扯風兼扯火 @ Clipper Lounge

扯風兼扯火 @ Clipper Lounge


2012.07.23
周末之時，已經打算在周一下午請半天假去書展。到周一上午，見勢色應該都會打大風，心諗：下晝請假會唔會蝕桌呀？不過算啦，反正天文台話旁晚先八號，蝕少少比自己舒服啲好過。請完假之後，覺得行書展都無乜好買，結果念頭一轉，去食tea都係一個好選擇。

平日的tea，加上風球打得正起，一啲都唔擔心無位。話雖如此，還是臨離開office之前打去Clipper Lounge訂位。小蟲唔明堂堂一間高級酒店，接線生的態度和聲線可以咁唔熱衷，印象分已經唔多。講咗時間人數咗姓名電話，接線生話：ok無問題㗎啦，遲啲有職員會再打比你confirm。心諗，你話ok就得喇，點解仲要reconfirm呢？

一路亦無人打電話來reconfirm。再心諗，就算你唔reconfirm，我真係唔信哩個環境你會無位囉。四點去到餐廳，表明貴姓訂位，接待的黑西裝友碌完電腦，居然話今日無姓蟲的訂位。而哩名黑西裝友，一開始已經木口木面。妖～ 咩酒店嚟㗎？好明顯，小蟲嘅諗法毫不掩飾咁反映咗向個樣度。那名黑西裝友見狀都話唔緊要，坐低咗先啦（不過都係繼續木口木面），就帶小蟲和蟲老公入座。

坐低咗之後，個黑西裝友又嚟，話：我再check過都係無記錄，不如你比埋個電話號碼我。雖然有可能佢想check真啲，睇吓有無出錯。但鑒於佢嘅木口木面，佢令小蟲覺得係小蟲做錯多啲囉。

心諗，你夠膽就再返嚟同小蟲講話揾唔到record，睇吓小蟲剷唔剷到你上天花板！（oops，暴露咗個真面目添）



望吓個menu，見我倆都食過晏，而且tea time唔食得太多，就點個一人份量的Mandarin High Tea，再加多杯飲品。Tea Set有sandwiches, warm, pastries & scones，每項可以在四五款的小點內選三款。Scone則不用選，一個classic和一個提子。Scone上檯時微暖，配上clotted cream和rose pedal jam。果占有濃濃的玫瑰花香，鬆餅亦不是太heavy，感覺還好，但是否值得大肆抬舉就有點保留。




三文治層：青瓜忌廉芝士、煙三文魚酸忌廉、火腿芥末。暖暖層：菠菜羊奶芝士、酥煙肉洋蔥撻、瑪德琳蛋糕糕餅層：文華芝士餅  、千層朱古力蛋糕、 鮮果撻  
唔逐個講啦，小蟲還是最喜歡糕餅層，歷年久不久會嚟cake shop攞啲餅食，一直都幾滿意。其他的一般啦，老實講，丁丁舊嘅三文治，可以整得有幾好食吖，好食極都有個限度。
飲品方面，一杯Vanilla hot chocolate和mocha，兩杯都麻麻。。。


食到五點三就要出發去睇戲，雖然睇六點，但見越嚟越橫風橫雨，怕人多車多，都係早啲出發好了。


差不多三個鐘嘅Batman，全程打橫攤享到睇，仲要有無限添飲添爆谷服務。其實仲有隻熱狗㗎，不過食完tea食唔落啦～話說哩兩張票唔係我哋買㗎，係有某人買錯票就免費比咗小蟲。所以事前都唔知有咁多嘢食。如果套戲有返咁長又大class的話，都值得買哩隻票～舒服好多，又有service。