黃變紅：旅警下遊泰國

香港地，特別留意泰國政局的大部分人不外乎有幾類：

1. 打算去泰國的旅客（多數係已經訂晒機票酒店嘅）
2. 身在泰國的旅客
3. 有親友在泰國的擔心人
4. 食住花生等睇「香港政府出手救人」這齣戲、又或者係唔係都鬧定仲去泰國的旅客是「不負責任+自私精」的市民。

由5月20日到25日，小蟲第一身地經歷了#1和#2，當然附帶#3的屋企人。而既然有前三點，亦少不免列入被第四類人鬧的目標。其他遊客的心態如何，就不得而知；反正每個人都有既定立場和考慮。小蟲則想分享一下自己的想法。

21號傍晚起飛前往布吉島，20號泰國軍方宣布對全國實施戒嚴，當時旅警為黃色。旅警係咩色，只是政府給市民的一個參考。對小蟲來說，其實咩色都無分別，實際還得看自己對情況的判斷。

從經濟角度考慮，取消這個旅程的話，基本上是total loss。事關機位已經check-in，無得改。酒店已經full paid，T&C亦講明無得改。機場transfer，就更加無得改。不過，錢，從來也不是考慮因素。世情是否危險，根本無法用錢來衡量。當年日本東北地震，機票一樣無得退；就算改期，亦唔知改到幾時，結果都係嘥咗。應該唔應該做，並不是單單錢能決定的。

之於決定繼續前往泰國，考慮有二：（1）前往的地點（2）局勢惡化的可能性和影響。

（1）前往的地點

如果我們是前往曼谷的話，其實都唔洗諗，一定唔會去。作為首都和決策地，和根據以前的記錄，要發生事的話，曼谷肯定首當其衝。而且並不是你避開唔去某些景點，就可以當冇事；你永遠唔知幾時有人會忽然集會或搗亂。況且去到一街都係軍人，無論平常有幾friendly，他們都係荷槍實彈的。小蟲唔會覺得享一個咁嘅環境旅遊，是一件樂事。至於布吉，地理上遠離曼谷，正常要攪事也會先選其他大城市。但，這並不等於一定安全，只是就算亂，亦傾向在旺區發生。我們這個旅程本來就是去避世，酒店位於一個小沙灘附近，行程也沒有打算到布吉市或巴東。老實說，要有空有人力攪事攪到了無人煙的沙灘的話，那也無話可說了。

（2）局勢惡化的可能性和影響

不少遊客會主觀願望覺得：

• 唔會有事發生嘅～避開唔去啲示威區囉。
• 一向泰國呢啲政變都唔搞遊客㗎啦～
• 軍人接管咪仲好，仲安全啦。局勢應該唔會惡化囉。

政治政局嘅嘢，小蟲一啲都唔識，唔會推敲到有可能的變化。亦唔係先知，無可能知道去旅行嗰幾日會發生咩事。有遊客覺得無事，但小蟲正正相反，認為一定會惡化。你可能會話：「妖～咁你又去？」邏輯好簡單：「Hope for the best, but prepare for the worst」，只有認為會惡化的諗法，你先會為最壞作好準備。何為惡化，每個人都有所不同。個人認為係（1）會搗亂、會鎮壓，人身安全受到威脅：但正如之前所講，到小村落攪事的機會比較細。這個是正常邏輯推斷，並非主觀願望。（2）唔知咩事，但隨時準備提早撤走：臨出發準備好所有有機來往香港泰國的航空公司，電話、營業時間、和地址。行程上無打算租車，但都帶埋國際駕照，以備不時之需。其間22號宣布宵禁，旅警由黃變紅，有一下都有考慮是否需要縮短行程。（3）封鎖機場：唔好以為唔會發生，翻查過記錄，2006年政變之時，就連布吉機場也被封鎖和關閉。必要時，可能要靠陸路或水路去第二處走。或者，等。（4）封鎖出入境：呢個莫講話香港政府，神仙都未必有救；除咗等。等候，牽涉額外的錢、假期、影響之後的安排等等。舉例，我們周日回港，蟲老公接着的第二天便要飛工幹trip。那張工幹機票的更改條款如何，通通都要考慮。

最後我們四日四夜輕鬆完成，當時布吉的情況一切正常，就連軍人都無見過一個；將來當然就無人知會變成點。呢篇嘢，並唔係想表達自己的決定有幾正確，無事無幹返到嚟。而係，要為自己的選擇負責任。如果決定去，就要作適當的準備和為最終的結果負責，亦唔好認為政府會嚟理你或者救你。有事，小蟲從來都唔覺得係政府的責任，而且遠水不能救近火，靠自己在實際情況的應變能力，好過喪鬧呀邊個邊個幫唔到你。

無人知道日後的發展如何，但若果有人真係想繼續去泰國（邊個城市都好啦，但小蟲覺得一亂就好容易散開去），有幾點提供給大家參考：

• 緊貼最新局勢：
• 香港政府旅警的網頁，但老實講，啲資料真係好流囉。
• 雖然今次唔係用澳洲護照，但佢嘅Travel Advice會多少少資料。
• 泰國粉絲大本營 Facebook page。泰國通胡慧沖主理，更新得好密，資料仲好有用（雖然主要係曼谷），真係衷心比個讚佢。不過難為仲有好多茂利問佢，訂咗X月Y號去曼谷／其他城市，仲好唔好去／安唔安全。人家只可以提供當前最新的資訊，去或唔去，點解唔用下自己個腦去判斷和決定呢？如果淨係識得問呢啲問題嘅朋友，拜託，你都係唔好去喇。
• 酒店要有國際電視台，接收BBC等等的資訊。
• 各個有信譽的新聞網站
• 買張當地電話卡或者租個pocket wifi，可以長期收到資訊。當然，軍政府要封網的話，都係無用；但暫時未有出現。
• 一個清晰的腦袋。動蕩之時，難免謠言滿天飛。乜嘢應該信，乜嘢係流料，要識得分辨。
• 準備定聯絡資料，包括上述提過的航空公司資料，入境處求助電話號碼，自己和同行者的護照影印本。俾屋企人keep一份，自己offline都要有一份。免得真係無咗internet，想搵到搵唔到。
• 出發前，真係花少少時間，「卵」下泰國過往政變的資料（wiki幫到你）。有個心理準備，情況可以會點樣。

祝君好運～