一間是在ICC 118樓Ritz Carlton的Ozone，另一間是在K11 Hyatt的Hugo。本來兩者brunch的形式頗為不同，好難分高下。但鬼叫連續兩個禮拜食，少不免都係要想比較一下。
先說說基本資料吧：
| Hugo | Ozone Sky Bar | |
| 形式 | Semi-buffet | 4-course menu |
| 價錢 | $538 | $488 |
| 飲品價錢 | +$250: Free flow Champagne +$150: Free flow house wine Both include soft drink or juice |
+$400: Free flow Champagne, cocktail, spirit, wine and juice |
| 時間 | 11:30 - 15:00 Last order around 2:45 |
12:00 - 17:00 |
| 其他 | 指定信用卡食物有85折 | NA |
所有價錢需加一
價錢是很玄的東西，最終都係同質素掛鉤。單看數字，其實兩者相差唔遠。不過你可能會對個drink package嘩一聲，不竟Ozone要加$400一個人。但分別在於，Ozone多咗有cocktail同其他酒精類飲品，而Hugo就只有香檳紅白啲基本嘢。大家又可能會覺得（其實係小蟲覺得），加幾百蚊飲嘢好似好貴，但其實飲到三兩杯，已經回到本。在Ozone飲一杯，單價係$150。
時間方面，正常brunch應該係十一點零開始。但對晏起的小蟲嚟講，11:30真係早咗啲。舉例享Hugo，因為只食到3:00，所以一定要早啲去食。個人都未瞓醒，嘢未食好多就飲香檳。但享Ozone，我哋訂13:00，可以食到坐到17:00，比較啱我哋嘅style。
睇完Spec，就入去睇吓真材實料。未去食，就當然係訂位啦。
訂位
兩者嘅態度都好專業，而且都會講廣東話。唔好講笑，真係有啲做接線嘅，享香港地居然唔識講中文。Ozone的做法比較有系統，打完電話去訂（七位），會問埋電郵。之後會電郵confirm，和有封信寫明比信用卡落訂嘅資料。食完之後又會電郵多謝你咁。不過早兩三星期訂位，都已經無dining table，要坐lounge。
Hugo訂完之後唔需要落訂（八位），不過初初小蟲訂一點鐘食，當時接線照記低，完全無提過幾點last order。之後打去改人數兼改早啲11:30開始，另一位接線嘅話：其實你原先一點有啲晏，我哋last order係兩點半㗎。宜家早啲就好啲啦～ 到前一日會打嚟re-confirm人數時間，同埋話間private room有人cancel咗，問我哋有無興趣免費upgrade入去。小蟲無理由拒絕啫～ 哩點就好值得讚（雖然同行有人話酒店驚我哋大班人嘈住其他客）
繼而梗係食啦～ 食飽先講環境。
飲食
Ozone係四碟頭，享每個環節揀一款。懶得逐碟講，就講印象深刻嗰啲。首先，最抵讚嘅係，雖然係4-course一人一set，但實際除咗個main dish，其他大部份都係兩分咗兩小碟／杯，絕對方便大家交換試味。
Breakfast嘅egg benedict同日式蒸蛋，做得好細緻。其實由頭到尾，都睇得出，食得到廚房做得好有心機。日式蒸蛋係原殼蒸，個口切到齊葺葺；個殼咁薄，算小蟲小見多怪，真係覺得好犀利～
開始Appetizer，紅莓鴨肝嘅珍寶珠造形好可愛。
杯杯裝嘅Alasaka蟹肉，個調味醬大家試過都話正。最估唔到嘅係，以為個青瓜寬麵沙律會食到飽飽滯滯。結果出嚟係啲fettuccine薄到脆卜卜，配上柚子和青瓜，爽！
間場仲有清清把口嘅lime juice。
到正餐，因為試味比較麻煩，所以淨係食咗自己嘅Mini Wagyu Beef Burger，同燒鱈魚。唔好睇個啲mini burger細細個，啲和牛嘅份量唔算少，食咗一個都有少少飽。鱈魚肉質鮮嫩，日式醬汁燒，未放落檯已經聞到香。不過公平啲講，出面都有唔少餐廳做鱈魚做得唔錯。
芒果布典本來就好普通，所以再好食都無乜驚喜。之於有啲期望嘅荔枝杯，屬於清新之選。反而最無期望嘅心太軟，細細件但居然唔會焗到條邊硬柴柴，糕身鬆軟。
Coffee or Tea就唔好提，去酒店從來都唔係為咗飲哩杯嘢。
咁，Hugo又點呢？
餐牌就簡單啲，只係需要揀主菜，其他嘅前菜和甜點都係自助形式。
我哋都屬於早去嗰批，趁未比人夾到笠笠亂（雖然啲人都好斯文），啦啦聲影相先。小蟲就唔係碟碟影，所以有部份前菜都未入鏡。例如即撈嘅ceasar salad和beef tata、鵝肝醬、cheese platter等。入鏡嘅有喜愛嘅cold cut，成隻serrano ham，成舊三文魚。
如果鍾意食海鮮，成大盆seafood platter，最受歡迎嘅品種都有：龍蝦、生蠔、蟹腳等等。連舊檸檬都用個網袋包好，唔會唧晒啲核出嚟。
湯就只有南瓜湯，即叫即整，好濃郁～
淨食前菜都食到飽，到正餐，小蟲點咗scrambled egg with black truffle，一心諗住好得。點知上檯，一啲truffle味都無，而且啲蛋亦唔見得好味。超失望，自己享屋企整分分鐘仲好食；係得塊多士夠香脆。試埋朋友嘅牛都還好，但魚都係好普通。主菜真係扣晒分。。。
好彩，甜品都精彩，又攞返唔少分。最衰個胃太細，只係食得幾款。
Macaroon同雪糕好味，雲呢拿雪糕真係有雲呢拿㗎；朱古力味有少少酒味，夠香濃。糕點淨係食咗拿破倫同咖啡千層，另外食咗啲生果咁。仲借埋人哋舊金雹chocolate strawberry影相，飲吓食吓又三點幾。
其實見有成籃pastry，小蟲估都無人會食㗎啦，不過真係好吸引～
服務
兩者都好好。享Hugo，唔知係咪因為private room，每次換碟都會換埋餐具，仲有專人服侍。就算一般嘅侍應服務，都比Ozone略為成熟啲。Ozone唔係唔好，但睇得出啲人有少少green。離遠聽見不止一次跌啲刀刀叉叉咁。加上自動upgrade入房，當然就係滿意啦。不過埋單簽卡嗰位兄台，咁嘅服務居然一蚊貼士都無比。下次唔好揾小蟲嗰名訂檯～
環境
其實Ozone嘅裝修，實在唔係小蟲嘅taste。可能本身係酒吧，夜晚著燈又係另一隻feel；但日光白白睇，就有啲花碌碌囉。而且因為訂唔到dining table，坐lounge table嘅梳化，舒服就舒服，但食嘢就有少少唔就手。用幾張檯仔砌埋，啲侍應捧餐唔係咁順手。
當然，個無敵海景真係無敵。仲有open-air嘅位置，鍾意出去飲杯嘢都得。
廁所嘅infinity mirror～
型格嘅reception位
之於Hugo，因為之前嚟過，所以common area都無影。只係得張private room嘅相，走沉實路線。有十個八個人嚟，坐private room都幾舒服。但個人覺得出面嘅位，反而仲有些少特色。礙於酒店本身嘅位置和高度，簡單嚟講係乜景都無得睇嘅。
總結
整體感覺兩者都唔錯，本來覺得難分勝負。但寫完之後，反而變得明確。小蟲確實喜歡Ozone多啲啲，喜歡廚房製作認真及細緻，而且食完大把時間慢慢坐（真係坐到五點）。
後記：享Hugo食完之後，八個當中有兩個人肚瀉，懷疑是兩人食咗其中一款生蠔。其他人有無食蠔都好，都無事。
資料
Hugo: 官方網頁
Ozone: 官方網頁
0 comments:
Post a Comment
到此一遊，留個字啊～