2013 重遊塔斯曼 《Tasmania東岸：冷門之選 ＆ 南半球的風車》

2013 重遊塔斯曼 ♣ 路線 + 遊記Index 

 2013 Sep 匯率: 1 AUD = ~7.3 HKD

今期有啲忙，哩兩日再覆大家之前嘅留言和拜會大家。

去到東岸，熱門的景點有Freycinet National Park和Bicheno。後者就無打算去，因為主要睇的企鵝，在其他地方都已經睇過。有時間的話，前者我哋都想去。但結果係無時間，而時間去咗邊？咪就係去咗我哋更想去嘅孤島Maria Island和回到內陸的Oatlands。

冷門之選  @ Maria Island

放棄Freycinet而取Maria Island，主要係（1）少啲人去（2）聞說能看見野生Wombat的機會很高（3）有一幅漂亮的石崖 Painted Cliff（4）範圍相對比其他National Park細（其實絕對係自欺欺人，個島一啲都唔細）。



因為四面環海，去Maria Island只得坐船：有兩個選擇。一是參加本地團，二是自己搭船去行。兩者都係由Triabunna出發，不過旅行團就包船河，會圍住個島去部份景點、連午餐和上個島望吓。但我哋諗住行吓山，所以就自己去，而且價錢平好多。條船嘅載客量唔高，每日得一兩班船，如果旺季最好訂定先。我哋係淡季就walk-in算，不過全日得一班船，走咗就無㗎啦。船期10:30（船期會變，出發前請核實）由Triabunna開，到達島上的碼頭大概需時半小時。回程16:00，約有五小時在島上。



簡單介紹吓個島先～整個Maria Island都係國家公園，宜家已經無居民在島上居住，只有公園管理員和少量選擇過夜的遊客。島上並無餐廳、商店或酒店，只有幾間基本設施的房間供遊客預訂。房內並無水電，只有床和枱椅，遊客要自行帶備照明、煮食和床舖用具。附近有公共廁所浴室和燒烤設施。

其實小蟲認真考慮過享島上留一晚，因為最想睇嘅The Painted Cliff享日出嘅時候係最靚，而且要潮退先可以行出去。二嚟有兩日的話，可以行晒想行嘅幾條trails（貪心！）。不過，最後當然係得個諗字，又係「唔夠時間」。哩個島有趣的地方，係乜都有。歷史猶久的小島，有天然奇石，有樹林山徑，生態物種保留得比較多。另外，曾幾何時亦是囚禁犯人的地方，亦是水泥廠，所以有不少歷史建築。

行程上，為免行過龍錯失回航，穩陣地選了兩條最近碼頭的山徑：Painted Cliff Circuit和Fossil Cliff Circuit，視乎行得幾快和會唔會停留，每條大概1.5 - 2.5小時。連埋午餐用膳（需自備），時間啱啱好。一邊睇相一邊介紹喇。

船東很均真，去程遲咗開船，就安排回程都遲返咁多。開船後，會逐個party埋去，睇吓乘客有無問題，例如行咩路線，時間安排等等。如果想在島上踩單車，可跟船公司租借。

上岸後大家四散，有人真係嚟過夜㗎。Maria Island曾經是監獄，亦是水泥廠；所以一落船見到大座荒廢咗嘅水泥廠，都幾有地盤feel。另外，就係有不少以前剩低嘅建築，例如享Darlington鎮嘅監倉，宜家就變成旅客過夜的簡便房間。

另一個走唔甩的建築，係上落島一定會路過嘅Commissriat Store，宜家係National Park的reception和資料館。如果之前未買National Park Pass，就記得去買啦。職員好好㗎，會問埋我哋之後仲會唔會去邊個park，幫我哋揀個最啱嘅pass。

第一站先去Painted Cliff。一早天氣較差，陰天又大風。但環境優美，行得舒服；唔少雀鳥大模施樣行嚟行去。

雖然船家話潮退係早上9點，但11點前都ok。其實行得去，都已經過咗廟，唔會行出去睇個painted cliff。況且天色唔靚，一定唔會有之前上網睇過嘅樣。借人哋張相一用（加咗出處㗎啦），加埋自己遠望嘅相，來幻想一吓。

行過個沙灘上岸，就開始出太陽。雖然無日出時咁靚，但都好有特色。

有啲似蛋糕，又有啲似蜂巢。

見都有啲遊客落咗崖邊，我哋怕死，坐吓影張相就算。戲山莫戲水嘛。
回程嘅路段係樹林居多，無乜特別，所以唔出相啦。

返到去Darlington鎮，食個自備午餐就繼續行另一條Track "Fossil Cliffs Circuit"。最開心係，食食吓忽然發覺有隻野生wombat享我地背脊路過。我哋一路跟住，不過就唔會打擾佢啦。當然，佢要行埋嚟都唔會拒絕嘅。

真係好可愛㗎～～～

第二條track都好好行，唔特別出相啦。去到Fossil cliff，見下面都係一個平台咁，有咩好睇吖？

落到去，原來平台旁邊全幅嘅崖石，上面全部都佈滿化石！！！按解說話，已經有250個百萬年（即係2.5億？）歷史，石上有過百萬個海洋生物的化石。去博物館都唔會一次過睇多咁多化石，真係大開眼界～

兜個圈又返去Darlington，哩條路無樹林，比較開揚。

沿路舊建築內的物品，仲有自由自在的雀鳥家族。

如果想見wombat，享Darlington附近比較多，多留意草叢位。我哋享島上前後見過大概六七隻；同場出現嘅，就見過有三隻。原先以後得一隻半隻（如果一隻都見唔到就真係超失望啊。。。），好彩總算超額完成。
野生嘅，形態和反應跟動物園或者庇護所嗰啲好唔同㗎。

島上仲有一兩條track想行，但太遠一日行唔到。喜歡郊外的朋友，不妨諗諗哩個島，真係住返晚都唔拘。有啲行山團，享個島到行足四日㗎，不過價錢就好貴嘞。

翻兜指數：
資料：
齋搭船：http://www.mariaislandferry.com.au
跟旅行團：http://www.eastcoastcruises.com.au/
Maria Island National Park 專頁：http://www.parks.tas.gov.au/?base=3495
National Park入場費：http://www.parks.tas.gov.au/?base=914

南半球唯一的磨坊 @ Oatlands

離開咗Maria Island回到大陸，就渣大半個鐘去Swansea落腳。其實都未決定之後嗰日去邊，不過去Swansea會容易揾地方住，又諗住近近哋Freycinet，真係決定去都近啲吖。但後來發現所謂近，都要再渣差不多成個鐘先入到Freycinet，之後又要兜返出嚟，仲未計行山嘅時間。而之後的一站要往西走，所以唔太順路。於是，就決定去途經的Oatlands，睇南半球唯一還運作的磨坊：Callington Mill。

Oatlands和Tasmania曾幾何時是小麥和麵粉的主要供應地，磨坊於1837年建成，亦曾經是鎮內最大最好的磨坊。可惜興衰有循環，行業轉向澳洲大陸發展，磨坊終在1892-3年由銀行接管。有一段時間用作打鐵工場，而引致發生火警，燒毀風葉和建築結構。而它的歷史價值，直至近四十年才被認定，由地方政府和機構復修。宜家雖然是個景點，但亦有真正做磨製麵粉出售。用這用傳統方法製造，真係買少見少。

介紹牌一塊

風車之外，範圍仲有幾間磨坊的舊屋。哩間以前係有四間房嘅The Millowner's House，而且變咗做Tourist Center和餐廳。

風車的正面與背面。
哩種風車叫做"Lincolnshire" tower mill，有個好似洋蔥咁嘅頂(cap)，和四塊帆葉。風向轉之時，個cap可以跟住轉，盡用天然。不過牆身要建得非常堅固，先能夠承受轉帆時嘅力度。

連同地面樓高五層，guided tour會由頂層開始講解。不過入內要放低晒所有隨身物品（有locker提供），包括手袋背包，手機相機都要放低。上落樓梯頗斜，都幾容易撼親頭，所以要帶浴帽和頭盔。
因為無相又無筆記，真係唔太記得介紹過的內容。大致係講吓歷史，同每一層嘅結構和功用；怎樣調較角度去迎風，怎樣調較研磨小麥嘅粗幼等等。

個guided tour大概卅分鐘，連同試食scone，真係好香麵粉味㗎。導遊話宜家工廠出嘅麵粉，已經無晒wheat germ，仲有後期製作去脫咗好多物質。好似磨坊嘅傳統做法，已經買少見少；一星期只能磨到3.5噸嘅麵粉。見咁罕有，啱啱訂咗（當時）麵包機的蟲老公，就買咗兩包麵粉返香港。

小蟲覺得Oatlands係個好靚嘅小鎮，有不少Georgian式嘅建築，可惜hea食完個lunch已經無時間行個圈。只係去咗磨坊對出嘅保育區望吓雀咁。

翻兜指數：
資料：
網頁：http://www.callingtonmill.com.au/
入場費：免費，風車Guided Tour $15 (Adult)

2013 重遊塔斯曼 ♣ 路線 + 遊記Index

更多照片或資料：Facebook Album