23 November 2013

Messina il Ristorante 之《豪宅包場賀皮婚》


20 November, 2013 (Wed)

有段時間無寫食記,不過遇到好嘢,梗會推介比大家,絕唔會收收埋埋嘅。

對於紀念慶典一向都唔太熱忱,更加怕一大班人為慶祝而慶祝咁走埋一齊,所以無論咩年紀嘅生日、咩周年紀念,都未必會刻意慶祝。過往兩年的結婚周年紀念,好似無乜活動。踏入三周年皮婚紀念兼小蟲生日(揀生日結婚,唔洗記多個日子嘛),蟲老公話book間餐廳食飯,咁有好嘢食,係咪慶祝都總是樂意奉陪嘅。


平時好少比意見的蟲老公(澄清:係佢無所謂,唔係小蟲霸道!),揀咗間唔太例牌嘅意大利餐廳:Messina il Ristorante,位置仲好奇特。唔喺商場,唔喺酒店,唔喺街邊,而係喺住宅大廈,仲要係享紅磡豪宅、最細個單位都要1800+尺的《海名軒》裡面。進入屋苑範圍,都未行到入lobby,已經有職員招呼,知道我哋係邊個,帶我哋上五樓的餐廳(其實都係搭lift啫);又推介我哋去個private cellar飲嘢。

屋苑大堂,有啲似酒店

入到餐廳環顧周圍,無其他食客。裝潢並不特別奢華,無需dress-up,亦無需小心翼翼,教人舒服。我哋被安排到落地窗邊的梳化位,不過可惜已經入黑,室外的海景就唔係太睇到喇。

捧著餐牌,絕對有選擇困難。撇除a la carte,有兩個套餐可選,每個套餐又有幾個course可選。搞完一輪都揀唔到,負責招呼我哋嘅職員推架食材車出嚟,介紹一下今期有咩食,例如蠔呀,大海蝦,牛呀,松露咁,全部都係生㗎,逐碟攞比我哋睇。不過,相信架車嘅食材都係樣版嚟,斷估唔會攞返入去煮呱。好嘞,最後我哋揀咗一份西西里套餐4-course和一份白松露套餐4-course,另外點咗少少紅酒。未上菜之前,有grissini和雜錦麵包籃。

套餐的menu,按圖放大。另有散叫,唔會侷你食套餐。

兩條友仔係咁食包,食咗兩籃。因為真係好好味呀~~~連橄欖油都無乜沾。

嚟~上菜!先嚟介紹西西里套餐。。。
人人都有嘅開胃前菜:南瓜醬配油甘魚刺身

套餐的前菜:Carpaccio di Tonno,黃旗吞拿刺身,配血橙。
小蟲覺得吞拿有少少腥,但配搭得宜。幅相係見唔到魚,因為比其他料遮晒。

意粉類係cannelloni,內裡包咗炆牛肉和鵝肝,外配黑松露。

Secondo piatto係脆脆燒豬,配lentil豆豆。
唔好以為圍住啲豆條深色邊邊係汁,其實係意大利洋蔥製的醬。
嚟Alba白松露套餐:

套餐的前菜係烤帶子,配白松露和菰類,香噴噴~蟲老公讚不絕口。

意粉類係好特別的甜甜餃,南瓜和梨餡配上栗子泡沫

正餐係煎牛扒和鵝肝,五成熟。小蟲怕生本來要七成,但聽職員講生少少好啲就要五成。
見佢煎得真係啱啱好熟,但又唔會留血水,真係讚。

襯張枱仲有嘢食,影相先~其實我哋都好少影相。。。

食完正餐,間場的palate cleanser一啲都唔馬虎。係蜜瓜雪葩

兩個餐的甜品,和petit four。其實揀Sicily套餐其中一個原因,係個甜品,係小蟲好喜歡的開心果,仲要係心太軟。切開,啲開心果醬澎湃咁湧出嚟。另一個係相對平淡的Zabaglione。

埋尾梗要叫返杯espresso啦,一single一double,無乜爆炸力,但都不失為舒服的ending。
埋單時更送上甜點禮盒。

服務幾好,每次擺低碟餸都會介紹吓有乜,然後自動飄開;但暗地裡又會吼實我哋,有需要又飄返出嚟執吓嘢,斟吓水咁。其實食到無耐,都估今晚應該只有我哋一枱客。哩個地點,唔係專登揾都唔會知,又點會有人無啦啦walk-in吖。所以成個廚房六七個廚師,同樓面的三幾個職員,全晚淨係服侍我哋,唔需要額外消費就包埋場。如果晚晚係咁,真係賺埋都唔夠燈油火蠟。。。


當然,勉強要挑剔的總會有。例如招呼我哋嘅職員係有禮交帶,但略嫌唔夠warm(係咪要求多咗啲呢 : P)。食物製作精美,但有少部份食材可以更加新鮮。總括嚟講,論環境服務食物,小蟲絕對滿意。有咁嘅質素,當然就反映係價格到。除咗兩個套餐,另加酒水、咖啡、加一,計計數嘞;但起碼成正比。而且哩間都算係幾偏門的選擇,想靜靜哋,又有返啲驚喜,更想食啲精緻啲嘅意菜,哩度係一個好選擇。

要翻兜的話,小蟲會揀嚟食午餐,起碼清楚睇吓個靚景吖。如果有人想食聖誕新年大餐,出面嘅餐廳又full咗,可以嚟試試。再如果,唔係咩喜慶唔想太花費,唔好話小蟲唔提你嘞。以往佢哋有參加restaurant week㗎,嚟緊嘅restaurant week享出年二月舉行,留意吓啦啵~

開房式廚房,走時都仲有幾個師父。

梳化位好好坐,最後仲好想瞓。。。
Messina il Ristorante
翻兜指數:
地址:紅磡環河街11號海名軒5樓

16 comments:

  1. 果然同價錢成正比喎⋯ 不過偶然都要食餐好既,尤其是特別日子tim~
    生日快樂,三週年快樂~

    ReplyDelete
  2. 成晚得一枱客!如果冇你地啲員工咪拍蚊/提早走得囉....

    ReplyDelete
    Replies
    1. 嗰日佢哋打咗比蟲生兩次re-confirm,我哋笑話其實好想我哋唔出現,咁就直頭連舖頭都唔洗開 XD

      Delete
  3. 嘩嘩, 包場o黎計, 直情係抵啦, 超讚!

    ReplyDelete
  4. 生日快樂,三週年快樂~
    咁即係埋單幾錢呢 ? :)

    ReplyDelete
  5. 祝生日快樂和三週年快樂, 看來環境和食物都是很吸引的:

    ReplyDelete
    Replies
    1. 有心有心~ 實在滿意,想食餐好嘅,可以諗吓佢。

      Delete
  6. 生日&週年快樂!! 我仲以為呢間係酒店餐廳添...咁又幾特別喎! 成晚都大啖大啖松露, 真係引C人呀!

    ReplyDelete
  7. 生日&皮婚快樂!!! 果然正野介推. 賣相唔錯喎, 想問下LUNCH 係乜價錢呢?

    ReplyDelete
    Replies
    1. 多謝多謝~我見openrice啲人話set lunch$300-$600不等,睇你揀幾多個course和咩餸。 :D

      Delete
  8. 我發現佢地好多DISH都有泡泡呀。唔知有咩特別呢?

    ReplyDelete
    Replies
    1. 我諗係靚啲之餘,仲可以陪襯吓食物嘅味道呱 XD

      Delete

到此一遊,留個字啊~

Related Posts Plugin for WordPress, Blogger...