29 December 2013

2013 閒遊。神戶 《廉航UO新體驗》


 2013 Dec 匯率: ¥100 = ~HK$7.5
 欲看其他照片,請參閱Facebook Album


新體驗之香港快運 (HKG < > KIX)

HKG 20:30 > KIX ~00:30
KIX 01:40 > HKG ~05:00

不少人鬧爆廉航,由未訂機票鬧到落機,究竟是否屬實也好,小蟲是抱著最壞打算出發的。因為廉,期望亦需要適當調節,無可能「又要威又要戴頭盔」的。先說【訂票 】,過程順利,入資料、付款、電郵確定,全無問題。只可以說,小蟲不是在系統最繁忙是訂票。

【航班時間 】方面,接受不接受就自行判斷和計數喇。的確,起初覺得時間實在奇怪,零晨到埗零晨回程。下面有齊香港直航去關空的航班,故且跟大家分析一下。有人會覺得,零晨到埗乜都做唔到,兼要多住一晚,條數喺番到。以我們當晚入住機場酒店一晚,加上特價機票,每位剛好大概是$2000,依然便宜過不少其他齋機票。而且放工才出發,當日無需請假。另外,無論是先住機場酒店,或者直接出大阪住宿(見下段),第二朝瞓醒即刻可以玩,一樣慳時間。個人覺得絕對好過零晨先出發,到埗無得瞓就要去玩(後生仔、勁慳家者則當別論)。而日頭白白正常時間的航班雖然舒服,但換個角度,請一日假其實有半日用來travel,抵唔抵就見人見智。之於回程,UO689晨早五點到香港,當日怎樣度過就適隨尊便。返公司瞌眼瞓又得,請多日假休息亦得。最慳家的做法,請一日假連周末就玩足三個full day,捱唔捱到就你自己先知啦。

  



當然,航班時間引申出來的考慮就是【航班配套】。抵達關空的時間,巴士鐵路都已經休息。不過有一班特別巴士,相信是專門服侍UO的旅客,01:30開出去大阪車站。麻煩請留心機上廣播或網頁資料嘞,小蟲見好幾名乘客錯過巴士出大阪。如果諗住趕01:30巴士,唔該落機行快兩步霸頭位過關。無寄倉行李的話,都幾肯定趕得切。但如果要等行李,就最好諗定backup plan啦。

而機場亦有酒店,而且中午12:00先check-out,真係瞓到11:45起身都得,唔存在「付全費但睡半晚」的困擾。老實講,小蟲情願正當瞓半晚,都好過到處打躉等天光。總之,到埗後想走想留都得。像我們根本不是去大阪的,就當然留一晚比較合理。想慳錢,機場內有老麥和牛丼店24小時營業,要食要捱時間等天光都無問題;Lawsons就更加不在話下。機場亦非常體貼,在不同的座位會間疏放些毛毯,供等天光的旅客用,能否找到或搶唔搶到,就得碰碰運氣。香港方面又如何呢?於T2出發的UO航班,入禁區後是沒有食物出售的!但有飲水機斟水。回程時約零晨五點抵港T1,如果乘巴士的話,部份路線有通宵行車。機場快線的話,最早的05:54開出,可以食個早餐等上車;抵港大堂的Delifrance和老麥都已經營業。話時話,機場網頁的餐廳部份一點也不user-friendly,根本無辦法直接找到所有餐廳的營業時間。

好了,【服務】又如何呢?我們兩人來回也沒有寄倉行李(勁呢~),所以取行李的等候時間就不能評價了。要寄的話,Check-in時後加20kg的費用是$250,訂票時購買就便宜一點。沒有online check-in,到達機場再由職員派位,想揀吓位就請盡早出現。手提行李亦沒有特別苛刻的檢查(其實無檢查),相信除非特別過份,否則也不會干預。

普遍印象職員的年紀雖然較輕,但態度優良(起碼似返個人)。去程的航班非常罕見,全個cabin crew也是男性,回程僅有一位女性。機上的食物和飲料全要收費,沒有免費飲用水提供。所以各位想繼續慳錢的話,請自備水樽,過安檢後斟妥水才上機;食物則在入禁區前購買。不過老實說,套餐的價錢亦非常合理,大概$50-$60連飲料。

登機閘口不是直接連接飛機,需坐巴士到停機坪上機,冬天的話記得帶件衫跟身。坐位方面,A320是左右每邊三座位形式,leg-room不錯,大舊如蟲老公都話ok。機上是沒有娛樂的,請自行準備或儲足睏意去睡覺。最後,大家可能更關心航班有否誤點。來回的機程,沒有延誤之餘,均有早無遲,實在當今難得一見。可能屬於非繁忙時間,無需排大隊等十萬班機起飛。說到尾,整體來說也沒有甚麼可以挑剔了。最重要是了解明白,細公司和大公司的分別和優劣條件,就不怕定錯期望。

讓神戶爬頭了兩篇文,是時候回到Tasmania之旅,完成後才繼續神戶>南美>尼泊爾>波蘭遊記。

31 comments:

  1. 謝謝分享。我早前都訂了UO東京票。
    另外,訂票時20kg行李單程$100,來回$200。Check in時加就貴D。

    之前乘Airasia日本,不能自携食物,UO可以?

    ReplyDelete
    Replies
    1. 一個唔錯嘅廉航體驗!
      我一月都join 左團去韓國, 飛0030. 正擔心緊瞓覺/到埗後精神狀況!

      Delete
    2. 多謝補充,已更新資料。食物方面,我揾唔到佢話唔比帶,所以assume帶得(雖然我哋無帶:P)
      http://www.hkexpress.com/UO-Conditions-of-carriage.pdf

      Delete
    3. @Hazel 如果跟團應該都無問題嘅,有人接載又唔洗揾路 ^^

      Delete
    4. 另外,UO飛HND,下年時間好像變了。我去程到步會是0440,回程是0620開。

      Delete
    5. 哦,係呀?咁網友要自己做功課啦,我哩度只係講吓我飛大阪嘅經驗。^^

      Delete
  2. 謝謝分享, 我可能會到達後, 直頭係機場睡幾小時, 然後出去玩 !祝新年快樂!, 也祝你有美好的2014年!

    ReplyDelete
    Replies
    1. 哈哈,我都估你會。你身壯力健梗得啦,我諗我未到捱到六點就自動熄機。

      Delete
  3. 有尾班車出梅田算好好啦,佢班晚機去東京真係全機人訓機場咁濟

    ReplyDelete
    Replies
    1. UO飛HND班機去到都係00:30,比我就搵間近近哋酒店眠一眠 zzzz....

      Delete
  4. 我係peach嘅粉絲,坐咗三次都未試過誤點。我比較喜歡peach d 時間,去到食個早餐放低行李再去個稍還嘅景點,玩到兩三點就check in 午睡一下,之後再去行街食飯,用盡時間又唔辛苦。其實去旅行,最緊要了解自己覺得舒服嘅模式

    ReplyDelete
    Replies
    1. 係㗎,最後點玩法,都係要自己舒服同開心啫

      Delete
  5. 新年快樂!^_^ ﹏。﹒‧° * **☆

    ReplyDelete
  6. 祝新年快樂! 心想事成!

    ReplyDelete
  7. 我舊年去青森也是零晨機去朝早到東京,我覺得問題不大, 因為可以在往青森的JR長車程上訓一陣^^
    之前睇過有blog友訓大阪機場似乎也問題不大,至少治安不用太擔心
    部份廉航都有提供水,不過為免麻煩還是先在候機室裝定好一點,當然其實5-60蚊飛機餐也不貴大可一試

    ReplyDelete
    Replies
    1. 所以廉航都有客路,各取所需。我都唔太擔心治安,不過如非必要,就唔係太鍾意通街(機場)瞓嚕。其實就算唔係廉航,我哋都會自己裝定水,尤其是長途機,唔洗吓吓叫人攞。^^

      Delete
  8. 「又要威又要戴頭盔」< -- 正正就係D人成日搭呢個集團D航空公司既貼切形容詞!!! (即包埋香港航空)
    因為我係機場做左好耐, 呢D人零舍討厭!!!

    ReplyDelete
    Replies
    1. 不過我估都要啲時間train吓啲人接受廉航的不同,希望慢慢會有改善㗎啦。

      Delete
  9. 神戶>南美>尼泊爾>波蘭遊記!
    真的好厲害呢!好期待你的靚相!

    ReplyDelete
  10. Replies
    1. 不過我寫得好慢吖~蛇年完我都未寫完嗰兩篇貨仔。

      Delete
  11. 幾個小時的航班,廉價航空也無妨吧,最重要是安全就好。

    ReplyDelete
  12. 今次真係要預祝你新春愉快啦!

    ReplyDelete
  13. 真係有排寫呀! 祝你馬年出更多地方,不斷有嘢同我地分享!

    ReplyDelete

到此一遊,留個字啊~

Related Posts Plugin for WordPress, Blogger...