香港仙台 松島石卷山形市寒河江銀山溫泉最上峽藏王 山寺仙台香港
Day 5 (Part 1) 2008.01.24 (四)
山形市 - 寒河江天氣: (0C / -3C)
本來(又係本來)plan咗遊幾個山形市的景點，但，留在山形市觀光的時間唔多，仲要睡到八點半，出發都十點，仲可以去得邊？咪去近近地的霞城公園囉。睇地圖離酒店都幾近，一條直路。小蟲懶醒話，不如行過去啦。行到出去，啲雪落得一啲都唔細，我地兩把傘都留咗在車尾箱。一係拎返架車，一係就去火車站商場買。結果。。。用咗1029円，買兩把傘。出街行下都好既，感受一下雪中散步的氣氛。
10分鐘先hea到去霞城公園南門，入口鋪滿雪，隱約有對腳印，裡面都應該有人呱。行無耐，就去到山形城跡本丸 - 文字門石垣 (上圖)，不過周邊圍住晒無得行，因為修葺緊，只可以上看台望兩望。再行，路過縣立博物館，入去解一解凍，再出過去。然後就去到最上義光騎馬像(下圖)。四圍人都無個，反而貓貓就有一隻。黑漆漆，真係雪地裡面都見到佢。享附近行到11:30am，要返酒店取車啦，因為一晚泊車到翌日中午12點為限期。
沿路出返南門，路過鄉土館(上圖)，好想入去睇，不過實在無咁多時間。南門對開的河流，薄薄地結了冰。點解會知係薄薄地？因為火柴人走去玩擲雪球囉。磋埋幾舊唔係好實的雪球擲落河，噹一聲，搞到有一忽冰穿咗，就已經見到河水。
推介度：
下一站，去寒河江摘!!! 上咗車，入GPS。唔。。。Eh。。。園幾多號電話呢？Eh。。。好似無印到喎。吓？小蟲無理由大懵得咁緊要既。諗下先，呀係! 上網見到士多啤利園的網站，最終link返去Cherryland個到，見旅遊書有Cherryland的資料，所以先無印到唶。Go Go Go!!!今日開始落住雪渣車，非常小心，慢過蟻攔。天氣時好時壞，渣咗半個鐘都到Cherryland，但越近就越大雪。附近有好多比雪甕住的疑似車里子樹：
大風又大雪，地下仲濕立立，去到泊低架車，飛撲入內。入面係一間幾大的手信舖，路過都見到都好多嘢啱買，不過返出黎先買啦。一路穿過手信舖，見到有個無人的詢問處，左望右望都無人，亦無任何關於摘士多啤利的告示。唔似有得摘喎，最衰又無佢個電話，如果唔係直接渣過去就算。咁呀，食飽先算啦。其實哩度係一個類似驛站的地方，見有三兩架旅遊巴停低，放啲遊客去餐廳食嘢。我地都係幫襯那間唯一的餐廳(1580円)，個そば就麻麻地咁啦。
食完，享室內由一頭行到一尾，都無跡像有得摘士多啤利。咁呀，去買手信先啦。行咗大半個鐘，買咗幾盒手信餅，幾瓶果醬，好多條地區限定毛巾電話繩咁。買完之後，都已經放棄咗。
出去架車放低手信，見旁邊有間さくらんぼ会館，一場黎到都入去睇下啦。裡面。。。陰陰暗暗，旁邊有間辦公室咁的物體，其他地方空框框，有幾幅介紹車里子生產的牆畫。去到篤篤，有間賣雪糕的。又係既然一場黎到，試下車里子和飯味雪糕啦，兩款味道都有啲粒粒咬口的料子，幾好味。又食完，無嘢好做，唯有出發去銀山溫泉啦。後來返到香港，再睇個網站，原來小蟲發雞盲。Cherryland只係個可供預約和詢問的地方，亦都係後來先知，原來摘士多啤利係要預約架。無無聊聊咁過咗兩個鐘，14:40開車去銀山，應該有足夠時間天黑前去到。離開時架車已經鋪咗層雪，好彩小蟲帶咗條爛鬼毛巾，專係享車上用(以前渣車的習慣)，火柴人就用佢掃走四面的雪，好過齋搵手掃啦~ 見隔離車位男士，好輕鬆咁拎個刷，幾下就掃乾淨晒，好羨慕。中途路過超市，搵下有無刷賣先，仲想買對雪靴，有得幾日用呀嘛。
行咗一輪，發覺係無車的雪刷賣的。不過雪靴就有，仲係推介貨品o忝。唔係貴，但著得幾日，要小蟲帶佢返香港就九十個唔願意，掉咗佢又實在係太浪費。雖然地下成日濕蓆蓆，小蟲又得對平底波鞋，不過幾日應該都挨到呱。所以望完無買，執咗啲零食飲品就繼續上路。
0 comments:
Post a Comment
到此一遊，留個字啊～