香港
Day 7 Part 2 - 2008.01.26 (六)
山寺 天氣: 
大概渣咗一個鐘，就到達山寺，求其見有停車場就泊(500円)，在火車山寺站對出，步行去山寺入口約五分鐘。行到去，見到門口有其他停車場的，價錢一樣，笨咗。
入口的石級雖然舖了雪，但可能尚有其他遊客行，都唔算太難行。不過一路行入去，條路就越多積雪，一步一驚心。
平路都還可以，但上山爬樓梯，真係好考功夫。
先行過平路的根本中堂(和根本英俊有無關係的呢？)和芭蕉像，就到達正式的入口 - 山門。在山門付了300円/人的入場費，比亞叔指下對鞋，叫我地換好雪靴才好行。好彩有鞋換，踢對波鞋來行，真係多多腰骨都唔夠跌斷。
過了山門，基本上一路爬樓梯上山。除了地上有積雪和結冰，仲要係咁落雪。因為雪太大，我地都撐著雨傘來行，怕行得太耐件羽絨濕晒就麻煩。
上到奧之院，居然閉堂，無野睇。由山門慢慢行到這裡，用咗半個鐘。越上山，越來越大雪，不過都唔理得咁多，一場來到奧之院無得睇，就踱過去五大堂。
當時三點半，遊客已經無乜，行入去五大堂的，更只得我地兩個。由五大堂望返過去奧之院，只得白色和深啡色。感覺好似武俠小說的場景。而望落山的一邊，就隱隱見到火車站和山腳的景物。企咗一陣，唔肯定人家幾點休息，見其他遊客都走得七七八八，而且開始天黑咁款，我地都落山。
正所謂： 上山容易落山難，睇下下面張相就感受到。又扶又抓，逐級逐級好似細路仔學行咁，慢吞吞咁行。小蟲行先火柴人行後，行呀行，去到樹林裡面，突然聽到上面的樹沙沙聲，有野跌落黎咁聲。嘩，做乜野？小蟲擔住傘，睇唔到頭頂發生乜事。因為來得頗快，都無反應可以做，只可以企定定，跟住周遭白朦朦一片。沙沙沙沙。。。。
後來火柴人話，佢見到一大舊雪一餅咁從天以降。就算走都走唔切。原來啲樹積雪太重，成舊雪咁跌落黎。亦好彩係樹上績雪，一跌落黎就散開晒變成雪粉，如果唔係成舊咁錠落黎，真係邊度都唔洗去。亦因為擔咗遮，無搞到一頭一身都係雪。
不過大雪得咁緊要，真係雪崩都唔出奇，大家若然冬天去落雪的地方，都係小心啲好。
推介度：
落到山已經四點，開車返仙台還車啦。
