2008 日本東北 【Day 4 石卷 - 山形市】- 逃之夭夭

路線圖 

香港

仙台 

松島

石卷

山形市

寒河江

銀山溫泉

最上峽

藏王  

山寺

仙台

香港

Day 4 (Part 2) 2008.01.23 (三) 

石卷 - 山形市天氣:

(1C / -5C)

一般景點四點都休息，哩個時間都無可能再去得邊。離開Sant Juan Bautista，都係時出發去山形市。跟據之前的搜查，哩段路大概兩個幾鐘，希望唔好太黑去到山形。不過又心有不甘，享石卷淨係去到一個景點。翻下雜誌，不如去食嘢啦，有間叫風月堂的，賣成108種味道雪糕的店舖喎，食少少唔會好耐唶。

渣無耐就去到紅箭咀，兼店舖(下圖Ballon A)附近，屬於細細條的內街。不過路過咗先見到間舖頭，無辦法啦，眼見周邊都無位泊，繼續向前行，再兜返返轉頭啦，好閑唶。可惜，卻係行差踏錯的第一步。。。去到十字路口，GPS計唔切點行返轉頭，咁，轉左定轉右好呢？小蟲選擇。。。

直去! 不過好快就知道唔對路。因為無耐(圖中B位)有架迎頭車，條路確實唔太容納到兩架車。而對方司機響鞍示警，做晒手勢。。。唔洗估，都知道自己入錯線啦 !!

仲要一響鞍，有個享我地前面、本來背享我地的放狗路人聽到，伶轉面見我地行錯，即刻有啲惡咁趕我地掉頭。啦啦聲搵個位掉頭，出返之前個十字路口，又要再揀轉左定轉右。

咁樣嚇一嚇，都唔係好諗到嘢，一心知道舖頭在前面，就向前去啦。聰明的朋友都應該都估到了。。。無錯，哩個方向係不准直去的。去到圖中C位又有對頭車，唔係呀嘛~~ 救命呀，玩夠未呀？

點算呀~~~

唔知好彩定唔好彩，個位啱啱係人地屋企，門口前面有個小花園和一忽車位空地。啦啦聲駛入去先，等對頭車走晒先掉頭。不過駛入去的時候太心急啦，隆隆!! 撞到嘢o忝!!

死啦，撞到乜呀？？？唔好理啦，掉頭走啦!!! 跟住已經呆呆滯滯，不知如何是好，但都要去返十字路口o架，只不過今次無可能再行錯! 轉左! 一路去到D位，實在頂唔順啦! 有間舖頭有些客用車位，求其泊埋去，定一定個魂魄先。透咗幾啖大氣，第一時間落車睇下架車有無損傷，無喎! 上返車，小蟲定返啲之後，就開始勁面黑。「咁宜家點呀？!」 明明見到間舖頭但又去唔到，仲要咁搞到咁狼狽。小蟲又死都唔想再兜過個條路，好驚比人認到我地，尤其是唔知撞毀啲乜嘢，而且個度都無車位。但事到如今先離開，好似得個吉，食唔到個雪糕就仲唔憤氣。哩個形勢，火柴人梗係唔敢聲，係咁睇地圖睇吓有無對策。

最後的對策，係。。。

落車行路過去。。。心情當然唔好得去邊。再路過那戶人家，知道小蟲撞到乜啦。係有忽矮矮地的花圃，側邊圍住的磁磚，其中一塊（約掌心大）的一角被架車的前輪撞裂咗。實在好對唔住呀　

去到舖頭，其實係間麵包舖，不是餐廳。旁邊放個雪櫃存雪糕，雖然味道無齊108款，不過廿幾款實走唔甩。揀了竹炭和納豆（合共577円），返去車到先食。前者淡淡地，後者真係好似納豆咁黏黏地。係咁搞一搞，食埋出發去山形都已經4:50pm的事，天都黑。

今段路行IC，由石卷港一路去到山形藏王出口，盛惠3700円。用高速公路，入口分開自動(ETC)或者無自動繳費的閘口。無自動繳費的話就要享入口的票閘機停下，等部機彈張票出來，拎張票後就可以上路啦。其實即係好似停車場拎票咁唶。直到去到出口，揀返無自動繳費的閘口，比返張票個職員，就會同你收錢。

一路行，越接近山形縣，路邊兩旁的積雪就越厚，不過當時都無落雪。都唔知用了幾多時間，去到山形市的酒店(地圖Ballon A)。Check-in和休息了一陣，7:50pm出去搵食。山形市都幾靜，就算火車站都唔多人，餐廳的選擇都係以居酒屋為主。行了一輪，我地揀了間叫はなの舞的(地圖Ballon B)。

佈局和食物跟和民差不多，最緊要係可以看圖點菜。Serve我地的係一個貌似劉凱威的後生仔，按下鐘就會出現。揀了六款食物，味道唔差得去邊，不過無乜特色。上菜速度算快，食完晒埋單走人（3265円)，9:45pm。返去酒店，結束驚險的下半日。。。

更多照片

Read More

2008 日本東北 【Day 4 松島 - 石卷】- 行程開始落後

路線圖 

香港

仙台 

松島

石卷

山形市

寒河江

銀山溫泉

最上峽

藏王  

山寺

仙台

香港

Day 4 (Part 1) 2008.01.23 (三) 

松島/石卷天氣:

(0C)

第四日一開始，行程已經落後。因為計劃一早就出發去石卷，但福浦橋近在眼前，情願cut少啲石卷行程，都想去行一行。本來享酒店有條小路可以好快兜到過去，不過都係跟GPS行大路，去返尋日遊覽船售票亭個停車場，然後行入去。其實，福浦橋門口係有停車場的。。。
 

買了票(200円 x 2)入內，有路的地方都幾乎行咗，係一個唔太特別的島仔。望吓其他島，望吓條橋，又望返過去酒店那邊，行一個圈就用咗一個鐘。天氣麻麻，除咗日出時睇到太陽，其餘時間密雲。而且仲幾凍，行到半路火柴人拎壺水出黎飲，發覺個水面結咗冰。吓？今朝先斟吱喎，雖則溫度計當時係零度，但行兩行就結冰。。。

推介度：1/2

出返去，初初仲想行埋五大堂，不過望下錶，已經11點。況且內容同福浦島應該類同，都係出發去石卷好了。石卷原先安排了兩個景點，一係石ノ森萬画館，二係Sant Juan Bautista。因為遲咗出發，唯一二選其一。

用咗45分鐘左右，就去到石卷。途中，肚餓。不如食咗嘢，先再決定去邊個景點。睇下旅遊書，搵來割烹八幡家 - 食鰻魚飯。間舖頭(地圖Ballon A)在小巷裡面，停車場又係得幾個位，又係咁啱得一個位。。。去到12點05份，人家剛剛開門做生意。

石卷最出名始終係石ノ森 章太郎，所以店內有唔少漫畫，係邊個畫的，就不得而知了。下午的餐牌都好簡單，得8樣嘢揀，唔係鰻魚就係鰻魚。之於有乜分別，都係一如以往：唔知，求其亂點。

小蟲點了うな丼(1700円)和火柴人的うな重(月) (2000円)。餐牌仲有個叫うな重(花)，平少少，但睇個名真係唔知有乜唔同，size唔同呱。等食其間，取了店內的旅遊單張看，不過無乜料到，同旅遊書介紹的大同少異。等咗15分鐘，鰻魚出爐啦! 

小蟲個碗飯大過個頭，一揭開個碗蓋，好香呀~~

火柴人個盤就鋪滿鰻魚，二話不說，跟住就係咁扒飯。食到最尾食唔晒，過戶比火柴人食埋。粗略估計，碗飯係多過盤飯的，鰻魚就少啲。最後甜品係椰子紅豆醬湯圓一粒，好滿足呀~

食飽飽簡直唔想郁，可惜要爭取時間繼續上路。諗完一論，決定去Sant Juan Bautista睇船。唔去漫畫館，係因為我倆對漫畫毫無認識，路過街上的公仔像只係覺得面善，連名都叫唔出，無乜認同感。當然，對條船又何來認同感喎，都只不過係filter by elimination。唔多唔少，亦有點因為Vasa Museum，啟發對船的興趣多一點。

講多無謂，上車出發最實際。最實際，莫過於有個300架位的免費停車場。和好多景點一樣，哩到都係靜英英。

入場費700円一位，入去就落一條長電梯，離遠見到條船的全觀。條船係複製品，原先個條享1617年由伊達政宗指導製造，係日本製造的其中一條西洋船，之後用來運吓使節去外地咁。圍住複製品側邊的展覽館，主要介紹船的背景，物品和物料，和日本的船運史。

入到條船，有兩層幾，模仿真品的間隔。邊到煮飯，邊到養生畜，使節享邊到辦公等。內裡唔太大，但都有個姐姐standby準備講解。佢都好慘，因為無乜遊客，裡面仲要好凍下。前後行咗一個鐘多啲，咁又三點喇。哩個景點呀，ok咁啦，睇返漫畫館的網頁，或者漫畫館會好睇啲既。

推介度：

1/2

更多照片

Read More