香港
Day 6 2008.01.25 (五)
尾花沢 / 最上川 天氣: 
路過的足湯，連個牌都鋪晒雪。成地濕漉漉，有無人浸架？
好啦，要走啦。返去旅館，飲埋杯咖啡先check-out。火柴人埋單，其實佢唔知要比幾錢，人地話幾多就幾多。點知比完，準備拎行李走，服務員跟出來問佢取回「Paper」(張單)，原來計多咗錢。出過張單，今次啱喇。退返啲錢和比返條車匙，諗住開步爬返去停車場。要爬，因為條路斜斜地上，我地又無雪靴。點知服務好好，我地無要求都自動送我地出去。先將我地的行李放享架電單車到，由亞叔叔先駕電單車運行李出去街口，而我地就由服務員護送步行出街口。去到街口等一陣，亞叔叔換咗架細車仔，接我倆和行李由街口去停車場，唔洗我地行得咁辛苦。
去到停車場，因為有蓋，所以架車無比雪甕住。如果唔係就好似紅箭咀咁，變成一舊白色嘢。Warm-up吓架車，掃得雪黎，10:30先出發。本來今日先去最上川坐船仔，去埋山寺先去藏王棲息。不過已經晏晏地，去完最上川先再算。
由尾花沢去最上峡芭蕉ライン，預算一個半鐘左右。點知GPS指引的路線封咗, 頭一次行個條路都唔為意係封路，以為自己行錯咗。點知轉完彎，GPS recalculate過，跟佢去行，行完一輪，咦？點解條路熟口熟面既？原來佢計來計去，係咁兜，想行返封咗個條路，GPS想直去，但望下條路，前面得幅雪牆，只得轉左或轉右。求其揀轉左，但揀錯咗。結果同一條路行咗三次。激死。
遊完花園，終於回到正軌，繼續去。差不多去到附近，跟指示行呀行，轉入一條小路。一路行開始覺得唔妥，因為。。。係咁上山。條河無理由係個山上面嘛？! 見GPS終點支旗插享前面幾廿米，再望下出面。吓？咪玩啦，你插住個位，前面係山頭的一棵樹咋!! 好彩山上有屋，搵到個位掉頭，再set一次目的地，咕嚕一番，再黎!
又再行呀行，今次見到條河享旁邊，應該啱啦呱。點知，一個轉彎，又比佢指入條小路。一入咗去，都知又被老點，又係上山feel。不過條路太窄同太多彎，唔太方便掉頭。除非諗住扭好多手呔啦，又驚扭扭吓對面有車，所以都係行到有避車處先掉。
成朝比個GPS老點，明明開始時set啱目的地，但行行下走晒位都有既？! 而且有好多時明明享條大路上面行緊，但個箭咀歪晒位。
結果去到最上峡芭蕉ライン的古口本社港，差不多13:00。去買票 (1970円 x 2)，姨姨做動作話下一班船係13:40，然後嘰嘰喳喳講一堆嘢。佢都知我地唔明，走出counter去紀念品店搵個女仔埋黎。原來係位台灣人，幫我地解話，話可以買食物上船吃。我地見有時間，就去餐廳食埋先上船。
啱啱落完單要兩碗肉片麵和烏冬(1500円)，斟杯水，就有廣播，當然唔知佢講乜啦。估係叫搭客準備上船，但望下個鐘13:20，吓？唔係話班船13:40架咩？又被點了。我地的食物仲未到呢~ 然後個台灣女仔走來提我地，話夠鐘上船。見我地落咗單但未有得食，就幫手吹廚房叫佢地快啲，仲要pack埋當外賣取走，如果唔係班船就走架啦! 而廚房就琳琳禽禽咁，一邊道歉一邊煮。係我地唔好，咁遲先食，搞到人家「哩咁hea」，但居然係佢地道歉，我地十個唔好意思就真。揪住兩兜滾熱辣的麵食，趕落去碼頭，行得快整瀉晒兜湯，不過都上到船，因為人家等埋唶。
上到船要除鞋，求其坐低享門口位，就開始開餐食麵。成程船有個導遊講解，介紹兩邊景色，我地聽唔明的，就唯一兩頭望，和食麵。旁邊的兩位女士點了船上面的餐，吃不下當中的一盒飯團，就送咗我地。我地唔識講，導遊就向其他乘客說我倆是從香港來的。然後就話這條船，最多係日本人搭，其次係台灣人和香港人。這個，小蟲聽得到。
船程大概50分鐘，去到終點站草薙温泉的碼頭，岸邊鬼咁大風。
推介度：
入到室內，都係賣手信的地方。其他乘客散晒，我地就諗住搭巴士返古口本社港取車，點知15:10先有車，當時只是14:30。之前睇網頁都知道可以比2500円，代為將架車運去草薙温泉港，咁就落船即刻可以離開。但，等下巴士有幾閒？況且平好多喎。享近車站門口的室內位置搵個位坐，點知又見返個台灣女仔，睇黎服務員都係兩頭走，條船享邊就去邊個站。佢叫我地坐入面，會暖啲。見我地有排等，仲好好人咁斟咗兩杯熱茶比我地。
終於等到有車啦，上車比錢(400円 x 2)，中途會經兩個JR站，車費會平點。全程約15分鐘。返到古口站個門口差不多15:30，當然唔洗妄想可以今日去到山寺，所以就直接出發去藏王。
0 comments:
Post a Comment
到此一遊，留個字啊～