Sweet East 之旅 ♣ Index
【Day 2】 2010.11.23 (星期二) 食完蛋糕，決定出街行吓。到附近的Madison Square Garden (NY Knickers主場）望吓，到旁邊的Borders書店逛逛，又食咗餐唔太好食嘅烤雞pizza快餐，便打倒回府休息。無特色到，連相都懶得出。
瞓醒第二朝，咪咪摸摸攪到成中午十二點先出發。首站，當然係醫肚。漫無目的，在28街向東走，一路行見到間叫Cafe 28的店舖(地圖2號標記)就仆入去，以為真是咖啡店。盅咗入去，先知原來係take away店。因為臨近食晏，人未算多，食物剛出爐和款式多，而且有位坐，就懶得再搵，午餐就此。
食完，便沿5th Avenue求其行，當然不難望見Empire State Building。路過有趣漂亮的店舖便駐足一下。之於MLB店舖，既不漂亮亦無趣，不過火柴人要睇，逛了一陣，仲比佢買到野。
逛呀逛，連電器舖都唔放過，事關在美國無電器平，但GPS跑步錶就平好多。不過，空手出番黎。再行，就到第一個景點 New York Public Library。一直很欣賞外國的圖書館，多是有歷史的建築，地方大，古典的木檯木書架。享裡面行兩行，人都多點書卷氣。
可惜當日外牆裝修，室外只能看到白網和棚架。
入內需通過安檢，之後隨處行。正值聖誕將至，大堂正安裝聖誕樹和燈飾。無論大堂和走廊，小蟲覺得似博物館多過圖書館。去到兩個大閱讀室，需要再check袋，及不能拍照。但小蟲偷偷拍了借書處(下圖右上)，實在覺得好靚。閱讀室只有兩旁放了圖書，藏書並不多。皆為所有借取書藉都要在電腦找到編號後，填交表格，再等螢光幕通知去領取圖書。
雖然先進，但我們覺得這樣好似少了自己摷摷翻翻的樂趣。去完大的閱讀室，又隨意逛進一間小的，像是research room那樣，可以要求某期的資料或報紙。這個小房內，旁邊鑲了不同地標的畫像，整個佈置真像電影中的那樣。
其實整個圖書館可看的東西不多，但行行坐坐，用免費wireless上下網，瞌下眼瞓(無錯! 因為有點jetlag)，直到五點才離開。
冬天天黑得早。路過Madison Avenue，又望見Empire State Building。
下一站到附近的Grand Central Station (地圖4號)，同圖書館一樣，其實都深知無乜野睇，但到此一遊。放工時間，人來人往。入左去之後，四方八面都有出口，唔熟路都幾難搵。
無耐，又逛返出街。天氣冷，唔願行得耐。所以無兩步，雖然唔肚餓，但見有cafe(仲要唔係大連鎖店!)都坐坐。見地圖5號標記，D'Espresso。
店子挺細，我們坐在正中位置，左右兩旁有兩三檯。點了single espresso, cappuccino和蛋糕一件。咖啡還算不錯，蛋糕就不怎麼樣。
整個店舖由地下，牆身到天花，都貼了圖書的牆紙。花碌碌都幾得意。好彩我地唔賭錢，由琴晚到今日，書局，圖書館，圖書牆紙，真係「書」唔切。。。
0 comments:
Post a Comment
到此一遊，留個字啊～