2012廣州日半食食買買：一德

如果之前單出相片，又或者話係喺Log-on到買，大家可能唔會估十幾廿蚊嘅嘅價錢吧。 Anyway，大家好叻，估得都好接近。



2012廣州日半食食買買

 2012.07.07  - 2012.07.08


當日我哋逛嘅，係一個叫一德國際玩具文具精品市場的商場。初初見個門口殘殘舊舊咁，都無乜期望。覺得都係無嘢好買，而且間間舖頭都係賣差不多款式的貨品（好似香港啲格仔舖咁）。不過入到去行咗一陣，就覺得都ok喎。 大概有三四層，地方唔細。全部都係細細間嘅舖頭，樓面嘅格局有啲似電腦場咁款。



賣嘅一如商場個名所言，有玩具：玩嘅有，figure扭蛋有，細到手指甲咁嘅一set膠公仔都有；文具：相對比較少，都係筆呀，筆袋嗰啲；精品：鎖匙扣，小擺設，袋仔等等。仲有啲歸唔到類，例如電筒電芯，party服飾，保溫杯咁。
之於我哋一行四人，都係上咗年紀。無謂嘢、唔實用嘅都吸引唔到我哋。 本來想買哩個廁紙筒（RMB25），不過唔記得行返轉頭。一直以為實有其他舖頭有得賣，點知居然無！

其實好鍾意哩間舖頭嘅絨布貨品，除咗大中小各款袋，仲有大大個掛牆墊（有分格可以擺下信呀，鎖匙咁），座枱筆筒等。唔係天氣咁熱，見到絨布都出汗的話，都會買少少。最後只有蟲大姐買咗個紫色筆袋，好似RMB25。



另外蟲大姐話要買放十幾廿張信用卡嘅卡名膠套，見有成間舖頭都係賣哩啲，真係開心。香港嘅精品舖，最多都係得三兩款揀。跟住蟲三姐又話要買卡片盒，又揀埋一份。連本來無嘢買嘅小蟲，都揀咗個鎖匙包。

最後一人買咗兩個，都係RMB15一個，性價比高。大部份舖頭都係做批發，但都有零售。你問價的話，佢哋會問你買幾多，批發價當然會平啲。 脹卜卜嘅卡片包包，藍色嘅軟皮。

跟住蟲大姐又話要買保溫杯。我哋哩啲唔識嘢嘅，當然係睇款問價啦。點知舖頭老細見我哋講廣東話，就話自己人，問我哋買嚟點用。吓？飲囉，仲可以點用？原來佢話我哋揀嘅嗰隻款，質料好差，如果入貨就得，自己用就唔好啦。仲推介另一款，佢自己都飲緊（真係喺個位到載咗嘢飲），真係殷實商人！不過見零售價唔太吸引，都係運吉收場。 哩到係另一間賣杯嘅。 仲見到有牆貼賣，好似廿零卅蚊到。不過用唔著就無買嚟試。

最後就係bling bling，其實小蟲唔係特別鍾意，加上唔係用iphone。不過蟲大三姐兩人就揀得不亦樂乎，事關香港買個貼滿石嘅套都要幾百蚊，哩度一個都係RMB35，佢哋一人買咗兩個。實物都幾靚，但bling bling影相唔太靚，打個七折啦。 仲有iPad套，Samsung機套等。哩個係藍色，同之前張相個款係一樣但唔同色。 前後行咗兩個鐘，已經攰到行唔郁，唔走唔得。途中都見到有啲外國人嚟揀貨，有唔知係南亞定印度人，有西人，有日本人。小蟲估都有香港人嚟入貨。 商場門口一啲都唔吸引。另外有個新啲大啲嘅批發場叫萬菱，不過無時間同腳骨力今次去，留返下次吧。