香港
Day 3 (Part 1) 2008.01.22 (二)
仙台 - 松島天氣:
好啦好啦，book咗九點鐘去Mazda 取租車，由酒店一條大直路行去，一啲都唔算近。成8:50am先享酒店走，一揪二lung行得頗快都九點鬆少少先到。
註：日文網站中的地址係「仙台市青葉区一番町1-8-1」 或者英文網站：1-2-33 Ichiban-cho Aoba-ku Sendai-shi 係同一個地方來的。
接待的姐姐問小蟲取駕照和護照影印，之後碌卡比錢(五天共30500円)，再比咗頁checklist咁既紙小蟲簽。租親車都會有嗰頁紙，係列明架車有乜設備，例如雪tyre，anti-freeze琳琳種種。其中，有兩幅車形的圖畫，一幅front view，另一幅rear view。Rear view的一幅在bumper左右位置各mark了一個A字，這代表車身位置是被刮花了的。求其掃咗張紙一眼，就簽咗。
哩個係一個反面教材。正常應該拎住張紙，去架車到check一轉，覺得無問題先簽的。小蟲連架車係乜型號乜樣都唔知就簽咗，真係講個信字。甚至連佢比咗架有4WD裝置的車，都係尋日執相時睇返架車先知。等小蟲向旅途中比人問架車有無4WD(後話)，小蟲仲大大聲話比人知無。(因為book的時候無要求呀嘛)
簽完張紙，想問接待姐姐有關保險的問題，但她的英文完全唔掂，唯有放棄。佢就啦啦聲送咗我地去架車到，又無叫小蟲check車，又無教用GPS就走咗，由我地自生自滅。睇黎，佢真係有啲怕我地繼續問佢嘢。雖則遲咗啲，但都兜個圈睇吓有無明顯的傷痕，之後上車玩GPS準備出發。架車係泊享行人路上面，唔阻人又唔阻車，所以可以慢慢摸。個GPS話易唔易，話難唔難，搞咗15分鐘先摸到整個運作。想入松島觀光船的電話入唔到，醒起有網友話要拉咗hand-break先可以入，一試，果然如此。
好啦好啦，腳震震(其實係架車未warm-up，裡面凍到震)咁享9:35am出發啦，去松島近近地，揀條唔洗錢的路，都係50分鐘車程，應該趕得切11點船。
因為火柴人無車牌，小蟲繼澳洲回鄉探親之旅，再一次開始全職司機的生涯。
快d考車牌呀~~~~~~死人頭~~~~~~
連埋去到松島後兜遠咗少少，10:30am就到達Ballon A的位置。其實個位置，係GPS搜查仁王丸觀光船的電話得出來的地點，是個售票亭來的。對出有個停車場，就腳泊低埋架車就去買票。船票1400円一張，買完之後個亞叔指手劃腳，指我地去上船。原來唔係享售票亭旁邊上船的，要行去大碼頭(Ballon B)個邊。好彩唔趕時間，如果唔係跑過去都幾係嘢。
其實除了仁王丸，還有其他船公司可選，有些更有discount啊~ 不過去之前無詳細研究，去到都係跟旅遊書推介。各位準備去的朋友，有興趣就做多少少功課喇。
行到過去，都夠鐘開船。上到船正在猶豫坐邊好之際，見到有樓上雅座，好似話上面好啲喎。跟住就享樓梯旁比錢，每人600円。上面的佈局靚啲啲，船尾有檯凳，部份位置無簷蓬，開揚少少。
一開船唔夠幾秒，啲海鷗已經係咁追住隻船，但其實都未有人開始餵。仲要成pet白色排泄物噼啪一聲pet咗享甲板到，搞到小蟲成程船躲在有瓦遮頭的地方，比佢pet中件羽絨都幾麻煩。
船上一路有日英廣播，介紹各個島的由來。不過掛住影相，都無乜聽書。我地無買蝦條，火柴人就拎咗旅行豬去餵海鷗。救命呀~~~ 放我落黎呀~~~~變態佬~~~~火柴人，你都唔好以為啲海鷗懵既先得架，點會食豬肉喔!!
推介度：
船程大概50分鐘，回到起點落船，就去下一個景點 - 瑞巌寺。由碼頭過條馬路就係。有幾間手信舖，走的時候掃咗些少紀念品。一條大直路就係成日見到，古樹參天的參道。去到篤，買入場票600円一位就入去瑞巌寺參觀。
但對腳已經凍到殭咗，加上硬窟窟的拖鞋，好鬼唔舒服，但點到要行個圈架。好多遊客入去睇完大廳就出返來，但其實可以沿指示兜一個圈。有幾間房，和一堆神主牌睇。內裡係唔比影相的。
推介度：
1/2除咗本堂，仲有間寶物館，有畫、本堂內的彩圖門、用具等展覽。前後用了一個鐘多點，就出去買手信，然後返停車場攞車。最奇怪係，停車場收費寫住一個鐘300円，30分鐘100円。我地10:34入，13:53出，足足三個鐘，但收800円，點計都計唔明。。。
0 comments:
Post a Comment
到此一遊，留個字啊～