香港
Day 8 Part 2 - 2008.01.27 (日)
仙台 天氣: 
其實前一晚返到仙台，我倆身上只剩約4000円，餘下的日子基本上是靠信用卡為生。不過唔知大家有無試過享日本碌唔到卡的經驗，小蟲就試過兩次。唔係無得碌，係碌唔到。所以當知道剩返咁少現金，真係幾驚食完飯唔夠錢比，就樣衰到爆。
去到最後一日的下午，好彩都無事幹，係要小心慳住洗現金。行入去購物街，好開心咁又食又睇。路過有綠茶雪糕，整返杯先，後來先知原來旅遊書有介紹，店舖內還有不少手信類。
食完就掃入去對面的Comme Ca Store，撞啱最後一星期的減價，揀咗幾件衫，有冬裝有春裝。唔係半價就三折，埋單合計後仲有九折，開心到呢~~~
行無耐，又去食。。。不過唔收卡，埋完單1680円，得返二千幾円。死啦，聽日仲要買車票去機場喎。
有見及此，行多一陣，就先出車站買票先。搵個有人serve的服務站，要兩張明日的車票，見有得簽卡，好嘢，起碼有些少錢剩，可以去夾公仔。
亦因為已經山窮水盡，食晚飯要揀些收卡的餐廳，細舖免諗。
最穩陣，去返SPAL搵食。搵食之前，先享食物部襯臨收工，掃了些手信和士多啤利。
都有少少求其，揀了間吃炸豚肉的餐廳。炸時炸，佢sell的係一層層的豚肉卷，並非一舊豬排。一人要了一個餐，一樣都有一堆菜絲，撈沙律汁都幾清新。另外有蘿蔔絲，飯，主菜和雪糕。埋單3060円。
食完飯，拎住僅存的錢，就去夾公仔，夾到隻情人節的心心熊仔。跟住就返酒店執嘢，準備返歸啦。
0 comments:
Post a Comment
到此一遊，留個字啊～