香港
Day 7 Part 3 - 2008.01.26 (六)
仙台 天氣: 
渣咗架車幾日，都係入過一次油，約半缸。到還車，又係用剩半缸，小蟲知道要refill先還車。之前享澳洲租車，還車時如果無refill，租車公司自己有油槍，即刻計到入咗幾多油，入單收埋錢。所以小蟲就連停油站都懶，一廂情願咁直踩去還車。唔洗問亞貴都知結果係乜啦，一般租車公司點會無啦啦養個油站吖？
去到擺低架車，店員來check車見無refill都有點奇怪，要check下啲油幾錢。小蟲都覺得奇怪架喇，佢齋望下架車個油表剩幾多油，就估到要比幾多錢咁勁？等係無咁勁啦!!
咁點計數？咪就係成缸買起佢囉! 盛惠10222円!!! 用一舊錢，買咗啲唔用得，唔食得，睇唔見，帶唔到返香港的嘢，真係鬼死咁難忘。
拉住行李，個荷包赤赤痛咁行去酒店check-in。這兩晚住的酒店係Dormy Inn Annex，放低行李，休息一輪，肚餓。本來行程有諗過去米沢，食返個米沢牛。不過實際行程跟不上計劃，唯有放棄落去。但，就算去唔成米沢，都唔代表食唔到米沢牛既，騎騎~~~
旅遊書上沒有介紹仙台市內的米沢牛店，我地就摷房間內的單張，居然真係有喎，而且幾近酒店o忝。
根據指示去到一棟新束束的大廈，到達8字樓。我地去到時約7:45pm，除了撞正食飯時間，星期六晚就份外多人。Reception登記好，叫我地留低電話，有位的時間就call我地。哩種服務確實好，唔洗啲客戇居居兼好似乞兒咁圍住間舖，出去行街行到有位先返黎。點解香港無哩支歌仔呢？
講返正題，我地無電話可留，就坐係門口的凳慢慢等，服務員仲斟埋兩杯茶比我地。足足等咗一個鐘，終於有位。雖然無卡位，但對住個街景都唔錯。
予其亂揀，都係揀返套餐穩陣，另外再點飲品。先來泡菜和幾款前菜，非常美味，刷晒。食食下先發覺，這餐廳係走韓式路線的。。。
跟住就係蔬果籃，食得多肉，都要食返多啲蔬菜先得，賣相都幾精緻。另外仲附有圍巾，避免客人玩燒烤時弄污衣衫，好鬼體貼。
然後主角碌逐出場，不過唔知邊個打邊個。。。淨係認得內臟和牛舌。
燒呀燒，食呀食，最後都係食唔晒，剩返內臟最多。牛粒和牛片最正，係咪正宗米沢牛，真係佢先知啦。係唔係都無所謂，最緊要好味，係牛舌有幾件有點韌。埋單12864円，捧住個肚落樓。
0 comments:
Post a Comment
到此一遊，留個字啊～