2011希臘初夏 ♣ 醉人。婚禮。一仆一碌睇日落

辦好租車手續，就再一次回到酒店取回行李（因為之前只是接了我們三人去office），
輾轉到四點才出發去第一個景點 Santo Wines。



2011希臘初夏 ♣ Index


Day 8: 2011.06.07 (Tue)




享Santorini揸車，基本上頭一張相已經總結了；不太闊的路面，
有行人，有大量學神feel的自駕遊車輛，有四驅爬山車，有電單車，仲有驢仔。



Santo Wines位於主港口Athinios附近，由Fira駕車本來是一條大直路 。
 不過跟路牌行九曲十三彎的路，繞過Pyrgos，跑到油站入油加問路才到。
後來發現我們發雞盲，之前路過咗都睇唔到。


不過前後都係講緊大概廿分鐘的事。






駛入酒莊範圍泊好車，就去揾tour的資料。
不過是日最後的一個導賞團已經出發而且爆滿，所以無得睇。



最抵死係，我哋想訂明早的團，但個職員係都要我哋聽日打電話嚟問，又話好多時reserve咗比出面的旅行團，唔肯定聽日有無位，無伶兩可咁。最後我哋都決定聽日去其他地方算數，反正全世界的酒莊唔差得好遠，去少次都無礙。








既然無得睇，就齋試酒啦。


享停車場旁邊的餐廳，是試酒範圍，環境好好，當日仲無乜人。只是初期有旅行團參觀完畢，散咗之後只剩散客三五七人。


全世界都用尾入泊位，好容易一望就知道邊架車係香港人揸嘅。





環境好舒服，無Fira嗰邊咁多屋，真正一望無際。我哋就坐享半露天的位置逍遙快活。

可惜明明今朝曬到死，下午居然起雲，有啲擔心睇唔到最後一個享Santorini的日落。







有得三個人，就叫最多款式來試。
喜不喜歡這兒的酒就因人而異，只能說唔啱我哋的胃口。








食吓望吓飲吓傾吓，本來都無坐咁耐。臨場加插提供了不少娛樂，是一對當日在Santo Wines結婚的couple，我哋無無聊的全程做埋賓客幫佢哋撐場（離遠用眼球啫）。



小蟲覺得嗰度係個唔錯的結婚好地方，個景又靚，賓客多少都無問題。










這兒除咗賣酒之外，遊客生意當然有Santorini的手信。人少少可以慢慢睇，又無Sales喺咁跟住（旺區會㗎），加上價錢比出面平啲，所以我哋都買咗好多野先走。


同埋，唔走唔得啦，因為驚趕唔切去Oia check-in酒店同去睇日落。






攞車的時候，已經係6:53pm。






琴琴青揸去Oia，大概半個鐘。
我哋無醉駕，亦無超速㗎。


去到Oia中心掉低架車，見到好靚的雲中日落景，毫無準備啦啦聲影幾張，先去揾間酒店check-in。不過好心急，話晒日落唔等人。。。








幾經轉接先揾到間酒店（下回再說），本來想去Oia的著名例點看日落，不過老板娘話應該趕唔切（當時8:10pm），因為要行去都幾遠。所以佢提議我哋揸車去Amoudi Bay。

吓？又要攞車同揾路，揸車會快啲？睇地圖都唔近喎～









揸到半路真係好擔心，唔知仲有幾耐先到。所以懸崖勒馬，唔理啦，見有忽爛地就泊低，好歹求其睇咗個日落佢啦，好過完全無得睇。


四野無乜人，夠哂靜，亦唔洗霸位。






雖然求其，雲層亦厚，但總算睇咗。
估唔到有雲有霞，反而令離遠的島嶼有迷迷幻幻的感覺。





話說我哋企享忽爛地睇的時候，原來旁邊係間細酒店。內裡唔知係職員定客人，見我哋影日落，就邀請我哋入去。初時都恐防有詐（例如要我哋叫杯野飲）無入去，到後來再邀，見人家誠懇有心就入去企吓影吓。





哩間酒店雖然唔喺Oia中心，但返嚟睇過價錢都抵，又有日落美景。
不過就只啱晒自駕人士。





天氣唔算最好，見唔到個蛋黃跌落水平線。我哋亦等到見唔到太陽的蹤影先離開，繼續前去Amoudi Bay。其實都係揸多兩分鐘。。。






哩度只有小小的地方，唔揾食就無野行無野做。
既然差不多九點，唔食野唔通打倒回府咩。


然而，都係用人氣哩招，揀咗間叫Sunset的嚟食。


個燒烤爐周不時傳出陣陣香味。唔～～～～




正所謂靠海食海，唔食海鮮點得呢～






所有碟頭的味道略略重手（較鹹較酸），不過都算好食。
職員照顧開遊客，各方面都幾醒目同識做。
加埋食得海鮮，都唔荒會平。連埋酒水，€106。



食飽飽，夜麻麻揸車返酒店。
由這裡出Oia中心，彎路多而且無街燈架。小心。


（預告：型英帥大隻）


2011希臘初夏 ♣ Index