2008 日本東北 【住宿 - 藏王】- Warm & Cosy

路線圖 

香港

仙台 

松島

石卷

山形市

寒河江

銀山溫泉

最上峽

藏王 

山寺

仙台

香港

Day 6： 藏王 住宿 2008.01.25 

15:30由最上川出發去藏王，GPS話要七點幾先到。唔係呱？咁耐？再耐都要行既，不過之前book住宿的時候，人家話18:15開飯。咁呀，唯有去到半路打電話比人，講聲話會遲到啦。行呀行，一路行，GPS就一路update個到著時間，其實根本唔洗咁耐，縮縮下變咗17:50就到。
跟指示，由上山方向去藏王，去到附近沿路一路登山。路段迂迴曲折，雖然無落雪，但怕跣呔，都係行到蟻爬咁穩陣。轉呀轉，今次無行錯路，順利到達。 我地今晚在藏王的住宿，在Pension Village，內裡有好幾間pension提供，地點(上圖左邊箭咀)比較偏離藏王吊車和溫泉位置。小蟲揀pension，一來想試下非和式的住宿，二來價錢較一般酒店平，三來睇相片覺得哩啲仿歐式的木屋好靚。但最大的問題，就係多數房間係無浴室的。要揀間有套房浴室，又有露天貸切風呂的，真係唔太多選擇。Pension Apple係其中一間。

Pension Village路口有地圖說明每家pension的位置，在大駐車場泊低架車，就行去Pension Apple。條路一啲都唔易行，厚雪，兼上斜，-8度的氣溫好明顯比-3度凍好多。

拉門入去，有啡花貓迎接，跟住男戶主就出來。帶我地行咗個圈之後，18:30食飯。間屋有兩層，地下係公家浴室，風呂，飯廳/廚房，娛樂室。二樓就係房間，smoking room(有電視)，和公用洗手盆。今晚，只有我們兩位住客，一齊設施都係得我地用。

入房門口有個緩衝位，向前係浴室，向左係我地間房，向右係另一間房(當然係鎖咗)。這個雙連房，適合一家幾口用。我地間房，細細地，可以住到兩個大人加個細佬。

執好野，開飯先~~ 好豐富呀，有沙律，湯，帶子，主菜係牛腩，最後仲有雪糕和咖啡。主菜個汁，屋主介紹係一啲類似beetroot的蔬菜製成的。好好味，好合胃口呀! 終於有餐飽既食喇，全部掃清光! 仲一邊播輕音樂，旁邊點埋蠟燭，感覺好warm。

一輪狂風掃落葉，食飽飽就去娛樂室坐一陣，睇一陣電視。間房有好多書，不過唔識睇，仲有棋類和牌類遊戲。書當中，有不少是關於植物和耕種的，事關屋主自己種嘢的，夏天花園更種滿花卉。食早餐時，屋主比咗幾本相簿我地睇，全部係佢種植的成果。

攤完梳化，返房梳洗，然後去試下個露天風呂。出面黑麻麻，無景好睇。風呂四周都係雪，感覺唔錯。第二朝再去影相，望山景為主。

影完相就準時7:30去食早餐，一入去就發覺有隻白雪雪的貓貓懶洋洋咁行過，仲成餐係我地腳邊戀黎戀去，好鬼嗲。早餐同晚餐一樣豐富啱食，有水果，乳酪，煎蛋，牛奶，咖啡。Ummmmm....

食完就要走啦。屋主享食早餐的時候問我地架車有無四驅，因為想睇下可唔可以渣架車去屋前面，咁我地就唔洗踢對爛鬼波鞋行雪地。而屋前有條大斜路，所以一定要四驅先上到去。當時小蟲以為無(但後來返到香港先知係有

)，所以唯有行返落去公共停車場。

享間pension前面影張相先，架戰車旁邊有另一間屋仔，係屋主一家人主的。下圖就係個公共停車場，睇黎昨晚無乜點落雪。一路行過其他pension，全部都係木屋仔，感覺真係好好。不過再好都要走啦，下一站係主打景點 - 藏王樹冰。

【邊間】Pension Apple
【環境 / 地點】     1/2
【房間 / 服務】     
【食物】    1/2
【幾錢】9450円 x 2 = 18900円 (一泊兩食，連浴室 - 無浴室每人平1050円)
【幾大】2-3人房
【邊到book】Pension網頁
【小蟲rating】      

更多照片