野火下午茶 @ Elements

小蟲不是偷懶，但Day 3的遊記確實長篇，需要些少時間。
與其等到周末才有時間寫完，不如間間場去食個晏先。


野火下午茶 @ Elements


2012.08.19


近年城中熱門嘅活動，就是約返三五知己或家人，星期日去食個brunch。搞到稍有名氣嘅餐廳（唔理好唔好食），一係唔早啲都訂唔到位（早三個禮拜打去Caprice，都要排wait list第位個），二係星期日嘅lunch紛紛升格為brunch，然後收多一倍價錢。真係想輕輕嘆個周末，都變成高消費活動。

啱啱嘅星期日，小蟲就決定玩隨意。事前乜都唔訂，採取「食到就食，無理由無嘢食」嘅策略，享屋企hea到兩點幾，先出去Elements兜吓揀嘢食。

事前已經想試嘅Grand Central係首選，但公平起見，享civic square行個圈。去到Grand Central門口睇menu之時，撞到個貌似話事人嘅老外，同我哋爹咗兩句就送咗兩張免費飲品coupon。話就算今次唔幫襯，都希望遲啲有機會嚟試下，幾鬼識做生意。如果本身想試這餐廳的話，加埋張coupon，正常人可能已經行咗入去坐低；但唔知做乜忽然勾起小蟲條根，想再去兜兜先決定食唔食。





入返商場行個圈，涼浸浸嘅冷氣，令我哋毫無意欲再出返去熱辣辣嘅civic square。

最後，見好好好好好多年無食嘅Wildfire有tea set，都幾豐富咁就坐咗入去。
Grand Central唔洗失望，享coupon到期前，小蟲應該都會去幫襯你一嘢嘅。



假日tea set由3:00 - 5:30供應， $198二人，平日就$178，加一。都算幾抵。
本身有檸茶咖啡咁，加$35轉mocktail。
見到餐牌色彩繽紛嘅mocktail，抵受唔住誘惑，就揀咗兩杯。



一杯blueberry treasure，另一杯荔枝。前者係刨冰，夠凍又好味。
後者就差啲，非常普通口味嘅fruit punch一樣。

其實當時已經三點幾，同蟲老公個肚餓到打鼓，心怕一個tea set餵唔飽我地，所以要加餸。
嚟個black truffle olive oil king prawn linguini，唔好expect有松露味，但好多蝦仲好大隻，意粉嘅味道偏鹹，但都好食。


介紹吓tea set包咩啦～ 有8寸自選口味嘅pizza，夠晒自由。
我哋嘅double cheese and pepperoni，火爐即叫即烤，最鍾意重口味。



小食嘅份量都唔少，有炸雞翼、魷魚圈、洋蔥圈、多士仔、煙三文魚卷、檸檬撻、Tiramisu味cream puff、士多啤利macaroon。正常兩個人如果真係下午茶，都夠晒。我哋當lunchtea，加個意粉，未到飽到上頭殼頂，但就好滿足。埋單四百中。



最好就係人唔多，靜靜地咪幾好囉 ，咁先係小蟲覺得舒服嘅周末嘛～