24 March 2012

2011希臘初夏 ♣ 在Santorini的最後一站 @ Pyrgos





Santorini的最後一站:Pyrgos




2011希臘初夏 ♣ Index

Day 9: 2011.06.08 (Wed)




逛完Oia又再兵分兩路,蟲大姐去執返架租車過來,蟲老公跟了「型英帥大隻」落酒店攞行李(正確係睇住人家攞),小蟲就乜都唔洗做企享個路邊到等。






然後就去最後一個景點Pyrgos出發。其實揀哩個景點,係因為相對近。
如果去Red Beach或者遺跡Akrotiri,就驚趕得滯。
雖然旁晚返Athens的飛機係7:30,但遊吓遊吓,又要返Fira還車再出機場,好似危險咗少少。






再見漂亮的Oia~





大概半個鐘的車程就嚟到小村莊Pyrgos,雖然都見到有個日本團,但其餘都無咩人。
事實上,我哋嚟之前都唔知哩到有咩睇。
淨係知行上山睇景。。。





在山腰的教堂和建築,看來修葺得幾好。
仲有獨自發呆、都唔知係咪揾食嘅驢仔一隻。






一路跟指示上山,沿住迂迴狹窄的小路去。建築物亦比較舊和破落。







不過小蟲就係鍾意嗰種自然無乜修飾的味道。







除了小路,亦會有開揚景觀。






其間有部份看似係城牆的建築,未知當年是否有特別用途。旅遊書亦無說明。。。







一路行景觀越瞭闊,望西邊出海,亦可看到山腰的教堂。
個山確實唔高。







北望的話,就去返Fira,Imerovigli和更遠的Oia。
都有少少似嗰日享Santo Wines的風景,不過就多啲綠油油的地。
而且Pyrgos位於整個島中心,可以望晒東南西北。







去到山頂,有啲破落的建築。看似荒廢,但又好似有人住咁啵。






另一所教堂。起埋起埋咁多教堂,係咪真係有咁多人去架。






每逢有人問小蟲:嚟緊去邊到旅行呀?
小蟲:去XXX啦。
那些人:哦~有咩睇架?多唔多野玩架?
小蟲:(敷衍)都係嗰啲啦。(然後求其噏幾個例牌景點)



小蟲唔係衰,而係好多時「多唔多野睇同玩」,係好個人的感覺(同味覺一樣)。
好似哩個小村莊,齋行望兩眼,包保廿分鐘搞掂,仲可能有人覺得個景唔夠靚呻笨。



有無野睇,係視乎你睇唔睇到。有無野玩,係視乎你想唔想玩。
好似路過一幅藍色框框牆,小蟲就即刻覺得好適合影相。
影影吓仲攞埋嚟亂擺pose,連路過嘅人都笑。咁,都可以玩得一餐。



雖然小蟲不是用那個品牌的相機,但那句:「心態。。。決定境界」實在啱聽。








無無聊行完,睇錶係時候返去Fira還車,然後租車公司車我哋去機場。
而過程實在太順利,出到機場只不過係五點,連check-in都未夠鐘。


簡單的機場除咗食,都無咩可以做。仲要班機delay,唯有呆等,睇/玩iPad,再等。
好彩都唔算delay好耐。


不過最頂癮的係,啲乘客迫呀迫咁上巴士出去架飛機到,但等咗好耐唔開車,大家都有啲唔耐煩。
終於開車啦,原來。。。揸五秒便到。







無錯,享巴士望落去停機坪,近啲嗰隻Aegean機就係。
用腳人,落條樓梯就到。等架巴士開仲耐過自己行。。。







不過點都好啦,安全起飛,離開仙島Santorini返去笠笠亂的Athens。
最後一眼的Fira和Imerovigli景,和Oia+Amoudi Bay景。


想高空欣賞Santorini,就記得搭一程飛機,揀個窗口位啦。






然後途中開始日落,雖然隻窗好污糟,但都係要影。
小蟲覺得好似火山爆發。。。







再見Santorini,再見日落。








(預告:遮都曬爆。。。)



2011希臘初夏 ♣ Index

0 comments:

Post a Comment

到此一遊,留個字啊~

Related Posts Plugin for WordPress, Blogger...