11 July 2013

2012阿根廷:Day 14 Perito Moreno Glacier《底褲神功》





2012 April  匯率: 1 ARS = ~1.7 HKD

DAY 14 - 2012.04.18 (Wed)


Argentina 【 Buenos Aires  Puerto Iguazú > Mendoza > Ushuaia > El Calafate > Buenos Aires 】> Peru


查實這篇遊記,可以字都唔寫多個,事關齋出相已經夠照。不過,個人習慣比較喜歡拋吓個無書的書包,還是輕輕介紹一下行程吧。

接上篇,我們太遲登記冰川mini trekking的關係,人家連酒店接送的名額已滿,所以就自己安排的士接送。由El Calafate城鎮到位於國家公園內的Perito Moreno冰川,大概七十多公里。公園入場費,外國人位位ARS 100,的士大佬本地人平得多。在阿根廷,不少景點設有不同國家人士不同收費的安排(點解海水同老鼠公園唔得?)。

雖然說是的士司機,但其實相當熟悉mini trekking團的行程;亦會按那個團的行程來走。首先,離遠欣賞一下冰川,停一停影張相。然後送到碼頭旁,接洽旅行團和加入團隊。船河大概廿分鐘,除了繼續欣賞冰川,主要是運送我們到另一邊上岸準備去行。乘船的時候,大家已經開始嘩嘩聲和不斷影相,但其實外面連海風撲面是很寒冷的。

到站落船,有幾名冰川導遊接待。無記錯的話,是分不同語言的小組的。我們的導遊廢話不多,先介紹冰川的形成、現在的狀態、等一會攀冰(其實只是行,不過用攀字靚啲)要注意的事項等等。接著來到小木屋,大家放低無用的隨身物,便正式出發。越近冰塊,越覺得不可思議;一大團冰形成,既不像雪山但又不會立時溶掉,大家就在一舊大冰塊上面行走。然後,就有專人服侍著釘鞋,人家三兩下手勢便攪掂。穿上後有點奇怪,但按導遊的指示去行,也沒有見到有人PK。然後然後,正式開始行冰川啦~~ 大家乖乖跟著導遊去行,一來地方太大了,二來只有導遊才知道那條路線是安全的。他說就算早兩天是安全,也不代表今天安全,所以他會邊行邊用冰鋤探路。過程說不上危險,但當然亦有危險性,例如差錯腳跌落冰隙。小蟲比較膽小,步步小心為上,連導遊都提小蟲 "Breath and Relax!",哈哈。

在冰川上兜兜轉轉,約一個多小時便回程。除下釘鞋,便步行回到之前的小木屋,有一個小時午餐時間(自備),也有熱茶咖啡提供。再遊一下船河回到碼頭,就跟旅行團分手;但其實下一站的目的地相同,就是去看台來個全景一覽。只是他們乘旅遊車,我們乘私家車,但好處是我們的時間彈性得多,多看一會亦無妨。

當日的天氣不妙,烏雲蓋頂外,還要時下雨時下雪。但來到看台,居然烈出一線陽光,好不漂亮。眼看薄荷藍色的壯觀冰川,跟蟲老公說:「如此大自然,真的是鬼斧神工!」離遠兼撞聾、仲無乜文化嘅的蟲大姐聽見問:「吓?咩底褲神功呀話?」妖~當堂破壞晒個氣氛。

公司:Hielo y Aventura,得一間可以去trekking,無得揀。
Mini Trekking Tour價錢:唔記得。包船程出入冰川,釘鞋,冰川mini trekking,用膳時間(需自備),觀景台遊覽
租車來回:ARS 600
國家公園入場費:ARS 100 per person

當時我們亦有討論過,究竟Iguazu大瀑布還是Perito Moreno冰川壯觀一點。結果,叮噹馬頭,真的各有各出色,很難分勝負。能夠觀賞到兩大自然奇景,這個旅程都稱得上無憾~

收過路費之後,就停一停瞭望台,好遠咁望吓個冰川。天氣實在麻麻。。。

如果跟團接送,就係坐哩架小巴喇。上船之後,大部份時間留享船倉,出面太凍啦;仲落埋雨,好悽涼。

哩張係回程時影的,已經叫做有啲陽光。
除咗冰川牆,海面還有不少浮冰。
本來是連接在一起的,看似一道橋,不過已經塌咗。
船上面看冰川的近貌,和可以mini trekking的冰塊看似不同。
上船之後,大部份都係石仔路,而且落完雨有啲跣。
嗰刻開始,覺得對行山鞋真係值租,尤其是見到個o靚仔着住對波鞋跣咗一嘢。


上岸後,放下行裝就跟導遊上路。還有黑咪一隻,沿路常伴左右。

享導遊講解途中,離遠聽見轟隆轟隆,是冰塊塌下來。

不同的地質,可惜無讀過地理。

貓咪自得其樂


你成日都有得睇冰川㗎啦,仲睇?

近睇,假的一樣。

我哋掛住影相墮後了,不過有貓貓帶路。

然後,要準備行冰川啦;專人服侍著釘鞋。
出面鬼咁大雪,哩個moment,覺得條防水褲好值租。
一車釘鞋
開始入冰川啦,小心碌落去。

導遊在冰上如履平地,大家一個跟一個。

哩個位要逐個埋去睇,由導遊扶住,跌咗落去麻煩。
係一個好深的罅隙,講笑話吐篤痰有排都落唔到底。

行到半路回望,離上岸的位置都有啲距離。

點會淨係得行冰睇冰咁悶吖?(雖然一啲都唔悶)
埋尾有冰川威士忌一杯,仲有享阿根廷一定食到嘅Dulce de leche餅一塊。
飲杯!夠膽你就乾咗佢,小蟲飲一啖就夠,廢事要人抬返落嚟。

存放行裝和用餐的小木屋,貴重物品請跟身。
酒店的便當雖然貴啲,但有沙律、生果、水和三文治,都ok啦。

梗係要影張例牌相,小蟲件shell幾襯色!
N年前用兩千蚊買件shell都唔知為乜,
係近幾次戶外活動多嘅旅行,先領略到佢嘅好處。


食完晏搭返船出去,就前往觀景台。就連觀景台都有好幾條路線。
離遠睇,看不見盡頭的冰川,好。壯。觀。

一路行落去,唔同的角度和遠近,都有唔同的感受。

雖然處於靜態,但都覺得好澎湃。

連連下雨,忽然間有一瞬陽光照下。如果能夠照著冰川,就更加壯麗。

已經叫咗多咗陽光,不過繼續落雨,連鏡頭都濕晒。

大大小小的浮冰。

海綿一樣



顯得人類更加渺小。

中間有啲污糟。

近睇有近睇嘅靚,但遠睇先感受到大自然的奧妙。
聞說旺季的話,觀景台會擠得水洩不通。現在淡季加壞天氣,完全無人爭。
而且旅行團已經走了,我們幾乎獨霸。

9 comments:

  1. 係好耐好耐以前.... 我都去過加拿大的一個冰川,當年只有17歲,感覺到呢刻想起,依然震撼的.... 當然... 冰川中那藍與綠色之間的顏色變化是讓人深深著迷的原因之一。
    大自然是真的好奇妙的!

    ReplyDelete
    Replies
    1. 係呀,真係奧妙。我自己本身係好典型嘅城市人,不過近三五年都有啲轉變。去完哩個trip,就更大改變。

      Delete
  2. 哈哈...底褲神功...蟲大姐好搞笑呢~
    呢個南美之旅真係好正呀!! D冰川好靚~ 真係值得去呢
    我好鍾意中間有貓咪果張冰川相呀! 可唔可以放喺facebook俾我download做wallpaper呀? 些些你~ Thank you!!

    ReplyDelete
    Replies
    1. 難得你賞面。我原size放咗享哩度:http://i1186.photobucket.com/albums/z364/bugstravelography/2012SA/20130712_01_zps92f6d7c0.jpg~original

      可以按右下角放大再放大先download. 不過用機仔影,啲質素麻麻,唔好介意。

      Delete
    2. Yeah~ download左喇!! Thank you!

      Delete
  3. 超級喜歡冰川, 特別喜歡這種藍, 將來有機會, 一定要走上這一個 !

    ReplyDelete
  4. 好靚好靚!!! (呢篇 blog 喺上面的 preview 見到, 之前唔知點解 miss 咗!)

    ReplyDelete
    Replies
    1. PS 見你整到個 blog 咁靚, 我都想同我個 blog 扮靚 (不過懶!)

      Delete

到此一遊,留個字啊~

Related Posts Plugin for WordPress, Blogger...