11 November 2013

2013 重遊塔斯曼 《Tasmania:天氣、電話卡、租車》


2013 重遊塔斯曼 ♣ 路線 + 遊記Index 


 2013 Sep 匯率: 1 AUD = ~7.3 HKD

內容範圍比較分散,無辦法改個出色啲的標題喇,求其啦~


天氣

Tasmania地大,每個地方的地理環境略有不同,氣候當然隨之不同。出發之前,最好都係查查過往天氣穩陣啲嘞;例如wunderground.com幫到你,有齊歷史數據和travel planner。好嘞,九月份雖然話係春天,但天氣都係比較凍和不穩定。

我們遊走的地方,乜天氣都有。Port Arthur,得六度仲要落雨。九月的氣溫都係偏凍,以香港南方人嚟講,都係準備冬天衫好啲。另外,海邊城市超大風,同打風無分別。離開東岸小鎮Swansea之時,連酒店職員都話從來無試過咁大風,着我們小心揸車。小蟲一邊揸,架車都有少少搖。都仲未夠,最悽涼在Cradle Mountain,落大雪和雨,雖然落雪行山都唔係第一次,但有得揀當然好天開心啲囉。


總括來說,Tasmania都係個戶外行走的地方為主,所以防寒、防風、防雨的裝備唔少得。(即係乜都要,哈哈哈)如果你有行開山,其實嗰身裝備都足夠喇。澳洲(或者外國地方),有太陽之時陽光都好猛,太陽眼鏡、帽、太陽油唔少得。一提嘅係,如果揸車嗰位係貪靚嘅,唔該記得幫個手背和頸側搽返太陽油。因為一程車,都足以曬黑晒兩者。小蟲兩隻手背曬到好似戴咗兩隻啡手套咁,係咪好驚呢(其實一早就知,不過懶搽)~

 photo 20131111_09_zpsa17c430e.jpg
好天嘅時候真係好靚,陰天嘅時候都ok靚。

 photo 20131111_11_zps279bef04.jpg
不過落雨可以落得好勁,某天享海邊簡直打風一樣,極唔想落車。
仲要一開車門,大風到扯晒車上的紙張出街。。。

 photo 20131111_10_zps11ad73b8.jpg
好可憐,仲要落雪。有得揀,都係十一月打後去會舒服啲。


電話卡

快答案係:買Telstra電話卡,因為只有佢享Tassie收得最好,其他電訊商你可以試,但為咩呢,你都係想收到啫~~~

有時間,可以繼續睇睇我們買咗Optus卡有咩問題。話說由香港飛Sydney一到機場,有Vodafone和Optus兩家,印象覺得Optus好啲就去買。Plan有好多種,我們哩啲上網多過打電話嘅,買咗一隻$2一日嘅,又平又無限上網為主。

享大城市如Sydney, Melbourne,接收完全無問題,仲好抵用添;不過奇怪的事一開始就發生。話說我們三人各買一張,個plan完全一樣,只是蟲大姐買$10(可用五日),小蟲和老公買$30(用15日)。只是旅程的第二日在Sydney,蟲大姐的網絡開始用唔到,檢查data居然話唔夠錢!問題係,哩隻plan每日先扣$2,根本唔存在唔夠錢的可能。於是揾間Optus街舖問問,佢檢查到話個account未activate喎。但,小蟲和老公的account亦一直無做過activate的動作,一直都用得。所以,真係好奇怪。

好嘞,去到Tasmania發生咩事呢?Optus和其他電訊商的coverage出名享Tassie係唔掂嘅,係得Telestra最穩定;因為分別在兩個景點的職員都係咁講,而且我哋的經驗係,着一半時間收唔到。仲要蟲老公個電話九成時間收唔到,完全廢咗。小蟲就好啲,一半時間收到。大家同一個台啫,唯有解釋係個電話本身接收功能有別,但直覺覺得個可能性有啲低。心諗,如果架車有事拋錨又打唔到電話都幾麻煩。另外,個台有SMS檢查餘額的功能,明明我哋同一時間開台,但去到某日一齊check數,居然小蟲嗰個餘額會少咗兩蚊!明明可以用盡15日,點知少咗兩蚊(一日)。但去到last嗰日,無晒錢都繼續用得。費解到極點,諗極都諗唔明。

總結,如果行走主要大城市,$2一日任用真係抵玩嘅。不過留意,小蟲當時係3G plan任用數據,但睇網頁宜家已經無咗,$2 per day 4G plan得500MB。但去Tasmania的話,Telstra係不二之選。幫襯邊一間都好,記得睇清楚收費啊。

 photo 20131111_01_zpsbcc4f6b1.jpg
悉尼機場的Optus有華藉職員,雖然我哋都係同佢講英文。不過有時都會好多人排隊,睇你好唔好彩。
上圖蟲大姐試卡中,不過試完第二日都係有問題。。。


租車

Quote咗幾間公司,例如有Hertz, Budget, Avis, Thrifty, Europcar, economybookings, arguscarhire,仲有啲細舖頭,不過小蟲的要求係Hobart取車Devonport還車。Devonport唔係大port,細舖未必有還車處,所以得返剛才講嗰幾間quote吓。

穩陣派小蟲繼續要買重保險,有時網上未必有齊保險的價錢,那就自己預多少少錢落個budget到啦。最後揀咗Avis,除咗可以揀埋保險,最主要係佢有小蟲想揸的Toyota RAV4。雖然貴過一般小房車,但唔係成日有,就搏一搏。說是搏,一來租車的class多是參考性質,最終比架咩車你都好難講。二來小蟲揸中小型房車多,RAV4都叫大,都驚難睇位。

結果。。。去到Hobart攞車。。。佢。。。upgrade咗車!由Compact的SUV變咗架Full size的四軀車。嘩,好驚呀,點睇位呀!小蟲仲好燶咁,問人唔upgrade得唔得!個職員以為小蟲傻嘅,有免費upgrade都唔要。不過係無得揀嘅,因為無晒Compact SUV,一係等幾個鐘等下晝有人還車。唉,頂硬上啦。

攞晒車匙,坐享Avis個reception順手試埋帶過去用的GPS。(除咗日本,好多外國地方如租GPS都要額外收費,所以懶醒咁攞定隻去用)。事前蟲老公享香港已經更新好晒地圖,but唔知點解都係用唔到。玩咗好耐要投降,死死地氣埋去租一隻,問幾錢一日。個職員話十蚊日(好似係),不過~你架車upgrade咗,有埋built-in GPS㗎啦。呵呵呵~咁又幾好喎~~~

雖然開始嘅時候係無可奈何,但揸咗一日已經覺得好。一嚟夠大架,蟲老公屬高大類坐得好舒服之餘,啲行李雜物亂咁劈都無問題,加埋去完超市一袋二袋都放得好輕鬆。二嚟設備足,有頭先講嘅built-in GPS,ipod插,bluetooth接駁,倒後拍車鏡頭等等都好實用。三嚟夠力,3.2L係食油啲,不過話去就去,安全好多。

不過,今次租車係無驗車的過程嘅。攞車,自己享個停車場揾返㗎車,揸得郁就走得(當然如果你唔係買full coverage的話,就要檢查清楚)。還車,擺低架車,入去reception還匙,個職員淨係問要唔要invoice就算,無睇無問無簽收。小蟲諗,如果享還咗車之後比人偷咗架車,咁點計先?

總括嚟講,喜出望外,係有少量情況泊位麻煩少少,大部份時間都揸得好爽。不過一提嘅喺,記得睇清楚架車係食無鉛定食人渣(呀,係油渣先啱),個職員未必記得提㗎。

價錢參考:租咗九日,Group K Intermediate all way drive,車價$315,附加保險$243,非常多的雜費$216.63,共$774.63。免費升級到Group W Full size four wheel drive,兩者都差十幾廿蚊一日㗎。油價大概165 - 170仙一Litre左右,最終無睇到跑咗幾多里,不過前後入咗四次油,共約$210。Tasmania係完全無toll嘅,即全路免費。


 photo 20131111_02_zps6e3b4582.jpg
Hobart機場對出的租車公司區和停車場

 photo 20131111_05_zps247c59c3.jpg
Devonport的還車處

 photo 20131111_03_zps9110e4e6.jpg
除非入鎮入景點,否則大部份時間係無其他車嘅。

 photo 20131111_06_zps16c8a1bb.jpg
攞車時無幫架車影,淨係途中影過吓。

 photo 20131111_07_zps689017c3.jpg
小蟲越揸越鐘意,其中係因為佢同個環境好襯~

 photo 20131111_08_zps142a40fc.jpg
跑咩路都無問題

 photo 20131111_04_zps7e757295.jpg
享澳洲揸車無乜特別,出公路唔好拖慢,揼行油加速出去,條路嘅設計有足夠距離比你merge,同埋公路上面嘅司機都識避你㗎啦。其他就小心為上啦,小蟲偶然都會超少少速,110揸130咁。另外Tasmania好多路都唔係大公路咁款,好鄉郊feel嘅小路,但其實都可以揸110。自己睇路牌啦,無路牌就80-90穩陣啲好。
有時會有啲好似上圖嘅位,中間收窄咗,係同對頭車共用嘅,有車就讓啦。


2013 重遊塔斯曼 ♣ 路線 + 遊記Index

更多照片或資料:Facebook Album



19 comments:

  1. 架四驅好型呀!!!! 貴好多架~~ 我都想揸啊! 如果四個人坐呢款車, 兩個大喼, 兩個細喼夠唔夠放呢?

    ReplyDelete
    Replies
    1. 應該夠㗎,因為個尾箱去到車頂咁高,所以疊好高都得,不過就最好唔好阻視線啦。hehee..

      Delete
  2. 睇黎為左去旅行,我真係要學揸車喇!
    個女人咁大件都俾啲風吹住,完全感受到當時的風力。小蟲應該學下。

    ReplyDelete
  3. 曬到好似戴咗兩隻啡手套咁 <--- 我兩折色就無所謂,不過曬到熱個時真係好鬼痛
    我個次都租咗一架好馬力嘅車,因為其實 Tassie 都幾多山路,少D馬力都唔掂,妳呢架一定掂啦...
    不過馬力好都會有問題,就係會不自覺地超速,我差D俾人抄牌,好在個警察放我一馬咋,出咗一張警告
    我個次10月底11月頭去,氣溫都OK 喎..

    ReplyDelete
    Replies
    1. 重有,有無發覺路邊有好多動物屍體呢 ? D動物真係話過就過,完成無危險意識

      Delete
    2. 我估見你係遊客,都會彈性少少嘅,你超好多咩?你十月底去都遲我成個月,天氣應該好好呢~啊,係呀,真係遍地屍骸。

      Delete
  4. 4驅車咁既價錢都幾合理噃~

    ReplyDelete
  5. 塔斯曼 我都想。。。。去!!!!

    ReplyDelete
  6. 我煩緊邊間公司,有D 網上LIST哂有咩optional insurance (ER 等) ,有D又唔寫!可能我1月去,天氣好D所以個價貴D ! 因為我要hyundai 最平AUTO 車, 都QUOTE我AUS$817 ( OH ! 唔通多左舊GPS,就貴左咁多??)。。。。D 保險又唔知包乜唔包乜 。。。我只係幾年前係NZ 租左一次車!

    ReplyDelete
    Replies
    1. 所以quote價都要啲時間,我嗰時要用個spreadsheet寫低晒每間公司咩型號咩價錢有無保險,先有得比較。租GPS都唔平,如果自己有或者問人借都可以慳少少。 ^^

      Delete
  7. 好詳細既資料,謝!正想找有關上網計劃等資料!你租架車有built in GPS 真好。租GPS真唔平,我剛quote 租五日,要AU87+20 (one way charge) =AU107,每日成百幾蚊!但又不敢不租,怕迷路!

    ReplyDelete
    Replies
    1. 係呀,但唔租又唔得。所以偶然會自駕遊的話,自己去鴨記買個GPS,用得三兩次都回本。

      Delete
  8. 你好, 請問你租車係網上book定去到才租的? Avis既保險有full coverage揀??因為我都要買重保險, 但上網book保險方面好似唔係好多選擇...

    ReplyDelete
    Replies
    1. 你好呀~ 我係出發前online book定的。上網買可以揀ER或者Protection Package,睇返單,我係買咗Protection Package。大吉利是要賠的話,excess最多都係比AUD300。

      https://www.avis.com.au/car-rental/content/help.ac?helpKey=reservation.coverage2

      Delete
  9. 你好小蟲! 事隔咁耐唔知你仲有無印象
    當初你地租車時要出示咩野牌照呢?

    ReplyDelete
    Replies
    1. 你好呀~ 我係用澳洲車牌租車嘅。如果你用香港牌,應該要申請個國際車牌先可以租車揸。不過你可以再check check :)

      Delete

到此一遊,留個字啊~

Related Posts Plugin for WordPress, Blogger...