2011希臘初夏 ♣ （飲食）搵食的秘訣 @ Colibri, Athens

2011希臘初夏 ♣ Index

 2011.05.31 (Tue)

去完Philopappos Hill見有時間，繼續「到此一遊」埋Temple of Olympian Zeus和Arch of Hadrian。再逛逛Plaka，且看有沒有啱心水的餐廳，兼買了第二天的早餐。

返回住宿諗住執埋火柴人去食飯，但其實瞓得三個鐘的他，邊會咁快好返出去食飯。所以小蟲和焚化爐見他那副病貓樣也懶理他，自顧自的上網摷摷有乜希臘菜的餐廳，食完打包給他吧。

焚化爐在tripadvisor找著間評語很好的餐廳（Spondi），為怕無位，我們連餐廳website也沒看便立時出動。離住宿廿分鐘腳程，路不算遠，但兩名女子唔識死，連地區是否安全也沒考慮，一個攬住部iPad，一個攬住部相機，便拼命的行呀行。

幸好大部份是住宅，人不多；但我們也打定主意，回程入黑還是最好搭的士。

行到Spondi門口，小蟲第一個問題係：「焚化爐，你有無睇過哩間野咩價錢？」她回：「無架。哈哈。」

Spondi門口:

說罷便去看看靚靚門口的餐牌。嘩！咁嘅價錢，如果唔好評就實比人掟蕃茄啦。閒閒地一個Appetizer要EUR30，我哋唔介意洗錢，但未豪到咁囉。

當然，我們選擇走頭啦；但若回Plaka附近吃，實在行得太遠。不如在附近搏吓啦，見藍箭咀有四五間Cafe / 餐廳之類便逛了一圈。可惜實在下不了手，無一間啱。站在街角，正在躊躇之際，小蟲眼角看見本來暗淡的街道，中間零零捨捨光了，和好像有些人氣，便走去看看。

呀，原來是間Pizza餐廳。見人氣不錯，也就懶得再行，畢竟差不多九點了。但，居然要等位。。。便足以證明這店實有其過人之處。

不諳英文的老細，「 吩咐」我們在bar檯等等，先看menu。

好彩其中一名伙計英文較好。

老細和店員：

好歹總算有個位，全是室外露天樹蔭下。兩名女子吃得不多，點了一個雞肉沙律和Colibri Pizza。酒鬼焚化爐揀唔啱心水的酒，老細醒了兩杯home-made的house red。雖然像利賓納，但也多謝他一番心意。

味道方面，除了好味和大碟頭之外，實在不記得其他感想（忘了寫notes）。

卻只記得要推介。

另外記得的是，價錢相宜，埋單只需EUR15。個pizza食唔晒，仲打包給火柴人消夜。

絕對是平靚正之選。

全晚客如輪轉，完全無停過。我們離開的時候，還有人等位。

鬼魅的綠街燈，剛離開的一檯：

我們搵食的秘訣很簡單。（1）密集式的餐廳盡量不選，多留意橫街小巷的。（2）睇人氣。人多，基本上無死錯（除咗喺香港，所有地方都係咁多人）。歸納起來，如果在橫街又多人的話，一定ok。

這也看個人喜好。喜歡事前做好research的，就當然用不著。但喜歡隨緣的，就相當好用。

Colibri
Empedokleous 9-13, Mets, Pagrati

http://youplanet.com/guide/eating/9516/colibri

2011希臘初夏 ♣ Index