香港
Day 5： 銀山溫泉 住宿 2008.01.24
泊好架車行落去銀山溫泉條街，好容易就搵到永澤平八，因為它在風貌特別不同的滕屋隔離。見到滕屋，行過兩步就見到。一入到reception，服務員從我們手中接過行李，掃走雪花。登記的時候，要交低車匙，不知是怕我們中途賴帳走佬，還是甚麼了。基本上成間旅館的服務員都不太懂英語，有個服侍我們、貌似趙薇的後生女就略好一點。
我們的房間在二樓叫せことい，銀山溫泉有條叫せことい橋，相信間房的名字亦從此而來。房間的外景，就是銀山溫泉街和那條河流，更對著永澤平八的招牌。
18:45開飯，晚餐在房間內吃，又是那些一碟二碟。賣相精緻，但胃口不合。同火柴人講，好彩整個trip只有2晚這樣的飯局，要不然真是吃不消兼吃不飽。
一吃，吃到20:00。服務員本來叫我們食完就call她，但可能食得太耐，她們趕住清潔收拾，所以自行入內收拾。老闆娘就入來傾了一陣，估到佢大概話佢去過香港，客氣的讚一輪。跟手一位貌似老闆的叔叔入來鋪床，之後我地就準備梳洗。
其實整個旅程，揀旅館的要求只有一個，就是要有貸切風呂，因為實在不慣與其他人肉帛相見。。。
食飽飯攤透一陣，就去視察下兩個貸切風呂。兩個都係so-call露天風呂，其實只是旁邊不是密封，窗邊有罅隙，不是完全開揚那種。但天氣實在太凍，雖然不是全露天，兼附有兩盞暖燈，經過考察，覺得實在無可能沖到涼!! 白天再去拍照，穿著整齊，還是覺得凍，你說晚上怎可能有勇氣除衫？玩東華籌款咩？!
睇完一輪，決定放棄貸切風呂。但唔通唔沖涼咩？一咁諗，小蟲頭到痕埋，唔得哩。
唯有去睇下公共浴場啦，應該暖點呱。公共浴場在地下reception旁邊，一落樓，原來已經熄晒燈，準備瞓覺咁樣。懾手懾腳，發覺裡面無著燈，應該無人，而且比貸切風呂暖得多。好! 趁無人，啦啦聲沖啦~~~ 不過沖之前，影相先~
男女浴場是分開的，睇火柴人影的相，內裡都差不多一樣。泉水非常夠熱，要先對腳落去適應一下，先可以再浸身。睇告示牌，源泉的溫度高達61.4度。浸完，簡直一身鬆晒。
其中的溫泉蛋，以為像boiled egg一樣剝殼，剝剝下覺得個殼黐住晒啲蛋白，碎濕濕。服務員見我地雞手鴨腳，就來救助。原來溫泉蛋生生地，要像打生蛋般，大力哼落個碗到，就會成隻滑潺潺咁流落個碗到。唔洗慢慢剝架。
地下reception外，還有客廳一個，早上7:30-9:00有咖啡服務，和當天的報紙可供閱讀。
【邊間】永澤平八
【環境 / 地點】
【房間 / 服務】
【食物】
1/2【幾錢】13800円 x 2 = 27600円 (一泊兩食)
【幾大】和式八疊 (沒有浴室，只有洗手間)
【邊到book】予約宿名人。溫泉
【小蟲rating】
0 comments:
Post a Comment
到此一遊，留個字啊～