新分類第一章：Food Depot

自舊年年尾結婚後，和火柴人一星期大概有一半時間在家煮晚飯。

老實說，小蟲沒有太大「烹飪癮」，「要食就煮」為策略。雖然高中和大學時代，大部份時間獨居，都識煮返兩味；但怎也沒法激起興趣，去鑽研烹飪。但反過來，火柴人就好有興趣，放工買餸煮飯，不亦樂乎；小蟲當然也樂得有人肯煮，翹埋雙手等開飯。大家一齊有餐食外，還帶挈小蟲可以維持帶飯的習慣。

既然係咁，為何又有新分類，寫乜鬼「煮」呢？

• 無錯，雖然大部份時間由火柴人操刀，但偶然他遲放工或週末的午餐，就是小蟲落場的時候。正所謂爛船都有三根釘，要寫都有三個餸的。
• 又，最近見網友｛澄｝新婚後出烹飪文章寫得好詳細，心諗：「小蟲雖然唔pro，但勝在夠懶！」可以用最簡便的方法，煮啲食得人的餸菜，都不失為一個可以分享的題材。
• 又，尋晚去了Food Depot入貨。邊買邊諗起，就算唔講食譜，也可介紹埋食材或小蟲光顧的舖頭。

好了，那就先從Food Depot講起。位於觀塘工廠大廈內的舖頭，不是有人介紹或做promotion，根本不會行上去。主打賣些外國入口的乾貨，和冷凍食品。

（即興隨手影，好鬼朦）舖頭在樓層最入的位置。

頭一次認識它，是數口精的同事話去那兒買急凍牛扒，試完話好，之後又話去買羊扒（送rosemary）和三文魚扒等等，小蟲就跟隊去看看。不過火柴人不喜吃扒，所以只買意粉。意粉大把地方有得買，點解去嗰度買？無錯，Taste, City Super，M&S有大量入口貨選擇，但一個字貴囉。小蟲成日覺得，有錢洗唔叻，識得洗先係路。（當然有好多人唔係咁諗，最緊要有錢洗，何用理洗得是否精明或有無tas屎）

意粉款式唔算多，大概得七八款，連最鍾意食的penne都無，但價錢合理，試過一次質地都唔錯（得閒再講點整），所以尋晚番兜再買。店員今次還推介醬汁，老實講，例牌的Carbonara醬或茄醬就無乜興趣。但見他推介Pesto醬，雖然要整都唔難，但話明懶就當然要懶到底，買一瓶試試。

(1) Linguine 500g

(2) 三色Spirali 500g

(3) Pesto alla Genovese 190g

埋單都係＄56，享出面分分鐘買個醬都唔得啦。平平地，就算整得唔好食都無話浪費材料和肉赤。