香港
Day 4： 山形市 住宿 2008.01.23
山形市的住宿，其實和其他城市無乜分別，都係以連鎖式經營居多。因為有架車，所以選酒店務必要有無料停車場。本來選了オーヌマホテル，評語唔錯又幾平。但搵多兩搵，發現當時還未開業的リッチモンドホテル山形駅前，好似幾靚咁。說到尾，都係貪新鮮。不過泊車24小時要500円，尚算合理的。
因為新的關係，小蟲都估到GPS未必會搵到，所以準備好附近的Super Hotel的電話用來輸入，一啲都唔難搵。睇酒店網站話立體停車場只有36個位，手快有，手慢無。我地遲咗出發去山形，幾驚無位。但，咩叫立體停車場？有平面停車場的咩？後來找到解說，其實即係室內幾層個種停車場，平面停車場就係享空地無層數個種。
一路以為停車場咪停車場囉，去到先知係要渣架車入升降機個隻。又以為就算渣入去，等佢升到某層就渣出去搵位咪得囉。點知，估錯晒。去到升降機前面，地下有兩條坑，剛好比兩邊車輪駛入。亞伯伯指我地入升降機，跟住仲講一輪野，反應當然就係一臉茫然啦。指手劃腳一輪，原來小蟲泊到咩埋條坑的一邊，要泊正中間點，再泊過。跟住又指示要收埋車旁兩邊的倒後鏡，搵來搵去都搵唔到邊粒掣係。亞伯伯都搵唔到，算數。再跟住，就指我地落車。吓？落車？上到去邊個搵位泊呀？你幫我渣呀？好好好。。。
亞伯伯比張車票，就可以去reception check-in。
Check-in的時候比張車票服務員登記，之後登記完各樣之後，比咗張地鐵飛咁的房匙。諗完跟手簽卡，但小姐耍晒手，指我地去幾部機前。原來要用機比錢，放張房匙入去，現金碌卡都得。Check-out時亦一樣，停車場錢就check-out時部機器會問你收。
準備上房，服務員小姐追過來，成籃女士用品比小蟲揀，逐樣講解。小蟲只取了面膜和其他一般用品。還有頭髮圈等，但唔拎啦。
上到房，所有東西新束束，仲有陣裝修味。訂的已經是corner double, 應該比一般double大，不過都有少少窄劫。以為山形市地方比其他大城市闊落，酒店都應該會闊落點呱，點知唔係，有少少失望啦。
可能係新開張的關係，有份小禮物送比我地。實用得來又好得意。係兩條包裝成飲品和蛋糕的毛巾，雖然好無謂，個盒又「阻訂」，不過都好鍾意。
落唔落，都要去食早餐架。房租包早餐，自助形式都係以和式為主。火柴人就食得津津有味，小蟲都係夾幾舊餐包，加杯香濃牛奶，望住雪景食早餐。
你見張相無乜人，都估到又係我地最遲，食完9:45am。
Lobby有三部電腦，隨時可以用。另外check-out之後，可以寄存行李。
整體各方面都唔錯，如果無車的話，都近山形車站。
【邊間】Richmond Hotel【環境 / 地點】
【房間 / 服務】
【食物】
1/2【幾錢】10500円 連早餐+ 500円泊車【幾大】Corner Double
【邊到book】Jalan.net【小蟲rating】
【Jalan.net rating】
+0.7 (評語連結)
0 comments:
Post a Comment
到此一遊，留個字啊～