香港仙台 松島石卷山形市寒河江銀山溫泉最上川 藏王 山寺仙台香港
Day 7 Part 1 - 2008.01.26 (六)
藏王 天氣: (-3C / -15C)由Pension Village去藏王吊車山麓站，大概10-15分鐘。在吊車站門口的停車場，09:30已經滿坐，被指咗去附近另一個停車場(1000円全日泊)。可能是星期六，感覺都幾多人，幾架大巴載大大少少的學生來。
吊車入口出面有售票亭，但只受現金。用信用卡的話，請移玉步到吊車入閘位，旁邊有隻窗賣票的。買完票(2500円/人)入閘，票價包來回共四程吊車。由山麓站到樹冰高原站，再由樹冰高原站到山頂站，搭兩款不同的吊車。我地係該批分流的最後幾個，前面一大堆人。大部份人都係滑雪裝束，我地的裝束顯得格格不入。由入閘到上吊車，等咗15-20分鐘左右。山腳都係得-3度，上到去會點呢？出發前買的暖貼，今日第一次出場。
等到上車，前面上車的人有部份企得比較鬆動，結果後上車的(包括我地)要逼沙典魚咁逼入去，仲逼過繁忙時間搭地鐵返工。逼到和其他乘客背貼背，郁都郁唔到，乜景都睇唔到。好彩件大家的外衣夠厚，唔係就蝕晒底(比小蟲)。五分鐘後到達樹冰高原站，雖然未見樹冰的蹤影，但白雪雪的樹景已經好靚。行幾步，搭另一款吊車。這款有位坐，有乘客數量限制，舒服好多。幾分鐘後就到山頂啦，一落車已經覺得好凍，室內的溫度計顯示-12度，真係唔係好想行出去。出到去，更只得-15度。天氣真係麻麻地，大風大雪，啦啦聲搵條頸巾圍住塊面先衝出去。嘩! 好XYZ凍呀~~~ 出面勁大風，吹到亂晒龍，能見度好低，朦得好緊要，就算行埋舊樹冰都睇唔得清楚。tune過啲相，勉強先得幾張睇到啲樹冰。
凍僵小蟲一條。
實在頂唔住，前後逗留咗十分鐘，影咗無幾多張相就縮返入室內。凍得咁交關，真係無興緻再出去。而且小蟲啲腳指凍到有啲痛，驚會甩出黎，所以都係離開好啲。嗰個鐘數(10:50)落山的人少，反而可以睇下景和影相。去返樹冰高原站有個大暖風機，小蟲坐係到燴咗好耐，啲腳指先好返啲，最後11:30落到山腳。火柴人享山頂拍咗段片，當時問小蟲有乜感想，小蟲話凍到想死。見其他網友影好多相，樂在其中，好鬼佩服。這個主打景點，雖然值得去，但凍得滯和朦得滯而大打折扣。
推介度：
下一個景點，係早一日去唔到的山寺，去完就要返仙台還車啦。渣咗一個鐘，享等紅綠燈時，見到元氣壽司。橫掂夠鐘食晏，不如就食元氣啦。
入到去先知，所有壽司都係105円一碟，好抵啊~~~仲有冬日特別壽司，和奇怪食物添，定係小蟲大驚小怪呢。有薯條，cheese cake，蜜瓜，茄子壽司，漢堡扒壽司等。埋單，1575円。
0 comments:
Post a Comment
到此一遊，留個字啊～