2008 日本東北 【Day 5 銀山溫泉】- 屹下屹下去銀山

路線圖 

香港

仙台 

松島

石卷

山形市

寒河江

銀山溫泉

最上峽

藏王  

山寺

仙台

香港

Day 5 (Part 2) 2008.01.24 (四) 

尾花沢 / 銀山溫泉天氣: 

(-3C)

由Cherryland渣咗一個鐘，享超市逛咗大半個鐘，四點先繼續行程。天氣真係麻麻，係咁落雪，又開始天黑。條路越來越難行，前後都無車，能見度廿米都唔知有無，啲路幾乎係行到埋去先見到。所以開得超級慢，幾驚撞埋去啲雪牆。有啲位，兩旁的雪高過晒架車，仲要好大風，除咗落緊的雪，仲刮起埋兩旁的雪堆，真係搞到乜嘢都睇唔到，開乜嘢車頭燈都無用。個種感覺真係好恐怖，好似「開眼盲」咁。

又唔可以停向路中心，唯一可以做，就係慢慢屹下屹下咁向前去。屹到五點，終於去到，攰到想死。

路過銀山莊，就知道已經到了銀山溫泉，亦知道各個旅館的停車場都係附近。我地訂了永澤平八，轉入去停車場搵佢的車位。好彩，享正門口，仲要係carport，起碼有瓦遮頭。以當時的雪勢，無carport的話，聽日都咪晒旨意搵得返架車。個carport可以泊到3 x 2架車左右，但當日計埋我地都係得三架。張相走時影的：

由停車場望落去銀山，就係咁的。有的手震 + 開始入黑 + 幾大雪 = 矇。

其實早兩日由松島出發，小蟲好醒咁將行李執開去一袋旅行袋，方便每晚轉酒店唔晒下下托兩大舊行李。到咗銀山，實在無辦法唔讚下自己，

因為旅館個條街無車入到去，由停車場行去旅館，近得黎都要幾分鐘。係漫天風雪的情況下，當然越少行李越好。話雖得個行李袋，但都仲有背囊手袋等雜物，仲要係落斜，對鞋唔咬地，驚跣驚跌。行到去永澤平八，兩個雪人碌入去咁濟。

安頓好之後，趁未夠鐘食飯，就出去行一轉。幸好旅館有雨褸雪靴用品提供，所以今云行得舒服好多。不過風雪時快時慢，好飄忽，景雖然靚，但影幾張相就急不及待行完佢。

去到條街的尾段，就搵到亞信的故事的木公仔店：伊豆こけし工房。雖然已經18:15，見燈光火著就殺入去睇。初初以為只賣こけし公仔的，但原來尚有很多無哩啦更的手信。

小蟲最後買了個牙簽座贈友，亞嬸嬸仲幫手揀個木紋靚點的。出返街回旅館，條街已經無乜人，大家應該食緊飯啦。

 

更多照片