30 January 2014

2013 閒遊。神戶 《聖誕新年閃令令》



 2013 Dec 匯率: ¥100 = ~HK$7.5
 欲看其他照片,請參閱Facebook Album

2013.12.21 (Sat)

ORZ... 預計回頭寫埋兩篇澳洲遊記,加兩篇神戶,就可以清緊部份backlog。但這個月忙嘅有,懶嘅有,到近個星期仲好鬼無心機,乜都唔想做。澳洲遊記固然無寫,但見神戶有篇想趕及活動完結之前一寫,於是先的起心肝啦啦聲寫。

活動係乜?就是神戶燈色節《神戸イルミナージュ》(Kobe illumination)!

比起日本國內其他地方,這個燈色節規模未必算係最大最出名。遊客來說,認識神戶市中心的《神戸ルミナリエ》(Kobe Luminarie, 見下圖),亦比這個位於郊外的《神戸イルミナージュ》為多。當然,更多人會選擇去大阪的。不竟前者《神戸ルミナリエ》位處市中心,方便得多。可惜活動的時間只是12月6日至12月17日,連聖誕節也不到便完結,無緣一會;於是條長路遠貢入神戶Fruit Flower Park,一賞自稱關西最大規模的燈色節。

神戶市中心,但只開12月初中的燈色。(photo from official website)



介紹

活動每年的時間略有不同,2013年的是由11月1日至2014年2月2日。場地平日是個日間開放、要收入場費的公園(大人¥500),到此等節日盛事,當然就收得更貴。入場費大人¥1000,其實都唔係貴嘅;即場購票入場。燈色節一般旁晚5:30pm入場,到9:30pm完;但好像我們到訪的12月21日的周末,會延長開放。所以想去的朋友要多多留意網頁資料啦。

場內展覽

小蟲諗大家都係想睇相多,不如先講有咩睇啦,再講講配套設置。最簡單的講法是,整個會場都有燈色佈置,只是分區會有些少特別主題,例如某角落係向日葵花園,另一邊是動物園等。最特別,就要數3D projection的幻燈影,將不同影像立體式投射在建築物上。去相~

Fruit Flower Park的出入口

向日葵花園

靚得嚟都幾盞鬼~仲好襯本身嘅公園。

公園中間的水池,有各式動物的燈色。

鶴、企鵝、海豚、塘鵝。。。

北極熊都有。

另一邊箱就簡單聖誕樹,又另一種感覺。

有水,有燈,有仿歐洲建築,加棵聖誕樹,仲唔影相?





馬騮表演和3D投射表演的時間表。其實宜家都好唔鍾意睇動物表演,所以無睇。。。

睇相完全唔會知做乜,去片吧啦~(片長約四分鐘)



唔係普通的燈泡,有少少花形㗎。

小火車動物號

今時今日的燈色,點可以無時光隧道?

雖然人流唔多,但要等到一個人都無,有啲難度。



地點和交通

Fruit Flower Park位於神戶北,如果渣車的話其實唔遠。奈何今舖無租車,靠火車和公園的接駁小巴往返,兜個大圈就真係有啲遠。比個地圖大家參考吓(中間部份路段GPS收唔到):


先講公園的接駁車,無論是否燈色節,公園都有免費接駁車。只是燈色節其間會加開旁晚到夜晚的班次。詳情參考網頁。乘搭火車的話,最好前往三田JR站(地圖點2)。三田站和公園(地圖點3)之間的車程,大概30分鐘以內;所以來回已經要用一小時,仲未計早啲去到等車的時間。三田站的等車位,在JR站出閘後右邊的出口,落樓梯再向右行。初初大安旨意以為會有好多指示去小巴站,點知乜都無。好彩早咗少少去到,行錯咗都有得返轉頭。錯過咗班車,要等半個鐘先再有。

由火車站出嚟,係無指示嘅。夜晚唔多車,離遠見鐵絲網後面有架小巴車身嘅字,先知無揾錯。

去到公園落車位,要過條小小的馬路先入公園的。離開公園的話,直接出公園後不用過馬路,按指示牌排隊便可。不過留意接駁車是小巴(well,起碼我們乘搭的是),坐位有限。回程走之時會比較多人,都容易滿座,唔好人家臨開車先去搭。

哩個牌唔洗識日文都明啦~

好嘞,由神戶市點去三田JR站呢?最簡單,梗係睇http://transit.loco.yahoo.co.jp/啦。因為價錢、火車公司、時間、快慢、轉車位的combination太多,最好就係自己search定。舉例說,我們去程和回程的轉車位和時間價錢都唔同,最主要係就時間。留意如果神戶三宮係起點終點,有可能需要搭阪急和JR,即是要買兩次/種車票。不過按小蟲觀察,無論價錢平貴或者轉幾多轉車,整體用嘅時間唔會差好遠(除非你揀啲特別刁鑽嘅路線),單程要一小時。所以加埋公園接駁車,來回要起碼三個鐘。加上旁晚係放工時間,分分鐘要企成半程火車。
去程樣版
回程樣版,只搭JR

其他要點

開show的時間始終是冬天,整個展覽位於室外的公園,而且郊外比市區更加凍,所以做足保暖措施。場內有自動售賣機(飲品),和紀念品店。真係肚餓口喝,體貼的日本人又點會要大家捱餓吖。場內有多個小食和飲品檔攤,最正係連hand drip咖啡都有。




例牌地,大家可能會問,咁值唔值得去呀?小蟲無去過其他燈色展,所以無得比較。但單獨來看,雖然路途遙遠,但人流不多行得舒服,地方稱不上好大但肯定唔算細,仲有馬騮表演(雖然無睇亦無興趣睇),香港就應該睇唔到啦。所以如果享神戶附近,又有個晚上無嘢做,都值得過嚟行吓㗎。

唔係去神戶?唔緊要~全日本仲有大把類似的展覽,總有一個啱你。

25 comments:

  1. 馬年祝你萬事如意, 出入平安, 身體健康.

    我下個月都會去日本自駕遊呢 ~

    ReplyDelete
    Replies
    1. 我祝你事事順利,有得玩有得賺~ 好開心喎,去日本邊樹呀?

      Delete
  2. 祝 萬事如意、身體健康、心想事成!

    ReplyDelete
  3. 燈飾很漂亮呢!祝新春快樂!也祝你於馬年可以去多些旅行!

    ReplyDelete
  4. 恭喜新春大吉!事事如意!

    ReplyDelete
    Replies
    1. 多謝~祝你今年家宅平安,心想事成。繼續多啲share啲靚相!

      Delete
  5. 日本的聖誕deco真係靚過香港呢。。。可能係我主觀加偏心!
    祝小蟲新一年萬事如意、飛多啲玩多啲~~

    ReplyDelete
  6. 唔錯喎啲燈飾,很有點歐洲味
    時光隧道係咪畀人求婚架呢XXD

    ReplyDelete
  7. 日本人真係好多搞作
    東京都一樣,好似聖誕到新年期間
    晴空塔於晚上都會亮著不同的顔色呢:)
    順祝你馬年幸福快樂~ 馬上去旅行!

    ReplyDelete
    Replies
    1. 多謝多謝,大家咁話。祝你都去多啲旅行(近期超多airline promo :P),繼續影多啲靚相。

      Delete
  8. The illumination show is quite beautiful.祝 萬事如意!馬年行大運!

    ReplyDelete
  9. 恭喜發財! 馬年的起心肝啦唔該! 哈哈~
    神戶牛柳呢!

    ReplyDelete
    Replies
    1. 提嚟馬年仲懶過舊年,初十五先去覆message XD

      Delete
  10. 劉小蟲你好,

    SeeWide特搜網是一個全新互動生活分享平台,集齊各地遊山玩水好去處及講玩講食,讓大家分享不同生活體驗

    你的網誌十分切合我們網站的主題,內容及相片也很有質素,請問可否讓我們轉載網誌內的相片及內容?(會注明出處及不作改動)

    我們的目的,是盡力網羅優質的相片及內容,建立一個講玩講生活的平台,並分享給一眾志同道合的網友

    希望你能成為我們平台的一份子,助我們更有效地集結不同好玩好食之處!

    另外,我們設有「稿費」制度,文章獲得本地瀏覽量,即可兌換稿費!

    迎新推廣,每100本地瀏覽量,可獲高達HK$1稿費;我們亦可以你的名義,將稿費捐到香港宣明會,或你指定的慈善機構
    詳情可參閱:http://www.seewide.com/space.php?do=help&essay_id=22#001
    如有任何查詢, 歡迎電郵至: info@seewide.com

    ReplyDelete
  11. 唔怪之d 人話神戶xmas 靚過東京啦, 真係太美了.

    ReplyDelete
  12. Long time no see la.. How are you doing?

    ReplyDelete
    Replies
    1. 有心有心,近排忙同懶,搞到無乜去探啲blog友 :P

      Delete

到此一遊,留個字啊~

Related Posts Plugin for WordPress, Blogger...