2014 Mar 匯率: ¥100 = ~HK$7.7
欲看其他照片，請參閱
Facebook Album。
前言
差實哩個旅程，在舊年已有伏筆。話說當時還未出發去澳洲Sydney順路跑個半馬之際，偶然見
運動筆記，講起名古屋女子馬拉松會在不久後開始報名，而介紹的內容亦相當吸引。完賽獎品並非一般獎牌一面，而是Tiffany的頸鏈啊～～～但老實講，當時半馬都未跑過，而一向覺得10km、半馬對人體嚟講係可以接受，反觀全馬係耗損機能的一回事，所以根本就無諗過要挑戰全馬。但誘因實在太多（除Tiffany外，time limit是寬鬆的七小時，去日本還可以順道旅遊，而且聞說日本攪大型馬拉松賽事是非常出色的，初馬去日本一定錯不了。。。），跟有跑開的蟲大姐傾開，大家認為反正是抽籤形式報名的，先報名亦無損失。若然抽中了，咪乖乖地練習囉。結果，都唔需要多講，哩個trip就係咁誕生咗。聞說命中率只有50%，又好好彩和蟲大姐一齊抽中，即係得25%可以一齊去跑。之於點樣準備、賽事精彩的詳情，就留返遊記先講喇。
除咗跑，當然就係去旅行啦。2005年去過名古屋睇世博，所以市內觀光就大可不必了。反而順路想去周邊鄉郊地區行吓，但三月初是個尷尬的時候。冬天理應又過了，但春天櫻花又未開；立山黑部未開山，去上高地行吓山又凍得滯（真係行山嗰隻），總之唔知做乜好咁。最後見好多地方都未係最佳時候去，就情願將範圍收窄啲，揀幾個例牌地方去吓。不過最終發現篩選得唔夠狠，去嘅地方都係太多、車程太長（雖然最長嗰轉都係兩個鐘）、又或者低估咗我哋hea嘅能力，有啲地方真係到此一遊就算，想睇多啲都無時間。觀光部份的安排，小蟲就比自己唔合格；但在城市的話，就好輕鬆（因為乜安排都無），可以去行行企企買吓食吓試吓咖啡，開心～
