的地標,都值得比蟲老公去睇吓嘅(皇恩浩蕩tone)。


簡單來說,Port Arthur在18世紀是專門將罪犯收監的地方,有啲更遠由英國海運過嚟。有罪犯,當然就有官員同屋企人,佢哋都係要食飯要生活嘅,所以基本上就係一個社區。這裡的Historical Site開放比遊客去參觀當年遺留下來的建築物,同介紹監獄和監犯生活的資料。

我哋第一日落地就去睇,入場費有幾款,基本嘢一定有個guided tour同遊船河;但比貴啲就有埋audio guide和有餐食咁。下晝四點幾先到Port Arthur,先知原來仲有一個網頁無寫的選擇,就係Late Afternoon pass。價錢比較平$18(係日間最平pass的一半價錢!),無包guided tour和船河,而且時間有限遊到六點。我哋諗完一輪覺得太趕,就決定享Port Arthur住一晚,聽朝再嚟慢慢行。但夜晚無嘢做喎~ 咁。。。咪去join埋個7:45pm開始的ghost tour囉!仲有足夠時間比我哋享附近揾住宿、去買餸同煮餐飯食先開始個ghost tour,幾好!

原來ghost tour都真係有啲人參加喎~一團大概有廿多人,有大人有細佬,由一個guide帶住夜探遺址。無論單張或者導遊事前都有講明,哩個tour唔會有咩特技亦唔會有職員扮鬼嚇人,純粹用90分鐘帶大家去啲相傳猛鬼的地方講吓故仔。話雖如此,但中途都有少少有趣的事嘅,係乜就唔講啦。而且有咁耐歷史,故事就自然特別多。

照片無乜,因為真係好黑。至於值唔值得去,小蟲認為只要你set啱expectation,去聽吓故仔都幾有氣氛嘅,而且有幾何可以夜晚入去吖。嗰晚個天仲好清,啲星好多好近,小蟲覺得好似太空館天象廳睇片咁,而蟲老公話比佢去撒哈拉沙漠睇嘅星星更加多,真係好誇張。一見難忘,成個旅程之後見唔返啦。

如果你都係差唔多月份去(九月),天氣都幾凍,夜麻麻行成個幾鐘,記得著夠衫。自己有電筒就帶定去,雖然一團有五六盞燈,但有啲上落位都係自己照一照好,拗柴就無謂啦。

黑麻麻得咁緊要,乜都影唔到。

大部份時間會入去一啲建築物裡面,講一啲見過鬼的傳聞。哩個係The Separate Prison,都唔好話無氣氛。
參加完個團,有興趣可以拎返張有名的證書,證明你有命出返去。

去到日間,第一件事就係跟咗個guided tour先,大概需時40分鐘,之後自己再慢慢行。地方太大,所以個guided tour都係享tourist center唔太遠的三兩個地方講解吓。老實講,我哋嗰日個導遊真係一般,有少少播帶feel又唔係太起勁咁,搞到打晒喊露。景點範圍有超過30座建築,另外仲有兩個離島,一個係墳場,一個係囚禁青年罪犯的。門票已經包括30分鐘的遊船河,離遠望吓咁。當然,比多啲錢就可以包埋上島的導賞團。我哋聽完個唔太精彩的guided tour就自己行,中間食個晏,再遊個船河,再行埋個室內展覽館。天氣唔好落晒雨,但都搞到四點先走,咁又成日。日與夜加埋,應該都九成行晒。

歷史唔講咁多(因為唔記得咁多),但總括來說是值得去的。不過有心去的話,預夠時間慢慢行,同埋室外地方為主,防寒防雨防風的裝備唔少得。有的話,就好似我哋咁可以行足全日,無就掃興啲。入場費幾貴,最平都要$35,如果落雨行得少,就唔抵囉。

亞肥叔叔講解,真係有啲悶。。。

為咗防止囚犯有機會聯絡,有需要出入時都會戴返個頭套,咁就應唔到對方,連做口形都唔得。

哩個就係尋晚都有嚟嘅The Separate Prison,係一種管理囚犯的方法。每人每日廿四小時全天侯獨處,全天侯靜默,更唔會見到一個人。監官唔知個犯姓乜名乜,亦唔可以同佢哋講嘢。原意係想比佢哋自我反醒一下,但後來發覺哩一類監犯都有不同程度的心理問題。鬼咩,咁隔離法,真係人都癲!

獨立室,連做運動都係喺裡面。

試吓部相機嘅built-in filter先~

整個site有好多屋仔,當年的功用有所不同,但唔會間間入去喇。

哩座係醫院

撇開係監獄(同享1996年發生過死咗卅幾人的大屠殺),哩度真係幾好環境。

Guard Tower, 當然就係睇水時用。

The Commandant's House,係最高軍官嘅屋企。監獄關閉之後,曾改換成酒店。

落雨濕濕,不過又有啲feel。

最具規模的建築,就是主監獄樓。樓高三層,地下和二樓有136個囚牢,由行為有問題的犯。三樓有480個床位,供正常犯人入住。

外圍

大樓旁還有工場,係犯人工作的地方,有木匠、造鞋、鐵匠等。

出海卅分鐘,有少少悶(可能同天氣有關),蟲老公仲瞓咗。。。之前班船好多人,但突然哩班無晒人。
個島係The Isle of The Dead,是官員、其屋企人、和犯人的安息地。

離遠望吓。

小蟲反而最鍾意展覽館,由英國運犯人過來開始講起。另外,享買票的時候每人會有張撲克牌,每張牌有對應的犯人,你可以按指示睇睇你(個犯人)係咩人,同會做咩工作。就算犯人都有高低級之分。

小蟲就好啲,犯小事坐七年;蟲老公要踎過世,陰功~

翻兜指數:
資料:http://www.portarthur.org.au
其實個入場費唔太靈活,焗你一定要食套餐。例如就算唔想遊船河,最平的套餐都已經包咗,唔去係你嘅事。又譬如想要audio guide的話,就要食Silver Pass餐,無啦啦又真係包埋一餐有得食,唔食都唔得。另外,guided tour和船河的時間亦無公開列明,要去櫃位詢問。哩個真係好奇怪的做法,每日都係一樣時間㗎啦。如果想參加ghost tour,可以日間遊覽咗先,咁夜晚再去會比較清楚地形建築和歷史,會更加有趣味。


2013 重遊塔斯曼 ♣ 路線 + 遊記Index 

更多照片或資料:Facebook Album

13 comments:

  1. 啊! 原來係睇澳洲人既祖先生活~

    ReplyDelete
    Replies
    1. 其實只係英國來的獄卒同監犯,祖先原住民比白人趕走晒。。。

      Delete
  2. 唔知點解D監獄環境總會背山面海好鬼靚...

    ReplyDelete
  3. Thanks for guiding me for the historical prison in Australia.

    ReplyDelete
  4. 我有去過呢度, 個時好似唔一定要 join tour.
    不過我最記得當年呢附近冇乜 hostel, 冇預約的我們, 只能入住 unisex 8 人大房, 結果係跟幾位大隻男住, 那晚好似交响樂演奏咁 ...

    ReplyDelete
    Replies
    1. 哈哈,無耳塞?嗰頭真係無乜嘢,不過好彩cottage就有幾間,可以一住。 :D

      Delete
  5. 澳洲真係環境一流! 請問hit count 是否從YB帶過來的呢?

    ReplyDelete
    Replies
    1. 係呀,真係好舒服。唔係呀,係blogger自己嘅。

      Delete
  6. 由監獄改建為酒店又幾特別喎

    ReplyDelete
    Replies
    1. 係呀,不過做咗一輪就無做啦,宜家純粹historical site的一部份比遊客參觀。 :)

      Delete
  7. Tasmania 真係可以見到好多星,我個次係 Bicheno 等睇企鵝都睇到好多星,重見到流星...
    呢個Historical Site 我都去過,都幾靚
    我淨係自己睇咋..

    ReplyDelete

到此一遊,留個字啊~

Related Posts Plugin for WordPress, Blogger...